@imranalikhosa22: هاڻي وسڪاري جا ڏينهن پنهنجي اصل موسم تي اچي رهيا آهن. جيئن ته جولاءِ مهيني جي شروعاتي هفتي ۾ محبوب مونسون پنهنجون سهڻيون يادون، ٿڌڙيون هوائون ۽ رحمت ڀريا ڪڪر کڻي ٿرپارڪر ۾ پهچڻ وارو آهي. ٿر جا ماروڙا هر سال وانگر هن ڀيري به بيچيني سان مونسون جي آمد جا منتظر آهن. سندن اکيون آسمان ۾ کتل آهن، دلين ۾ اميدن جا ڏيئا روشن آهن ۽ زبانن تي رڳو هڪ ئي دعا آهي ته رب پاڪ پنهنجي رحمتن جي برسات وسيع انداز ۾ نازل فرمائي. جيڪي منهنجا پيارا پرين پرديس ۾ رهن ٿا، هو به هن موسم جو نالو ٻڌندي ئي پنهنجي ديس ۽ پنهنجي مٽيءَ کي ياد ڪرڻ لڳن ٿا. هوٽلن، بنگلن ۽ شهرن ۾ مزدوري ڪندڙ منهنجا ٿر واسي جڏهن برساتن جون خبرون ٻڌن ٿا ته سندن دلين ۾ پنهنجي ڳوٺ، پنهنجي ٻني ۽ پنهنجي ماروئڙن سان ملڻ جي تڙپ جاڳي پوي ٿي. ڪيترائي ته موڪل وٺي پنهنجي اباڻي ديس ڏانهن رخ ڪندا آهن، ڇو ته ٿر جي وسڪاري جهڙي خوشي دنيا جي ڪنهن به آسائش ۾ نه ٿي ملي. اسين ٿر واسي تڏهن عيد ڪندا آهيون جڏهن "وٺي" جون واڌايون ملنديون آهن. اهو ڏينهن اسان ماروڙن لاءِ ڪنهن وڏي عيد کان گهٽ نه هوندو آهي. جڏهن آسمان تي ڪارا ڪڪر ٽهڪ ڏيندا آهن، جڏهن وڄون چمڪنديون آهن، جڏهن ڪڪر ڪوڏ ڪري ٿر جي ڀٽن تي اوهيرا ڪندا آهن ۽ ملهاريون وسڻ شروع ٿينديون آهن، تڏهن هر چهري تي خوشي، سڪون ۽ شڪرگذاري جا رنگ نظر ايندا آهن. مينهن جي پهرين ڦڙي سان ئي سڪل ڌرتي جي سيني مان هڪ عجيب خوشبوءِ اڀرندي آهي، جيڪا هر ٿر واسي جي دل کي موهي وجهندي آهي. ٿر جون ڀٽون، جيڪي مهينن کان سج جي تپش برداشت ڪري رهيون هونديون آهن، سي به ڄڻ خوشيءَ مان مرڪڻ لڳنديون آهن. واريءَ جا دڙا، جهنگلي ٻوٽا، پکين جا ولر ۽ مال چاريندڙ ڌڻ سڀئي ڄڻ مونسون جي آمد جو جشن ملهائيندا آهن. مينهن وسندي ئي منهنجي ٿر جا محنتي ماروڙا هر، پانڃاري ۽ ٻج کڻي پنهنجي ٻنين جو رخ ڪندا آهن. سڄو ڏينهن سخت محنت سان کيڙي ڪندا آهن، ٻج ڇٽيندا آهن ۽ سونهري مستقبل جا خواب ڏسندا آهن. شام جو جڏهن هو ٻنين مان موٽندا آهن ته کنبيون چونڊيندي، وسڪاري جون ڳالهيون ڪندي ۽ ايندڙ سٺي فصل جون اميدون دل ۾ سانڍيندي پنهنجن گهرن ڏانهن روانا ٿيندا آهن. انهن جي چهري تي موجود خوشي ۽ اطمينان ڪنهن به دولت کان وڌيڪ قيمتي هوندو آهي. وسڪاري جي موسم ٿر لاءِ صرف برسات جو نالو ناهي، پر اها زندگيءَ جي واپسي جو اعلان هوندي آهي. اها موسم خوشحالي، ساوڪ، اميد ۽ محبت جو پيغام کڻي ايندي آهي. ٿر جا کوهه آباد ٿيندا آهن، چراگاهه سرسبز ٿيندا آهن، مال متارو ٿيندو آهي ۽ هر طرف زندگي جا نوان رنگ پکڙجي ويندا آهن. اچو ته سڀ گڏجي دعا ڪريون ته رب پاڪ هن سال ٿرپارڪر تي پنهنجي خاص رحمت فرمائي، ڀرپور برساتون عطا ڪري، هر ٻني کي ساوڪ بخشي، هر کوهه کي پاڻي سان ڀري ڇڏي ۽ هر ٿر واسي جي منهن تي خوشين جي مرڪ قائم رکي. ٿر جي سونهن مونسون سان آهي، ۽ مونسون جي سونهن ٿر جي ماروئڙن سان آهي-ادس📝عمران کوسو🙏#foryoupage🙏100 #💔👍💔👍💔👍💔👍💔👍💔👍🙏✅🙏✅🙏✅🙏✅❣️❤️‍ #viral_video_foryoupage🙏 #fyppppppppppppppppppppppp #foziasoomro_sindhi_sad_status