@htetdipa: အိပ်မက်နဲ့ ဘုံဘဝ အတွေးစများ (၁) ခင်မင်ရင်းနှီးရတဲ့ သူငယ်ချင်းတစ်ယောက်နဲ့ ပြီးခဲ့တဲ့ ပထမဝါဆိုလပြည့်နေ့မတိုင်မီ တစ်ရက်က လက်ဖက်ရည်သောက်ရင်း စကားပြောဖြစ်ကြတော့ သူနဲ့ ဝေးကွာခဲ့တာ အတော်ကြာပြီဖြစ်တဲ့ ဘကြီးတစ်ယောက်ရဲ့ဇနီးဖြစ်သူ ဆုံးသွားတဲ့အကြောင်း အိပ်မက်ရပြီး မကြာခင်မှာပဲ အမျိုးတွေ ဖုန်းလှမ်းဆက်လို့ အပြင်မှာ တကယ်ဖြစ်နေကြောင်း သိလိုက်ရပါသတဲ့။ အိပ်မက်ပေးသူကတော့ ဆုံးသွားတာကြာပြီဖြစ်တဲ့ သူ့ရဲ့အဘိုးပါ။ အဲဒီအိပ်မက်ထဲမှာ သူ့အဘိုးရောက်လာပြီး လှလှပပ ပြင်ဆင်ထားတဲ့ အမျိုးသမီးကြီးတစ်ယောက်ရဲ့ရုပ်အလောင်းကို လက်ညှိုးထိုးပြကာ "သူဆုံးသွားပြီကွ၊ မင်းနဲ့လည်း သိတယ်" လို့ ပြောကြောင်း၊ ဘယ်သူမှန်း ရုတ်တရတ် မမှတ်မိပေမယ့် နိုးလာပြီး ပြန်စဉ်းစားကြည့်လိုက်တော့ မှတ်မိသွားကြောင်း၊ အမျိုးတွေ ဖုန်းဆက်တော့ သေချာသွားကြောင်း၊ သူ့အဘိုးဟာ တစ်နှစ်ကို ၃, ၄ ခါလောက်တော့ အိပ်မက် ပုံမှန်ပေးနေဆဲဖြစ်ကြောင်း စသဖြင့်တွေ ဆက်ပြောပြပါတယ်။ ကျွန်တော် ဆေးလိပ်ဖွာရင်း အသာအယာပဲ ခေါင်းညိတ်ပြလိုက်ပါတယ်။ ကျွန်တော့်အတွက်ရော သူ့အတွက်ပါ ဒီလိုကိစ္စတွေ ကြုံရတာများလွန်းလို့ ရိုးအီနေပြီး အထူးအဆန်း မဟုတ်တော့ပါဘူး။ ဘုရားတရား ကိုင်းရှိုင်းတဲ့ သူငယ်ချင်းဖြစ်သူဟာ သူ့အဘိုးဆီကသာမက အချို့သော ပုဂ္ဂိုလ်တွေဆီကပါ ထူးခြားမှန်ကန်တဲ့ အိပ်မက်တွေကို မကြာခဏ ရလေ့ရှိသူပါ။ အခုအိပ်မက်ဟာလည်း သူ့အဘိုးဘက်က အမျိုးတော်စပ်သူတစ်ဦး ဆုံးသွားလို့ ပေးတဲ့ အိပ်မက်သာဖြစ်ပြီး အသုဘလိုက်ပို့၊ ရက်လည်ဆွမ်းသွပ်သွားရုံကလွဲလို့ တခြား ဘာမှထွေထွေထူးထူး လုပ်စရာ မရှိပါဘူး။ နောက်တော့ တခြားအကြောင်းတွေပြောရင်း စကားစ ပြတ်သွားကြပါတယ်။ ညအိပ်ခါနီးတော့ နဖူးပေါ် လက်တင် စဉ်းစားမိပြီး အတိတ်အကြောင်းတွေ ခေါင်းထဲရောက်လာပါတယ်။ သူငယ်ချင်းဖြစ်သူရဲ့အဘိုး ဆုံးသွားတာ အခုဆိုရင် ဆယ်စုနှစ် တစ်ခုနီးပါး ရှိလာခဲ့ပါပြီ။ သက်ရှိထင်ရှားရှိစဉ်က အလွန်ရိုးဖြောင့်သူဖြစ်ပြီး ဘုရားတရားလည်း အတော်လုပ်သလို ကျွန်တော်နဲ့လည်း ရင်းနှီးပါတယ်။ ဆုံးသွားပြီးနောက်ပိုင်းမှာတော့ ပြုံးရွှင်တဲ့ မျက်နှာ၊ ခန့်ညားတဲ့ ပုံစံ၊ ဝတ်ဖြူစင်ကြယ်နဲ့ သူငယ်ချင်းဖြစ်သူကို မကြာခဏ အိပ်မက်တွေ ပေးပါတော့တယ်။ အိပ်မက်တွေကလည်း အစုံပါပဲ။ ဆုံးကာစတုန်းက အိပ်မက်ထဲမှာဆိုရင် သူအဆင်ပြေနေပြီဖြစ်လို့ စိတ်မပူဖို့ လာပြောပါတယ်။ နှစ်နည်းနည်းကြာပြီး သူ့အဘွား ထပ်ဆုံးသွားတော့ "မင်း ဘွားကြီးတော့ ဘယ်ရောက်သွားလဲ မသိဘူးကွာ" လို့ အိပ်မက်ပေးလို့ ဝမ်းနည်းခဲ့ကြရပါသေးတယ်။ သူ့အဘွားမဆုံးခင်က ငယ်မူပြန်သလိုဖြစ်ပြီး သတိသိပ်မကောင်းရှာတော့လို့ ဒီလိုဖြစ်လာနိုင်ကြောင်း ကြိုတော့ ခန့်မှန်းမိခဲ့ကြပါတယ်။ ဒီကြားထဲမှာရော၊ နောက်ပိုင်းမှာပါ မက်လိုက်တဲ့ အိပ်မက်တွေဆိုတာ အများကြီးပါပဲ။ ကိုဗစ်ကာလအတွင်းမှာ သူငယ်ချင်းဖြစ်သူ အပြင်းဖျားတော့ အိပ်မက်ထဲမှာ ဖန်လုံးလို ကြည်လင်နေတဲ့ အသီးတွေ တောင်းတစ်လုံးနဲ့ အပြည့်ထည့်လာကာ "ရော့ တစ်လုံးစား" ဆိုပြီး အသီးတစ်လုံးပေးလို့ စားလိုက်ပါသတဲ့။ အဲဒီအိပ်မက်,မက်ပြီးတော့ ရက်ပိုင်းအတွင်း ထူထူထောင်ထောင်ဖြစ်ပြီး ပြန်ကျန်းမာလာပါတယ်။ ကြုံလို့ ပြောရရင် ကိုဗစ်ကာလအတွင်းမှာ ကျွန်တော့်အဘွား ဖျားတုန်းကလည်း အလားတူ သစ်သီးကျွေးတဲ့ အိပ်မက်မျိုး မက်ပြီး ပြန်ကျန်းမာလာဖူးပါတယ်။ ကျွန်တော့်သူငယ်ချင်းနဲ့ အဘွားဖြစ်သူတို့ဟာ ကျွန်တော်ငယ်စဉ်တုန်းက တွေ့ဖူး၊ သိဖူးခဲ့ကြပေမယ့် ပြီးခဲ့တဲ့ ၁၅ နှစ်လောက်အတွင်းမှာတော့ တွေ့ဆုံစကားပြောဖြစ်ခဲ့ကြတာမျိုး မရှိသလို ကျွန်တော့်ကို သူတို့ ပြောပြခဲ့တဲ့ အိပ်မက်တွေအကြောင်းလည်း အခုစာထဲမှာကလွဲလို့ တခြားဘယ်သူ့ကိုမှ ကျွန်တော် ပြန်မပြောပြဖူးပါဘူး။ ဆိုလိုတာက သူတို့ဟာ ကြားဖူး၊ သိဖူးတဲ့ အကြောင်းအရာတစ်ခုကို စိတ်စွဲပြီး မက်ကြတာ မဟုတ်ဘူးဆိုတာပါပဲ။ "အိပ်မက်ထဲမှာ လာပြီး ဆေးကုပေးတယ်ဆိုတာ ဒီလိုမျိုးပါလား" လို့ သဘောပေါက်ခဲ့ရပါတယ်။ ဒါကြောင့်လည်း ကျွန်တော့်ဆီ လာတဲ့ အချို့သော အမှောင့်ပယောဂကိစ္စတွေ၊ ပြင်းထန်တဲ့ ကျန်းမာရေးကိစ္စတွေအတွက် သက်ဆိုင်ရာ ဝိဇ္ဇာတွေ၊ နတ်တွေကို မကြာခဏ မေတ္တာပို့ အမျှဝေပြီး အကူအညီတောင်းကြည့်ဖို့ ညွှန်းလေ့ရှိတာဖြစ်ပါတယ်။ သူငယ်ချင်းဖြစ်သူရဲ့အထူးခြားဆုံး အိပ်မက်တွေထဲက တစ်ခုကတော့ ကျွန်တော်တောင်းခိုင်းလို့ မက်တဲ့ အိပ်မက်ပါ။ သူငယ်ချင်းရဲ့အနေအထားက စားနိုင်၊ သောက်နိုင်ရှိပြီး ငွေကြေးအထိုက်အလျောက် ပြည့်စုံပေမယ့် လူငယ်ပီပီ ပိုက်ဆံ ပိုရှိချင်ကြောင်း အမြဲပြောပါတယ်။ ကျွန်တော်က လောကီပညာနဲ့ လုပ်သင့်တာလေးတွေ ညွှန်းပေးရင် ဂါထာမန္တန်ရွတ်၊ ပုတီးစိပ်တော့ လုပ်ပေမယ့် အစီအရင်၊ အဆောင်ဆိုတာနဲ့ "ဒါတွေက အကျိုးလိုလို့ ညောင်ရေလောင်းသလို ခံစားရလို့ကွာ" ဆိုပြီး ပြန်ပြောတတ်ပါတယ်။ လောကီပညာကို ယုံကြည်ပေမယ့် ဘုရားတရားကို ရိုးရိုးရှင်းရှင်းသာ လုပ်ချင်ပြီး ထွေလီကာလီတွေ လုပ်ဖို့ စိတ်မပါကြောင်းလည်း ခဏခဏပြောလေ့ရှိပါတယ်။ ကြာတော့ အမြင်ကတ်သလို ရှိလာတာနဲ့ "မင်း အဘိုးရှိတာပဲ၊ စည်းစိမ်ဥစ္စာနဲ့ ပတ်သက်ပြီး မ,စ,ဖို့ အကူအညီတောင်းကွာ" ဆိုပြီး ပြောလွှတ်လိုက်ပါတယ်။ (ဆက်ရန်) #HtetDipa #fyp

ထက်ဒီပ Htet Dipa

Open In TikTok:

Region: MM

Saturday 04 July 2026 12:34:12 GMT