@ali_heemaal: Weli ma la kulantay qof aad u arakaysay walaalkaaga dhabta ah, dabadeedna maalin ay iskugu kaa mid noqdeen isaga iyo cadawgu? Waxaa jira dhaawacyo aan dhiig lahayn, haddana qalbiga ku reeba nabaro aan wakhtigu si fudud u tirtiri karin, ilahay-baan ka magan-galnee, mid ka mid ah waa marka qof aad qalbigaaga u furtay, aadna u siisay kalsooni aan xad lahayn, uu maalin kuu noqdo qof aanad garanayn. Qof aad u haysatay in uu dhabarkaaga ilaalin doono, ayaa mararka qaar noqda kii ugu horreeyay ee dhabarkaaga dhaawaca, qof aad u taqaanay walaalkaaga, ayaa maalin ku tusaya in xidhiidhkiinu uu isaga u ahaa magac keliya, adigase uu kuu ahaa macne iyo nolol. Waa halka abwaankii lahaa. -Walaalkay nimaan u haystay.! -Muxuu waddo ii fadhiistay.! Xanuunka arrintaasi kuma jiro oo keliya in uu ku khiyaamay, wuxuu ku jiraa in aad ogaatay in qofkii aad sirtaada ku aamintay uu maanta la safan yahay kuwii aan wanaaggaaga jeclayn, waxaa ka sii culus marka aad aragto isaga oo u sacbinaya guul-darradaada, ama ka aamusan dulmiga laguu geysanayo. Marka kale waa kii lahaa abwaankii… -Qofaan wehelkayga mooday.! -Ka qayb-gallay weerarkayga.! Maalintaas waxaad fahmaysaa in dadka oo dhan isku dhowaan karaan, balse qalbiyadu aysan mar walba isku daacad noqon, waxaa kuu caddaanaysa in walaalnimadu aysan ku dhisnayn hadallo macaan, qosol badan, ama wakhti dheer oo la is yaqaan, waxay ku dhisan tahay daacadnimo aan isbeddelin marka duruufuhu is beddelaan. Marka kale waa kii lahaa abwaankii… -Maxaan wacdarraha adduunka.! -Usoo jiray waayahoodda.! -Maxaa waran la ila doonay.! Noloshu waxay ku bari doontaa casharro qaali ah, waxay ku bari doontaa in qofkasta oo garabkaaga taagan uusan kula socon doonin dhammaadka jidka, qaar waxay kula socdaan inta ay dani ugu jirto, qaarna waxay kaa tagaan marka aad u baahato garabkooda. Balse ha ka murugoon dadka kaa dhacay, ku farax in ay kuu muujiyeen wajigooda dhabta ah ka hor inta ayna noloshaadu si buuxda ugu tiirsanaan, Mararka qaar bixitaankoodu waa badbaadadaada, inkastoo qalbigaagu u arko khasaaro. Qofka runta kuu jecel ma beddelo mowqifkiisa marka dabayshu dhinac kale u dhacdo, kuma qiimeeyo faa’iidada uu kaa helayo, mana kula tartamo marka allle wax ku siiyo, wuxuu kuu taagan yahay maalinta ay dadka kale kaa jeestaan, wuxuuna kuu hiiliyaa xilliga ay aamusnaantu noqoto doorashada dadka intiisa badan. Marka kale waa kii abwaankeenii lahaa.. -Maxaa waran la ila doonay.! -Habbeenimo la ila waayey.! -Nasiibkayga waaberiistay.! Haddii aad marla kulantay qof aad u aragtay walaalkaaga dhabta ah, dabadeedna uu kuu noqday sida cadawga oo kale, ha u oggolaan in dhacdadaasi ay qalbigaaga ka disho kalsoonida dadka oo dhan, halkii ay ku bari lahayd nacayb, ha ku barro garasho, halkii ay ku bari lahayd aargoosi, ha ku barato taxaddar. Waayo, qofka ku khiyaamay wuxuu kaa qaaday sawirkii aad isaga ka haysatay, balse ha u oggolaan in uu kaa qaado dabeecaddii wanaagsanayd ee adiga kuu ahayd astaantaada. Ugu danbayn nolosha waa fududahay markaad fahamto, balse waa adag tahay markaad fududaysato, nabad ahow jaalle. Codsi tiktok mudana waa lagu dhegen-yahay, 16,200 iyo 300 ayuu dhaafi la-yahay, repostiga la dhaca jaalle. Naabd ahaada jaallayaal. ✍️Ali Heemaal.

Ali Heemaal ✪

Open In TikTok:

Region: SO

Tuesday 07 July 2026 19:03:05 GMT