في حاجات كتيرة في حياتنا بنفتكرها حب، وبعد فترة بنكتشف إنها كانت مجرد تعوّد. والتعوّد مرات بيلبس لبس الحب لدرجة إنك ما بتقدر تفرّق بينهم إلا بعد ما الزمن يكشف الحقيقة. الحب يا عزيزي ما إنك تتعود على وجود زول في يومك وبس. الحب إنك كل مرة تشوفو كأنها أول مرة، وكل مرة تسمع صوتو يطمن قلبك، وكل مرة يغيب تحس في حاجة ناقصة، ما لأنك اتعودت على وجودو، لكن لأن روحك بقت تلقى راحتها معاه. أما التعود... فهو إنك تخاف من الغياب لأنك ما عارف تتأقلم بدونو، ما لأنك بتحبو. تخاف من الفراغ، من تغيير الروتين، من الأماكن البقت شاهدة على وجودكم، وتفتكر إنو الإحساس الداخلك حب، وهو في الحقيقة تعلق بعادة بقت جزء من يومك. الحب بخليك تهتم من قلبك، بدون ما تحسب المقابل. بتلقى نفسك بتسأل، وبتطمن، وبتسامح، وبتحاول تصلّح أي كسر يحصل بينكم، لأن الزول ده عندو مكانة في قلبك ما بتتعوض. أما التعود، أول ما يدخل الملل، بتبدأ الأسئلة تقل، والكلام يخف، واللهفة تختفي، وكل حاجة تبقى بتتعمل كأنها واجب ساي. في الحب، التفاصيل الصغيرة عندها قيمة. رسالة بسيطة بتفرحك، مكالمة قصيرة بتغير مود يومك، وضحكة من الزول البتحبو بتنسيك تعب الدنيا. لكن في التعود، حتى الحاجات الجميلة بتبقى عادية، وما بتحرك فيك نفس الشعور القديم. وأصعب حاجة إنك تقعد سنين مفكر إنك بتحب، ولما تمشي الأيام تكتشف إنك كنت متمسك بفكرة الزول، ما بالزول ذاتو. كنت خايف من البداية الجديدة، ما من فقدان الشخص. ودي لحظة موجعة، لكنها بتخليك تفهم نفسك أكتر. الحب الحقيقي ما بيكون كامل، لكن بيكون صادق. بيعيش في المواقف، في الاحترام، في الاحتواء، وفي الإحساس بالأمان. ما في عدد السنين، ولا في كترة الكلام، ولا في الوعود الكبيرة. الحب الجد هو الزول البخليك كل يوم تختارو بنفس الرغبة، حتى بعد التعب، وحتى بعد الزعل. عشان كده، قبل ما تقول: "أنا ما بقدر أعيش بدونك"، أقعد مع نفسك واسألها بكل صدق: أنا بحب الزول ده عشان هو هو؟ ولا عشان اتعودت يكون موجود في حياتي؟ لأنو في فرق كبير بين الاتنين. الحب بخليك تتمسك بالإنسان حتى وهو متغير، لأنك حبيت روحو قبل أي حاجة. أما التعود، فأول ما تتغير الظروف أو يختفي الروتين، بيبدأ يختفي معاه الإحساس. وفي النهاية... الحب عمره ما كان عادة. الحب قرار بيتجدد كل يوم، وإحساس بعيش رغم التعب، ورغبة صادقة في البقاء. أما التعود، فهو ممكن ينتهي أول ما تتغير الظروف. وعشان كده، فتش في قلبك كويس... لأنو الفرق بين الحب والتعود بسيط في الكلام، لكن كبير جداً في الإحساس، وأكبر منو في النهاية مقــ⁷ــداد #خواطر_مقداد #خواطر #سودانيز_تيك_توك_مشاهير_السودان🇸🇩 #سودانيز_تيك_توك_مشاهير_السودان #جخو،الشغل،دا،يا،عالم،➕_❤_📝 - @megdadahmed22