ئەگەر باوەڕ نەکەیت فیفا پشتگیری مێسی دەکات کەواتە هێشتا لە تۆپی پێ تێنەگەیشتووی! فیفا و یوفا هەمیشە پارێزگاری لە هێشتنەوەی ئەستێرەکان دەکەن بۆ ئەوەی زوو ماڵئاوایی لە پاڵەوانێتییەکان نەکەن. باوەڕ دەکەیت، ئەگەر ئەرجەنتین بەرامبەر میسر ماڵئاوایی لە مۆندیال کردبا، ئەو کۆمپانیایانەی سپۆنسەری مۆندیالن زیاتر لە 130 ملیار دۆلار زەرەریان دەکرد. ئەمە قسەی من نییە، قسەی کەناڵی تەلەڤزیۆنی فۆکس نیوزی ئەمریکییە کە لە ژێرەوە دۆناڵد ترەمپی سەرۆکی ئەمریکا سپۆنسەری ئەو کەناڵە دەکات. باوەڕ دەکەیت، فیفا پلانی دانا بوو بۆ ئەوەی پۆرتوگال و ئەرجەنتین لە یاریی کۆتایی یان لە پێشکۆتایی مۆندیال رووبەڕووی یەکتر ببنەوە، بەڵام پۆرتوگال هیچی بە هیچ نەکرد، ئەگەر ئەو پلانە سەری گرتبا، مێسی و کریستیانۆ لەم مۆندیالە رووبەڕووی یەکتربانەوە، کۆمپانیایەکان ملیاران دۆلاریان قازانج دەکرد. بێنە بەر چاوی خۆت، ئەگەر مێسی هاوشێوەی کریستیانۆ زوو ماڵئاوایی کردبا، کێ تاقەتی هەبوو سەیری یارییەکانی مۆندیال بکات، دەبوو بلیتی یارییەکان هەرزانفرۆش کرابا، بەڵام فیفا رێگەی نەدا ئەو سیناریۆیە رووبدات. باوەڕ دەکەیت، ناوبژیوانەکان لە لایەن فیفا راسپێردراون کە دەبێت نازی مێسی هەڵبگرن و لەنێو یاریگە بیپارێزن. تۆ سەیر بکە مێسی پەنجە لە ناوبژیوان ڕادەوەشێنێت، بەبێ ئەوەی ترسی لە هیچ شتێک هەبێت، لەم ساڵانەی دوایی مێسی زوو زوو هەڵدەچێت و بێمنەت دەردەکەوێت، چونکە لیۆ باش لەو هێزە بازرگانییە گەورە تێدەگات کە لە پشتییەتی و دەشزانێت لەنێو یاریگە پارێزگاری لە خۆی و هەڵبژاردەکەشی دەکرێت. تکایە ئەم بابەتە بە لێدان و ناشیرینکردنی مێسی لەسەرم حیساب مەکەن، تەنیا بۆ ئەوەیە بزانن لەم سەردەمە چ قومار و بازرگانییەک بە تۆپی پێ و یارییەکان دەکرێت. - @shakar.rovan