WARAKA WA WAZI: HAKI, UADILIFU NA HESHIMA YA MWISLAMU Alhamdulillahi Rabbil- Alamiyn. Rehema na amani zimshukie Mtume Muhammad ﷺ, ahli zake, maswahaba zake na wote wanaofuata uongofu mpaka Siku ya Malipo. Imenichukua muda mrefu kuandika waraka huu. Nimejitafakari sana kabla ya kuandika, kwa sababu najua uzito wa neno mbele ya Mwenyezi Mungu. Lakini mwisho wa tafakari yangu niliona kwamba nikikaa kimya wakati nafsi yangu inaona kuna jambo linahitaji kukumbushwa kwa haki na uadilifu, basi nitakuwa na dhima mbele ya Allah. Neno la haki linaposemwa kwa adabu na kwa ushahidi ni ibada, na kunyamaza pale haki inapohitaji kutetewa wakati mwingine huwa ni mzigo ambao mtu ataulizwa Siku ya Kiyama. Waraka huu haumaanishi kutangaza mtu hana makosa, wala haumaanishi kupinga taratibu za taasisi. Kusudio lake ni kukumbusha juu ya misingi ya Uislamu: haki, uadilifu, kuthibitisha habari, na kutohukumu kwa jazba. Allah (Subhānahu wa Ta'ala) amesema: "Enyi mlioamini! Akikujieni fasiki na habari, basi ichunguzeni vizuri, msije mkawadhuru watu kwa ujinga, mkaja mkajutia mlivyofanya." (Surat Al-Hujurāt 49:6) Na pia amesema: "Wala chuki ya watu isiwapelekee kuacha kufanya uadilifu. Fanyeni uadilifu; huo ndio ulio karibu zaidi na uchamungu." (Surat Al-Mā'idah 5:8) Waraka huu unamhusu Sheikh Waleed Al-Hadi Kawambwa, ambaye kwa siku za karibuni amekuwa akizungumzwa sana kutokana na madai yaliyosambaa na hatua zilizochukuliwa dhidi yake. Mimi si hakimu. Mimi si shahidi wa yaliyotokea. Na wala siandiki kuthibitisha madai wala kuyakanusha. Ninachohoji ni namna tunavyohukumu watu, namna tunavyosahau mema yao kwa kosa moja linalodaiwa au hata kabla halijathibitika. Ninajiuliza: Je, hakuna utaratibu wa haki unaopaswa kufuatwa? Je, hakuna nafasi ya kusikiliza pande zote? Je, kila anayetuhumiwa tayari amehukumiwa? Mtume Muhammad ﷺ amesema: "Muislamu ni ndugu wa Muislamu; hamdhulumu wala hamtelekezi." (Sahih al-Bukhari na Muslim) Pia amesema: "Kila mwanadamu ni mwenye kufanya makosa, na bora wa wenye kufanya makosa ni wanaotubu." (Sunan At-Tirmidhi) Hakuna mwanadamu mkamilifu isipokuwa Manabii. Sisi sote tunaishi kwa rehema za Allah, si kwa ukamilifu wetu. Na hapa ndipo ninaposhangaa. Nawauliza viongozi wa BAKWATA kwa heshima: Je, wote mlioshiriki katika maamuzi haya mnaweza kusimama mbele ya Allah mkasema hamjawahi kumuasi hata mara moja? Je, hakuna kati yenu mwenye madhambi ya siri ambayo Allah ameyafunika kwa rehema Zake? Je, kama Allah angeamua leo kufunua siri za kila mmoja wetu mbele ya umma, ni nani angebaki na heshima yake? Mtume ﷺ amesema: "Umma wangu wote watasamehewa isipokuwa wale wanaofanya madhambi hadharani." (Sahih al-Bukhari) Tunafurahia sana Allah anapotufunika sisi, lakini tunakuwa wepesi kuvua pazia la wengine. Hili ndilo jambo linaloumiza. Sheikh Waleed ameishi miaka mingi akihudumia jamii. Amefundisha. Amehubiri. Ameunganisha watu. Amevuta vijana wengi karibu na dini. Amejenga matumaini kwa watu wengi waliokuwa wamepoteza imani na taasisi ya BAKWATA. Kwa nini mema yote hayo yafutwe kwa kalamu moja? Allah amesema: "Na wala msisahau wema uliokuwa baina yenu." (Surat Al-Baqarah 2:237) Hata kama mtu amekosea, je, mema yake yote yanafutika? Historia ya Uislamu inatufundisha tofauti. Ka'b bin Malik رضي الله عنه alikosea katika Tukio la Tabuk. Lakini Mtume ﷺ hakufuta historia yake yote ya Uislamu. Alitengwa kwa muda kwa amri ya Allah, akatubu, Allah akamkubalia toba yake, na akabaki kuwa katika safu ya Maswahaba wakubwa. Mafunzo yake ni kwamba Uislamu haujengwi juu ya kuangamiza watu, bali kuwapa nafasi ya kurekebisha pale panapowezekana. Kwa wale wanaomjua Sheikh Waleed, wanajua kwa nini watu wengi wanampenda. Amejulikana kwa adabu. Amejulikana kwa hekima. Amejulikana kwa busara. Amejulikana kwa lugha ya heshima hata kwa wanaompinga. Amejulikana kwa kutowadharau wadogo wala kuwabembeleza wakubwa kwa maslahi binafsi. Si Waislamu pekee wanaomheshimu. Hata watu wa dini nyingine wamekuwa wakimheshimu kutokana na maadili yake ya kuishi na watu. Je, hayo yote hayana uzito wowote? Kama kweli kuna kosa, - @ammarruwehy