بقيت كاعدة بمكاني، انتظر الوقت يمر.. دقيقة ورا دقيقة. صارت الساعة بتلاثة الفجر، البيت صار بي هدوء يكتل، بس صوت شخير سرحان طالع من غرفته واصل للهول. كمت على حيلي، لبست عباتي السودة فوك ثوبي، ولفيت شيلتي زين. مديت ايدي جوه فراشي، طلعت چيس بي شوية فلوس چنت ضامتهن من زمان، بس هذن ما يكفن، ولا يكسرن ظهرهم. تذكرت صندوگ امي الحديد.. چانت ضامة بي سند البيت وشوية ذهب تعبها . وادري بسرحان ومهاب ملتهين بالعزا والمشاكل ونسوا سالفة الصندوگ، لأن چان مدفون جوه كنتورها وما يدرون بي. طلعت من غرفتي امشي حافية وعلى اطراف اصابعي، دخلت لغرفة امي.. ظلمة وريحة حنتها وياسها بعدها تفوح بيها. خنگتني العبرة ورادت تنزل دمعتي، بس بلعتها حيل.. مو وكت بچي هسة شذر، اذا بچيتي وضعفتي باچر تصبحين بحضن چاسب ! دنكت جوه الكنتور، سحبت الصندوگ بخفة، چان مقفول بس اعرف امي وين تضم المفتاح، جوه حاشية الزولية يم الجرباية. مديت ايدي وطلعته، فتحت القفل على كيفي وبدون صوت. لكيتهن ! السند چان موجود، وتراچي امي الذهب ومحبسها.. اخذتهن كلهن . السند سديتة وحطيته بصدري حيل، والذهب والفلوس بجيبي. رجعت الصندوگ لمكانه وسديت الكنتور. وگفت، باوعت للغرفة نظرة أخيرة، وطلعت للصالة. وكفت گدام غرفهم، وابتسمت بحقد، احس روحي ارتاحت شوية. شذر (بگلبي) : تردون تبيعوني لچاسب علمود البيت يصفالكم وتبيعونه ؟ چا خوش.. خل اشوف شلون تبيعون بيت وسنده مو يمكم، وشلون تلگوني حتى تزوجوني. طگوا روسكم بالحايط يا سرحان ويا مهاب. وصلت للباب الخارجي مال الحوش، فتحت السركي على كيفي.. چان الباب يزقزق . وگلبي دگاته وصلت لبلعومي خاف واحد منهم يفز. انفتح الباب، وطلعت بالشارع.. الهوى البارد ضرب بوجهي . چانت الدنيا هندس ولا بشر بالشارع، بس چلب ينبح من بعيد. سديت الباب وراي حيل على كيف، ومشيت بخطوات سريعة بالشارع المظلم، لزمت عباتي حيل بايدي، ما اعرف وين اروح ولا وين انطي وجهي بهالليل.. بس الأهم، خلصت من سجنهم. صرت امشي واركض، واتلفت وراي خاف واحد بيهم كعد وحس عليه ولحكني. تذكرت بيت خالي (راضي) بالولاية الثانية، صح هو رجال فقير وماعنده ذيچ السلطة، بس ما راح يسد بابه بوجهي.. المشكلة شلون اوصل لبيته وهسة الدنيا ليل والمحد موجود ؟ شذر : : اوصل لو زحف.. المهم ما ابقى جوة رحمتهم. وصلت لنهاية الفرع مالنه، وطلعت عالشارع العام.. چان فارغ ويخوف.. گعدت ورا حايط متهدم انتظر الصبح يطلع حتى أأجر سيارة واشرد بعيد عنهم.. وقصتي وياهم، توها بدت! #fyp #fypシ #ppppppppppppppppppppppp #fypシ゚viral #شعب_الصيني_ماله_حل😂😂 - @..a..232