@cuckoo2114: #ဆောင်။ ။ ခရီးသွားမည် ဂဗ္ဘိနီနှင့် မအီမကျန်း သဒ္ဓါစွမ်းကြောင့် ရဟန်းထံရင်း ရုတ်ချင်းပင့်ကာ လာတန်လာ၍ ၀ဿာဝါသိ ဒဿာမိဟု ဆိုဘိလှူဒါန်း ထိုသင်္ကန်း ခေါ်မှန်း အစ္စေကတည်း။ မြတ်စွာဘုရားရှင် သက်တော်ထင်ရှား ရှိစဉ်အခါက ဝါကျွတ်ခါနီးတွင် စစ်ထွက်သွားလိုသော စစ်သူကြီးသည် မိမိ၏ အသက်အန္တရာယ် စိုးရိမ်ရသည့်အတွက် စစ်ထွက်မသွားခင် ရဟန်းသံဃာများပင့်ဖိတ်၍ သင်္ကန်းလှူသည်ရှိသော် ရဟန်းသံဃာတော်တို့သည် အလှူခံသင့် မခံသင့် ၀ိနယကုက္ကုစ္စဖြစ်နေ၍ အလှူမခံသော် အမတ်ကြီးသည် ကဲ့ရဲ့လေ၏။ သီတင်းကျွတ်လဆန်း (၅) ရက်မှ (၁၄) ရက်ထိ လမပြည့်မီ (၁၀) ရက်အတွင်း စစ်ထွက်သွား - ခရီးသွားမည့်သူ၊ ကိုယ်ဝန်ဆောင်အမျိုးသမီး၊ မကျန်းမာသူ၊ ရုတ်တရက် သဒ္ဓါတရားပေါ်ပေါက်လာသူတို့က ကိုယ်တိုင်လာ၍ဖြစ်စေ၊ ရဟန်းကို ပင့်၍ ဖြစ်စေ “ဝဿာဝါသိကံ ဒဿာမိ - ဝါဆိုသင်္ကန်းကို လှူပါ၏” ဟု ပြောဆိုလှူဒါန်းသော သင်္ကန်းကို အစ္စေကစီဝရ - အဆောတလျှင် ရှောင်တခင် လှူဒါန်းသော အစ္စေကသင်္ကန်း - ဝါဆိုသင်္ကန်းဟု ခေါ်သည်။ အစ္စေကသင်္ကန်းကို ကထိန်အာနိသင် မရလျှင် သင်္ကန်းကာလဖြစ်သော သီတင်းကျွတ်လပြည့်နေ့မှ တန်ဆောင်မုန်းလပြည့်နေ့အထိ ၁ လသာ ထားရမည်။ ကထိန်အာနိသင်ရလျှင်ကား တပေါင်းလပြည့်နေ့ထိ ၅ လတိုင်တိုင် အဓိဋ္ဌာန် ဝိကပ္ပနာ မပြုပဲ သိမ်းထားနိုင်သည်။ ထို သင်္ကန်းကာလထက်လွန်၍ အဓိဋ္ဌာန်ဝိကပ္ပနာမပြုပဲ ထားလျှင်ကား နိဿဂ္ဂိပါစိတ် အာပတ် သင့်ပါသည်။ ကထိန်ခင်းခင်း မခင်းခင်း သီတင်းကျွတ်လပြည့်ကျော် ၁ ရက်နေ့မှစ၍ တပေါင်းလပြည့်နေ့အထိ ၅ လတွင်း၌ “ဝဿာဝါသိကံ ဒေမ - ဝါဆိုသင်္ကန်းကို လှူဒါန်းပါ၏”ဟု ဆို၍ လှူအပ်သည်ရှိသော် ထိုကျောင်းတိုက်တွင်း၌ ဝါမကျိုး မပေါက်ပဲ သီးတင်းသုံးပြီး ဝါကျွတ်သော ရဟန်းများ သာမဏေများသာ ပိုင်ဆိုင်ကုန်၏။ ဝါဆိုသင်္ကန်းကို ဝါမကျိုး မပေါက်သော သာမဏေတို့အားလည်း ရဟန်းတို့နှင့် အညီအမျှသာ ပေးဝေရမည်။ တပေါင်းလပြည့်ကျော် (၁) ရက်နေ့မှ သီတင်းကျွတ်လပြည့်နေ့ထိ (၇) လအတွင်း၌ “ဝဿာဝါသိကံ ဒေမ - ဝါဆိုသင်္ကန်းကို လှူဒါန်းပါ၏” ဟု ဆို၍ လှူဒါန်းလျှင် အတိတ်ဝါ နှင့် အနာဂတ်-ပစ္စုပ္ပန်ဝါ အဘယ်ဝါကို ရည်ညွှန်းသနည်းဟု သေချာမေး၍ အလှူခံရမည်။ အတိတ်ဝါကို ရည်ညွှန်းမှု အတိတ်က ဝါမကျိုးမပြတ် ဝါဆိုသွားခဲ့သော ရဟန်းတို့အား အပ်စပ်ပြီး အနာဂတ်နှင့် ပစ္စုပ္ပန်ကို ရည်ညွှန်းမူ အနာဂတ် ပစ္စုပ္ပန်တွင် ဝါဆို ဝါကပ်ကြမည့် ရဟန်းတို့အားသာ အပ်စပ်ပါသည်။ “အဝသေသေ ကထိနာနိသံသေ ဗလဝဝတ္ထာနိ ဝဿာဝါသိကဋ္ဌိိကာယ ဒါတဗ္ဗာနိ” ဟူသော (၀ိ၊ဋ္ဌ ၃၊ ၃၉၁။ ဝိ၊ သင်္ဂဟ။ ၃၀၀) တို့ကို ထောက်၍ ဝါဆိုသင်္ကန်း နှင့် ကထိန်အာနိသင် ပစ္စည်းတို့သည် တူသည့်သဘော ရှိကုန်၏။ ထိုသို့ အကျိုးတူသော သဘောရှိသော်လည်း #ဒါယကာတို့က “ကထိနစီဝရံ ဒေမ” ဟု ဆို၍ လှူဒါန်းလျှင် #ကထိန်သင်္ကန်းအဖြစ်သာ အလှူခံ၍ “ဝဿာဝါသိကံ ဒေမ” ဟု ဆို၍ လှူလျှင် အလှူခံရမည်။ သို့ဖြစ်ပါ၍ ဝဿဝါသိကစီဝရ - ဝါဆိုသင်္ကန်းသည် ဘုရားရှင် လက်ထက်တော်ကာလက သာဝတ္ထိပြည် စစ်ထွက်ခါနီး အမတ်ကြီး စတင်လှူဒါန်းသည်ကို အကြောင်းပြု၍ ဘုရားရှင် ခွင့်ပြုတော်မူချက်အရ ဝဿာဝါသိကစီဝရ - ဝါဆိုသင်္ကန်းဟု၎င်း၊ အဆောင်တလျှင် ရှောင်တခင် လှူဒါန်းရသော အစ္စေကသင်္ကန်းဟု၎င်း၊ ဝါကျွတ်ခါနီး လှူဒါန်းသော ဝါကျွတ်သင်္ကန်းဟု၎င်း ခေါ်ဆိုနိုင်ပါသည်။

ကြယ်ကလေး (အိုင်ကြီး) စာရေးဆရာ

Open In TikTok:

Region: MM

Sunday 19 July 2026 02:22:39 GMT