@elmarpiriyev_60_: Baş verənlər Əli Kərimliyə qarşı fiziki işgəncə deməkdir AXCP sədrinin hüquqlarını müdafiə komitəsi İlham Əliyevi məsuliyyətli olmağa çağırdı 2025-ci ilin noyabr ayından saxta ittihamla Dövlət Təhlükəsizlik Xidmətinin təcridxanasında saxlanılan AXCP sədri Əli Kərimliyə qarşı təzyiqlər davam edir. Artıq 1 aya yaxındır ki, onun saxlanma şəraiti daha da ağırlaşdırılıb, ailə üzvləri ilə əlaqə saxlamaq, gündəlik informasiyalarla tanış olmaq imkanları, hətta açıq havada gəzinti hüququ da məhdudlaşdırılıb. Ən çox narahatlıq doğuran isə onun bu müddətdə ciddi psixi problemləri olduğu və terrorçuluq ittihamı ilə həbs edildiyi deyilən bir dustaqla eyni kamerada saxlanılmasıdır. Belə ki, artıq geniş ictimaiyyətə bəlli olduğu kimi, həmin dustaq gecələr hay-küy salaraq, Əli Kərimlinin yatmasına imkan vermir. Beləliklə, deyə bilərik ki, Əli Kərimli 1 aya yaxındır faktiki yuxusuz vəziyyətdədir. Bu isə ona qarşı təkcə psixoloji deyil, həm də fiziki işgəncəyə yol verilməsidir. Əli Kərimliyə qarşı təcridxanada yaradılan dözülməz vəziyyət barədə məlumatlar bu müddətdə hətta ölkə sərhədlərini də aşaraq, beynəlxalq səviyyədə yayılıb, AŞPA kimi mötəbər tribunada səsləndirilib. Bu miqyasda rezonansdan sonra da Əli Kərimliyə yaradılan qanunsuz çətinliklərin aradan qaldırılmaması, xüsusən də onu yatmağa qoymayan dustağı onunla eyni kamerada saxlamağa davam etmək deməyə əsas verir ki, bütün bu addımların sifarişi ən yüksək səviyyədə verilib. Məqsəd Əli Kərimlini fiziki və psixoloji cəhətdən tükəndirmək, bununla ondan qisas almaqdır. Eyni zamanda, guya gecələr "özündə olmayan" həmin psixi problemli dustaqdan istifadə edilməklə Əli Kərimliyə qarşı hər hansı təxribatın törədilməyəcəyinə də heç bir təminat yoxdur. Bu baxımdan, Əli Kərimlinin təhlükəsizliyi ilə bağlı risklərin mövcudluğu da ayrıca narahatlıq doğurur. Müdafiə Komitəsi bütün bunları nəzərə alaraq, aidiyyəti qurumlardan vəziyyətə təcili müdaxilə etməyi, Əli Kərimlinin saxlanma şəraitinin normallaşdırılması və təhlükəsizliyinin təmin olunması üçün təcili tədbirlər görməyi tələb edir. Müdafiə Komitəsi bəyan edir, hazırda Əli Kərimlinin sağlıq durumu və təhlükəsizliyi ilə bağlı bütün məsuliyyət həm də birbaşa ölkə rəhbəri İlham Əliyevin üzərindədir. Əli Kərimliyə qarşı dözülməz münasibətə təcili son verilməsə, deməli, şəxsən İlham Əliyevin onunla bağlı təhlükəli planları və göstərişi var. Müdafiə Komitəsi Azərbaycan hakimiyyətini və şəxsən İlham Əliyevi məsuliyyət hissini tam itirməməyə, Əli Kərimliyə qarşı faktiki işgəncəni durdurmağa və ümumiyyətlə, onu yubanmadan azad etməyə çağırır.

elmarpiriyev_60_

Open In TikTok:

Region: AZ

Tuesday 07 July 2026 19:42:55 GMT