صباح الخير بخصوص المقطع السابق وكثرة الأسئلة عن سبب وفاة أهلي، قررت أتكلم عن كل شيء يخص المقطع عائلتي كانت مكوّنة من أب وأم و3 أخوات وأخ وهو أكبر واحد فينا. في سنة 2018 طلع أبوي وأخوي سعود الله يرحمهم يستلمون شهادة تخرج أخوي من الثانوي، لكن قدر الله عليهم حادث مع وايت، وما رجع منهم إلا شهادة التخرج بعدها بقينا أنا وأمي وأثير وشهد، وكلنا مشخصين بأورام في الشريان ونوبات هلع. في سنة 2022 توفت أمي الله يرحمها بسبب الأورام الخبيثة، وبقينا أنا وشهد وأثير نكمل بيتنا اللي كان أبوي يبنيه، لكنه ما كتب الله له يكمله معنا. في سنة 2025 سافرت برا عشان أتعالج وأسوي العملية، وبنفس الفترة كانت شهد وزوجها وولدها متوجهين من الشرقية للرياض عشان يخلصون آخر شغلات بيتنا، لكن قدر الله عليهم حادث بالطريق، وتوفت شهد وولدها الله يرحمهم. أول ما وصلني الخبر رجعت من السفر، وأثير رجعت من بيت زوجها، واجتمعنا في بيتنا اللي كنا متخيلين بنفتتحه بفرحة اكتماله، لكن افتتحناه بعزا أختي وحبيبتي شهد وبعد يومين من العزا توفت أثير الله يرحمها بسبب كتمان الصدمه والخبر وما قدرت تتحمل خبر وفاة شهد لأنها كانت أكثر شخص متعلق فيها تقبلت الأخبار، لكن للحين ما أقدر أقول إني استوعبت كل اللي صار. وقفت دراستي ودوامي عشان أكمل جرعات علاجي، وبعد ما خلصت الجدول الأول ولله الحمد رجعت لدوامي، وكملت دراستي عند خالتي، وهجرت البيت والعالم بجميع اشكالهم تقريبًا 9 شهور بعد وفاتهم وفراق شخص عزيز وبعدها قررت أرجع للبيت، وأنظفه وأهتم فيه وأذكر الناس فيهم، مو عشان الشفقة، لكن عشان كل اللي يشوف مقاطعي يدعي لهم، ويمكن تكون لهم دعوة من شخص ما يعرفهم ترفع درجاتهم الله يرحم أبوي وأمي وأخوي سعود وأختي شهد وولدها وأختي أثير، ويجمعني فيهم بجنات النعيم. رجعت اكافح واحارب الورم بكل قوّتي ورجعت لدوامي وحياتي الحمدلله وأنا راضية كل الرضا بقضاء الله وقدره، والحمد لله على كل حال ولهم اماكن في الجنه افضل وافضل من الدنيا بكثير ربي رحمهم من كبر العمر وامراض الدنيا الحمدلله وراضيه اتم الرضى دام الله معي ❤️ - @sh_12wq