ម្ចាស់សិប្បកម្មផលិតសាប៊ូ លាតត្រដាងពីការលំបាកដែលត្រូវឆ្លងកាត់ក្រសួងចំនួន ៩ និងនាយកដ្ឋានចំនួន ១៤ ទម្រាំបើកដំណើរការបាន នៅថ្ងៃទី០៨ ខែកក្កដា ឆ្នាំ២០២៦ ម្ចាស់សិប្បកម្មម្នាក់បានបង្ហោះសារលម្អិតនៅលើបណ្តាញសង្គម ដោយរំលេចពីនីតិវិធីរដ្ឋបាលដ៏ស្មុគស្មាញ និងការរត់ច្បាប់ទម្លាប់តាមស្ថាប័នរដ្ឋជាច្រើន ទម្រាំអាចបើកដំណើរការសិប្បកម្មផលិតសាប៊ូមួយបានដោយស្របច្បាប់។ ម្ចាស់សិប្បកររូបនេះបានបង្ហើបឱ្យដឹងពីតថភាព និងបទពិសោធន៍ផ្ទាល់ខ្លួនដូចខាងក្រោម៖ ដើម្បីបើកសិប្បកម្មផលិតសាប៊ូមួយ ម្ចាស់អាជីវកម្មត្រូវឆ្លងកាត់ការសុំច្បាប់អនុញ្ញាតពី ក្រសួងចំនួន ៩ និងនាយកដ្ឋានចំនួន ១៤។ ជាមួយគ្នានេះ សុពលភាពនៃលិខិតបទដ្ឋានគតិយុត្តិខ្លះ តម្រូវឱ្យមានការបង់ប្រាក់ជារៀងរាល់ ១ខែ, ៣ខែ, កន្លះឆ្នាំ, ១ឆ្នាំ, ៣ឆ្នាំ, ៥ឆ្នាំ, ១០ឆ្នាំ ឬខ្លះទៀតមានសុពលភាពមួយជីវិត។ លោកបានកត់សម្គាល់បែបស្រពិចស្រពិលថា ទោះឆ្លងកាត់ច្បាប់ទាំងអស់នេះហើយ ក៏នៅមិនទាន់សង្ឃឹមថាគ្រប់គ្រាន់នៅឡើយដែរ។ បញ្ជីក្រសួង និងស្ថាប័នដែលត្រូវឆ្លងកាត់៖ ផ្នែកក្រសួង ៖ - ក្រសួងមហាផ្ទៃ៖ នាយកដ្ឋានអត្តសញ្ញាណកម្ម និងអាជ្ញាធរដែនដី (ភូមិ ឃុំ សាលាក្រុង) - ក្រសួងយុត្តិធម៌៖ ផ្នែកមេធាវីធ្វើឯកសារផ្លូវការ - ក្រសួងដែនដី៖ ច្បាប់សាងសង់រោងជាង និងសំណង់ - ក្រសួងបរិដ្ឋាន៖ ច្បាប់វាយតម្លៃផលប៉ះពាល់ និងអនាម័យ - ក្រសួងសុខាភិបាល៖ ច្បាប់ផលិត និងចុះបញ្ជីផលិតផល -ក្រសួងសេដ្ឋកិច្ច និងហិរញ្ញវត្ថុ៖ អគ្គនាយកដ្ឋានពន្ធដារ (ចុះបញ្ជីបង់ពន្ធ), គណនេយ្យស្តង់ដារ និងអគ្គនាយកដ្ឋានគយ (ការនាំចូលវត្ថុធាតុដើម និងឧបករណ៍) - ក្រសួងពាណិជ្ជកម្ម៖ ការចុះបញ្ជីក្រុមហ៊ុន - ក្រសួងការងារ៖ ចុះបញ្ជីបុគ្គលិក និងបង់សោធននិវត្តន៍ (ប.ស.ស) - ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍៖ ច្បាប់បើកសិប្បកម្ម, ចុះបញ្ជីផលិតផលគ្រប់មុខ, វិទ្យាស្ថានស្តង់ដារ និងការពិនិត្យគុណភាពផលិតផល ស្ថាប័នផ្សេងទៀត ៖ -សភាពាណិជ្ជកម្មកម្ពុជា (ស្នើសុំបាកូដ) ព្រមទាំងច្បាប់ទម្លាប់ពាក់ព័ន្ធនឹងសំរាម, អគ្គិសនី, ទឹកស្អាត, ប្រព័ន្ធលូបង្ហូរទឹកស្អុយ, ផ្នែកអគ្គិភ័យ និងផ្នែកសន្តិសុខសណ្តាប់ធ្នាប់ពីថ្នាក់ស្រុក ខេត្ត រហូតដល់ក្រសួង។ ម្ចាស់សិប្បកម្មរូបនេះបានបន្ថែមថា ឱ្យតែភ្លេចច្បាប់ ឬឯកសារណាមួយ គឺនឹងត្រូវប្រឈមមុខនឹងបញ្ហា ឬត្រូវគេហៅទៅណែនាំ និងសម្រួលឯកសារឡើងវិញភ្លាម។ ទោះបីជាមានភាពនឿយហត់ និងស្មុគស្មាញយ៉ាងណាក៏ដោយ ម្ចាស់សិប្បកររូបនេះបានសម្តែងការដឹងគុណដល់រាជរដ្ឋាភិបាលដែលបានគិតគូរពីសុខមាលភាពរបស់ប្រជាពលរដ្ឋ។ លោកបានលើកទឹកចិត្តខ្លួនឯង និងអ្នកដទៃថា មិនត្រូវធ្វើតាមអារម្មណ៍ឡើយ គឺត្រូវអនុវត្តតាមបទដ្ឋាន និងច្បាប់ទម្លាប់ឱ្យបានត្រឹមត្រូវ ដើម្បីថ្ងៃនេះ និងអនាគត។ លោកក៏បានអំពាវនាវឱ្យមានការរួមគ្នាដើម្បីប្រទេសជាតិ ដោយសង្កត់ធ្ងន់ថា «មានតែការផលិតក្នុងស្រុកទេ ទើបអាចធ្វើឱ្យប្រទេសជាតិរឹងមាំពិតប្រាកដ»។ #ធុរកិច្ច #ពាណិជ្ជកម្ម #ការិយាលធិបតេយ្យ #រកស៊ី #សិប្បករ - @ra.naa7