@rasheedotp6: ഫിഫ ലോകകപ്പ് 2026-ന്റെ ആവേശകരമായ ക്വാർട്ടർ ഫൈനൽ പോരാട്ടങ്ങൾക്കു തുടക്കമായെങ്കിലും കായിക വിപണിയെ ഞെട്ടിച്ചുകൊണ്ട് ടിക്കറ്റ് നിരക്കുകളിൽ വൻ ഇടിവ്. ടൂർണമെന്റിലെ ഏറ്റവും വലിയ വാണിജ്യ ആകർഷണമായ ക്രിസ്റ്റ്യാനോ റൊണാൾഡോയുടെ പോർച്ചുഗലും ആതിഥേയ രാജ്യമായ യു.എസ്.എയും പ്രീക്വാർട്ടറിൽ തോറ്റ് പുറത്തായതാണ് ടിക്കറ്റ് വിപണിയിൽ പെട്ടെന്നുള്ള തകർച്ചയ്ക്ക് കാരണമായതെന്ന് 'ഫോബ്സ്' റിപ്പോര്‍ട്ട് ചെയ്തു. കൺസ്യൂമർ ഡിമാൻഡ് കുത്തനെ ഇടിഞ്ഞതോടെ സെക്കൻഡറി ടിക്കറ്റ് റീസെയിൽ മാർക്കറ്റുകളിൽ ടിക്കറ്റ് നിരക്കുകൾ 60 ശതമാനത്തോളം കുറച്ചിട്ടും വാങ്ങാൻ ആളില്ലാതെ ഏകദേശം 49,500 ഓളം ടിക്കറ്റുകളാണ് വിപണിയിൽ കെട്ടിക്കിടക്കുന്നത്. ആഗോള ടിക്കറ്റ് വിപണിയിലെ പ്രമുഖ പ്ലാറ്റ്ഫോമുകളായ 'ടിക്ക്പിക്ക്', 'സീറ്റ്പിക്ക്' എന്നിവയാണ് പുതിയ കണക്കുകൾ പുറത്തുവിട്ടത്. 41-ാം വയസ്സിൽ തന്റെ കരിയറിലെ അവസാന ലോകകപ്പ് കളിച്ച ക്രിസ്റ്റ്യാനോയെ കാണാൻ ലോകമെമ്പാടുമുള്ള ഫുട്‌ബോൾ ആരാധകരാണ് അമേരിക്കയിലേക്ക് ഒഴുകിയെത്തിയിരുന്നത്. എന്നാൽ, റൗണ്ട് ഓഫ് 16-ൽ സ്‌പെയിനിനോട് തോറ്റ് പോർച്ചുഗൽ പുറത്തായതോടെ റൊണാൾഡോയുടെ ലോകകപ്പ് യുഗത്തിന് വിരാമമായി. താരം പുറത്തായതോടെ അന്താരാഷ്ട്ര ആരാധകരും പോർച്ചുഗൽ ആരാധകരും നോക്കൗട്ട് മത്സരങ്ങൾ കാണാൻ നിൽക്കാതെ നാട്ടിലേക്കു മടങ്ങിയതായാണ് റിപ്പോർട്ട്. ഇതിന് പുറമെ ആതിഥേയരായ യു.എസ്.എ പ്രീക്വാർട്ടറിൽ ബെൽജിയത്തോട് കനത്ത പരാജയം ഏറ്റുവാങ്ങിയതോടെ അമേരിക്കൻ ആരാധകരും ലോകകപ്പിൽനിന്നും പിന്നോട്ടുവലിഞ്ഞതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. മുൻകൂട്ടി വലിയ വിലയ്ക്ക് ടിക്കറ്റുകൾ വാങ്ങിവച്ചിരുന്ന അമേരിക്കൻ ആരാധകർ തങ്ങളുടെ ടിക്കറ്റുകൾ കൂട്ടത്തോടെ റീസെയിൽ മാർക്കറ്റിൽ വിൽക്കാൻവച്ചു. ടൂർണമെന്റ് ആരംഭിച്ച ജൂൺ 11-ന് വിപണിയിൽ റീസെയിലിനായി വെറും 28,300 ടിക്കറ്റുകൾ മാത്രമുണ്ടായത് നിലവിൽ അരലക്ഷത്തിനടുത്ത് എത്തി. ടിക്കറ്റ് റീസെയിൽ മാർക്കറ്റിൽ ഏറ്റവും വലിയ വിലത്തകർച്ച നേരിട്ടത് കാലിഫോർണിയയിലെ സോഫി സ്റ്റേഡിയത്തിൽ നടക്കാനിരിക്കുന്ന സ്‌പെയിൻ-ബെൽജിയം ക്വാർട്ടർ ഫൈനൽ മത്സരത്തിനാണ്. ഈ മത്സരത്തിനുള്ള ഏറ്റവും കുറഞ്ഞ പ്രവേശന ടിക്കറ്റ് നിരക്ക് കഴിഞ്ഞ ദിവസങ്ങളിൽ ഏകദേശം 2,950 യു.എസ് ഡോളർ (ഏകദേശം 2.45 ലക്ഷം രൂപ) ആയിരുന്നു. എന്നാൽ, പോർച്ചുഗലിന്റെയും അമേരിക്കയുടെയും പുറത്താകലിന് പിന്നാലെ ഇത് 1,200 ഡോളറായി (ഏകദേശം ഒരു ലക്ഷം രൂപ) കുത്തനെ ഇടിഞ്ഞു. അർജന്റീന-സ്വിറ്റ്‌സർലൻഡ് മത്സരത്തിനും ടിക്കറ്റ് നിരക്കുകളിൽ വലിയ തോതിലുള്ള കുറവ് വന്നിട്ടുണ്ട്. ലയണൽ മെസ്സി തുടരുന്നത് മാത്രമാണ് ഇപ്പോൾ ടിക്കറ്റ് വിപണിയെ പൂർണ തകർച്ചയിൽനിന്നു താങ്ങിനിർത്തുന്നത്.

ℝ𝕒𝕤𝕙𝕖𝕖𝕕☑️

Open In TikTok:

Region: AE

Friday 10 July 2026 16:14:27 GMT