Манас шаарынын тургуну — 38 жаштагы Махлиё Батирходжаева Чаткал районуна караштуу Каныш-Кыя айылына келин болуп келгенине быйыл 19 жыл толду. Ал райондо унаалардын түрүн оңдогон жалгыз моторист айым десе болот. Аны менен Turmush басылмасынын кабарчысы маектешти. Махлиё Батирходжаева жолдошу Айбек Бексариевдин жумушун карап отуруп, автоунаа оңдоону үйрөнүп алган. Жубайлар аталган айылда үйүнүн короосуна унаа оңдоочу чакан жай ачкан. Махлиё айымдын өзүнүн кардарлары бар. Махлиё Батирходжаева Манас шаарында туулуп-өскөн. Ал жаштайынан эле өзү техникага кызыгып, атасынын жанында жүрчү, бирок унаа оңдоого аралашкан эмес. Жолдошу Айбек Бексариевге турмушка чыккандан соң унаа ондоого болгон кызыгуусун ишке ашыра алган. «Жаңы баш кошконбуз, анда Манаста жашачубуз. Ал унаа оңдойт, мен жанында ага сүйлөп берем, анча-мынча тетиктерин алып келип берем. Ошентип отуруп көз менен унаа оңдоону өзүмө сиңирип алыптырмын. Бир күнү жолдошумдун иши чыгып калды, бул жакта болсо унаасын оңдоо керек дегендей. Анын үйдө жоктугунан пайдаланып, "Audi" унаасынын амортизаторун алмаштырып салдым. Ага жардам бергим келди. Экинчиси, өзүмдүн кызыгуум болду. Жолдошум бир чети таң калып, бир чети кубанып, жанындагыларга, тааныштарына чейин айтып кубанды. Катарынан көз жаргандыктан унаа оңдоодон бир аз алыстадым. Акыркы 5 жылдан бери кайра аралашып калдым», - дейт каарманыбыз. Анын айтымында, Чаткал районунда «Жигули», «Нива», «Нексия» сыяктуу унаалар көп. Унааларды оңдоо женил болуп калды. Негизинен унаалардын моторлорун оңдоого басым жасайт. Жакында эле «Range Rover» унаасын оңдогон. Электрдик унааларга кызыгып жүрөт. Жолдошунун, өзүнүн өз кардары бар. Ал эми унаа оңдоодо бааны жолдошу коет. «Жолдошум кубаттагандыктан унаа оңдоп жатам да. Адегенде ал келген ар бир унаага бир көз салат, баасын коюп берет. Кээде унаага бааны кымбат коюп коюшум мүмкүн. Ошого жолдошум канча сомго оңдолоорун өзү карап айтат. Бирок тапкан тыйыныма киришпейт. Каражатты балдарга, үйгө азык-түлүккө жумшайбыз. Чоң балам да бизге жардамдашып калды. Анын өзүнүн кызыгуусуна койдук. Ал да өз алдынча унаа оңдоп чыгарып калды», - деди ал. Махлиё Батирходжаева шаарга караганда айылдын жашоосу жакканын айтат. Жолдошунун айылдан шаарга кайтуу демилгесин колдогон эмес. «Өзүм шаарда чонойдум, бирок мага айылдын жашоосу жакты. Таза аба, корооң кенен, балдарың да ээн-эркин ойношот. Бишкек, Ош шаарларында да батирлер жашадык, кыйналдык. Шаарга барып калсам, кайра эле айылга келгени шашам. Анан ушул айылда чоңоюп, мектепти бүтүп шаарга кетишип, кайра келгиси келбеген, өзүн шаардык сезгендер мени таң калтыра берет», - дейт ал. Айбек Бексариев жубайына дем берип, колдоп келет. «Башта кызыгуусун колдодум, бирок шаар жергесинде унаа оңдоого аралаштыргым келген жок. Өзүмчө жай ачканда каалагандай аралашып көрөсүн дегем. Азыр ошондой мүмкүнчүлүк түзүп алдык. Анын өзүнүн кардарлары бар, ага мен аралашпайм», - дейт жолдошу. Жубайлардын 8 баласы бар, улуусу 17 жашта. - @turmush.kg_