كعدت الصبح جسمي مكسر من تعب البارحة بس گلبي مرتاح وراسي بارد . أباوع لـ ريــف نايمة بصفي وشعرها نازل على وجهها . مديت أيدي وخرت خصلة من شعرها * أتنفس ريحتها الي تردلي عافيتي . حَسن : يابعد طوايفي وعشيرتي نومتچ عافية . تحركت بـ فراشها وفتحت عيونها بـ ثگل أبتسمت من شافتني بوجهها . ريــف : صباح الخير يا أبو بيتي . صباح العافية على عيونچ . گمت غسلت وبدلت هدومي طلعت للحوش لگيت عمة فضة گاعدة تتريگ . عمة فضة : هلا يمة حَسن تعال تريگ گبل لا تروح للگاع . گعدت يمها وبست راسها * الله يخليچ النه خيمة يا عمة . سمعت صوت سالم يصيح من باب الشارع عرفته أجة ياخذني . طلعتلة ولگيته واگف ومبتسم كالعادة وجهه ما تفارگه الضحكة . سالم : ها أبو لُـولو نمشي ؟ الگاع تتانينا والزرع يريد ماي . توكلنا على الله . مشينا للگاع نسولف ونضحك وصلنا وبدينا نشتغل بالشمس . تعب وعرگ بس أحس روحي خفيفة وكل ضربة مسحاة تطلع هموم السنين . مسحت گصتي بطرف يشماغي * سالم : عاشت أيدك خوية شغلك معدل چنك فلاح أبن فلاح . البركة بيك وبـ تعليمك الي يا خوية . خلصنا شغل العصر ورجعنا للبيت هلكانين أول ما طبيت للحوش . شفت ريــف شايلة لُـولو وتلعبها وتضحك بصوت عالي . كل تعبي راح تبخر چأنه ماكو . تقربت يمهم وحضنتهم أثنينهم * وبست لُـولو بـ گصتها . حَسن : أفييييش يا أطـيب ريحة اشتميتهه . ريــف : يعطيك العافية يا سندنا . عافيتي أنتم وماكو غيركم . صار الليل والتمينا بـ الحوش الجو چان بي برودة حلوة وصوت ضحكنا تارس المكان . گعدت أشرب چاي من أيد ريــف * أباوعلها شلون تسولف وي عمة فضة ومرتاحة .. الخوف راح من عيونها . أندگ الباب ودخل سالم يضحك وبـ أيده صينية . سالم : يا هلا بـ أهل الديرة أمي دزت هالعشة تگول لا تخلون ريــف تتعب اليوم . گمت أخذت الصينية منه وتلگيته بـ هلا * عاشت أيدها للوالدة وما قصرت يا خوية سالم . سالم : تعبك راحة يا أبو لُـولو أكلوا بـ العافية وأني أترخص وراي گعدة بـ المضيف . گعدنا ناكل وأحس اللگمة بيها طعم ثاني طعم الأمان الي غاب عنا فترة طويلة . لُـولو نامت بـ حضن عمة فضة شلتها بـ هدوء ودخلتها للـ غُرفة . ريــف لحگتني وگفت يم الچرباية تباوع للـ بنية وتتبسم . تقربت يمها وحاوطت خصرها بـ أيدية * بـ شنو صافنة يا أم بيتي ؟ ريــف : صافنة بـ رحمة الله شلون چنا خايفين وشاردين وهسة أحنا بـ نص أهلنا . ربچ ما ينسى المظلوم وأحنا نيتنا صافية وربچ جازانا بـ هـ النعمة . حطت راسها على صدري وجرت نفس بـ راحة * ريــف : أنت النعمة يا حَسن لولاك أني هسة ميتة قهر وذل . أششش ما أريد أسمع طاري الخوف أحنا هسة بدينا نعيش ، وعمرنا الجاي كله أفراح . طفت الـ ضوة وتمددنا وعيني ما غمضت ، بس أباوعلهم وأحمد الله . #fyp #foryou #fypシ゚ #pppppppppppppppp #viral - @.a..191