30 Sano oo Isku tashi iyo Gudashada Waajibka Sakadda ee Beesha Cabdalle Xaamud. Maanta waxaa deegaanka Dhaban-dhige ee Degmadda Ceerigaabo ka qabsoomay munaasibad lagu qaybinayey Xoolaha Sakadda ee beesha Cabdalle Xaamud - Muuse Ismaaciil, taas oo muujinaysa 30 sano oo xidhiidh ah oo ay beeshu si wadajir ah u ururinaysay una qaybinaysay sakadda. Arrinkan Sakadda waxaa la soo bilaabmay 1996 waxaana hirgelintiisa lahaa Dr. Shiine. Sannadkan 2026 waxaa la ururiyey 700 neef oo adhi ah iyo 16 neef oo geel ah, waxaana loo qaybiyey 31 qoys oo ka tirsan beesha Cabdalle Xaamud, kuwaas oo qoys kasta la gaadhsiiyey 40 neef si ay u noqdaan qoysas sako goys ah. Si ay sanadka dambe qayb uga noqdaan dadka sakadda bixinaya. Sida oo kale waxaa qayb xoolaha ka mid ah la siiyey 46 qof oo ah beelaha kale ee degaanka la dega, kuwaas oo ay ku jireen dad deymo lagu leeyahay iyo dad kale oo sakaddu u waajibtay. Tani waxay tusaale nool u tahay in Sakaddu tahay cibaado isu keenta bulshada, yareysana faqriga, xoojisana walaaltinimada iyo is caawinta. Ilaahay khayr iyo xasanaad badan ha ka siiyo hana ka aqbalo dhamaan intii bixisay, intii soo ururisay, iyo intii ka shaqaysayba, waxaa si gaar ah duco iyo abaal u mudan Dr. Shiine oo ah aasaasaha arinkan khayriga ah iyo dhamaan Guddida Sakadda oo ahaa laf dhabarta hawshan khayriga ah. Ilaahay haka dhigo mid barako iyo kheyr badan u horseeda bulshada oo dhan. Culimadii munaasabadda ka qayb gashay waxaa ka mid ahaa: Dr. Maxamuud Axmed Shiine, oo ahaa aas-aasaha iyo masuulka mashruucan. Sheekh Maxamed Cali Xaaji Biixi. Sheekh Maxamed Sheekh Ismaaciil. Sheekh Maxamed Cali Gadhle. Sheekh Maxamed Aadan. Sheekh Mahad Maxamed Ibraahim. Isuduwaha Wasaaradda Diinta iyo Awqaafta Gobolka Sanaag, Cawed Jaamac Ismaaciil. - @jamacdubadhawd