အုန်းလတ်ကို မြင်းလုပ်စီးတဲ့ခေတ်က ရိုးသားတဲ့တခေတ်မှာ ကျန်ခဲ့ပြီ ငါ့ညီ မြန်မာနိုင်ငံမှာ လူဖြစ်လာတာ တို့ဟာ အတူတူပဲ အရပ်လက်သည်နဲ့ မွေးရတာ တို့ဟာ အတူတူပဲ ။ ဒါပေမယ့် ဆဲရေးတိုင်းထွာခံရပုံခြင်း မီးကိုကိုင်တွယ်ရပုံခြင်း ယဉ်ကျေးရပုံခြင်း ငါတို့ မတူဘူး အငယ်ကောင် ။ ကိုယ်ထူကိုယ်ထ စနစ်မှာ သုညကိုတောင် မူးကြေးမက်ကြေးပေးရတယ် မိဘတွေမြင်စေချင်တဲ့ ဘွဲ့ရဓာတ်ပုံ နွံထဲက မထွက်နိုင်ဘူး ။ ပညာတတ်တွေ ဦးဆောင်တဲ့ခေတ် ဒီပလိုမာတွေ ပလူပျံတဲ့ခေတ် သင်ပုန်းကြီးကျေရုံလောက်နဲ့ လူတောမတိုးတော့ဘူး ငါ့ညီ ။ လောကဟာ ဆင်ခြေဆင်လက်တွေ များတယ် ဘာပဲဖြစ်ဖြစ် သမိုင်းစာမျက်နှာကို ငါ့ညီ ရေးရမယ် မီးဖိုချောင်ထဲက ထမင်းလုံးငိုသံကို ငါတို့ တော်လှန်ရမယ် ။ နိုင်ငံတော်ကို အလုပ်အကျွေးပြုဖို့ စိတ်ကူးရှိသလား အငယ်ကောင် တို့မိသားစုအရေးဟာ တို့နိုင်ငံရေးပဲ ဆင်းရဲနွမ်းပါးခြင်းဟာ တို့ပြည်သူလူထုပဲ ရရာလက်နက်စွဲကိုင်ပြီး ငါတို့ ကယ်တင်ရမယ် ဒါဟာ နိုင်ငံတော်ကို တစိပ်တဒေသ အလုပ်အကျွေးပြုခြင်းပဲ ။ ဂလိုဘယ်လိုက်ဇေးရှင်းဆိုတာ သူဖုန်းစားအချင်းချင်းပဲ စာနာတတ်တာကြီးပါ မင်းရဲ့ ဆာလောင်ငတ်မွတ်တဲ့ ဒဏ်ကို ဘယ်သူကမှ ဝေယူခံစားမှာ မဟုတ်ဘူး ။ အငယ်ကောင်ရေ တို့အဖေက "နွားဖြစ်ချင်ရင် ငါ့ကိုကြည့်"တဲ့ ဆန်အိုးခြစ်သံနဲ့ ယဉ်ပါး မျက်ရည်မကျနိုင်တော့တဲ့ နွားမကြီးဟာ ငါတို့ရဲ့ ရွှေမြင်းမိုရ်ကြီးပေါ့ကွာ ။ ကျေးဇူးတရားကို သိတတ်ရုံနဲ့ကျေးဇူးမကျေဘူး အလျော် အစား မကင်းတဲ့ အင်္ကျီကို ငါတို့ ဝတ်ဆင်ထားရပေါ့ (၃၁)ဘုံမှာ ကိုယ့်လိပ်ပြာကိုယ်လုံရမယ် ငါ့ညီ ။ လမ်းတွေက များလိုက်တာ လူတွေဟာ မြစ်လိုဟိန်းဟောက် နေ့တဓူဝ အနိဌာရုံတွေနဲ့ ပျားပန်းခတ်နေတဲ့ ကမ္ဘာ တို့ဟာ ရေကြည်ရာ မြက်နုရာ *လူသားလင်းပိုင်တွေပါ* ။ #တည်မြဲလွင် #ဘဝစာပေ #foryourpage #fypppppppppppppp #မူရင်းစာရေးသူအားcrdပေးပါတယ်ဗျ - @htetlinkyaw250