Жетісу облысы, Үштөбе қаласындағы сүт өндіретін «Үштөбе сүт өнімдері» ЖШС-не қатысты даулы іс кассациялық сотта қаралмақшы. Бірінші және екінші сатыдағы сот кәсіпорынға қатысты электрондық шот-фактураларды жарамсыз деп танып, бюджет қаражатын өндіру туралы шешім шығарған болатын. Алайда қорғау тарапы бұл шешіммен келіспейді және оны заңсыз әрі негізсіз деп санайды. Қорғау тарапының айтуынша, сот өз шешімін негізінен бір куәнің Экономикалық тергеп-тексеру департаментінде берген түсініктемесіне сүйеніп қабылдаған. Бірақ кейін сол куә сот отырысында алғашқы жауабынан бас тартып, өзіне қысым көрсетілгенін және барлық сүт жеткізілімдерінің нақты болғанын мәлімдеген. Сонымен қатар қорғау тарапы зауыттың нақты өндірістік қызмет атқарғанын дәлелдейтін көптеген құжаттарды ұсынғанын айтады. Олардың қатарында электр энергиясы мен көмірге жұмсалған шығындар, қызметкерлердің еңбекақысы, зертханалық сараптамалар, дайын өнімді өткізуге қатысты шарттар, индустриялық сертификаттар, банк төлемдері және басқа да қаржылық құжаттар бар. Сондай-ақ, қорғау тарапының мәліметінше, сүт Каратал ауданындағы жеке қосалқы шаруашылықтардан жиналған. Осыны растайтын ауыл тұрғындарымен жасалған келісімшарттар, төлемдер және куәлардың жауаптары ұсынылған. Бұған қоса, сүт тасымалдауға арналған арнайы автокөлік сатып алынғаны және оның нақты пайдаланылғаны да істегі дәлелдердің бірі ретінде көрсетілуде. Қорғау тарапы кассациялық соттан бірінші және екінші сатыдағы сот шешімінің күшін жойып, талап арызды толық қанағаттандырудан бас тартуды, сондай-ақ ауыл тұрғындарын куә ретінде шақырып, олардың жауаптарын тыңдауды сұрап отыр. Кассациялық сот барлық ұсынылған дәлелдерге құқықтық баға беріп, түпкілікті шешім қабылдайды. Біз бұл сот процесін жіті бақылап, оның барысы туралы тұрақты түрде ақпарат беріп отырамыз. - @zhan_ahmadiev