عايش معانا في البيت، لعب وهظار وشكل على طول. أي مرة أمسك التلفون يجي يكسر الشريحة، ولو لقاني في حفلة في الحلة يرجعني البيت غصبًا عني. وأنا ذاتي ما بقصر، بضارب معاهو لحدي ما ناس البيت يحجزونا 😂 هو يتيم الأم والأب، أمي ربّتو معانا، وكبر قدام عيوني. كبر، واشتغل، وما شاء الله وارث ومحتاج لا شي. في يوم عماتو جو، وبعد ما اتونسوا وقاموا قالوا لأمي: «أحمد دا ما ناقصو شي، نفتش ليهو بت حلال يتزوج ويتلم عليها.» أنا سمعت الكلام وضحكت. هو كان قاعد في الديوان، مشيت ليهو من الشباك وقلت: «يا العوقة، بفتشوا ليك لي مرا تلمك!» قام شال الجزمة ولَبَعني بيها 😭 أصلاً ما في تفاهم بيناتنا، بس ضرب وشكل ونبز. فعلاً لقوا ليهو بت من أهل أبوه: مفتريّة، قليلة أدب، وسمحة. هو ما بحب أهل أبوه، لكن ما برفض طلب لأمي، بحترمها شديد. وأمي زولة طيبة، ما شدايدة، وعماتو دايرات سبب بس. قالت ليهم: «علي الله، لو فيها خير ربنا يتمها، ولو فيها شر يصرفو عنو.» حددوا يوم التعارف. سألوه، قال: «فيها خير ربنا يسويها، ما في مشكلة.» هو مسكين وما بخالف رأي الكبار، لكن حقّار معاي أنا بس. يومها كان متوتر شديد، وأنا بعاين فيهو وبضحك. شلت كباية موية ودنقرتها فيهو وقلت: «الفرج جانا!» قال: «يتفرجوا فيك عميانة!» ضحكت بأعلى صوت، وبعد الناس مشت، جا غرفتي. قلت: «دي ما أنا!» قال: «هو شنو أبيت أرد؟» مسكني من يدي وقال: «بكسرها، ردي شلتي شنو؟» قلت: «قميصك حق الجنزي.» أنا بسرق ملابسو دايمًا، وعندو أقمصه رهيبة، وياما دقاني بسبب الموضوع دا 😂 قال: «ما في مشكلة، شيليهو… بس داير منك طلب.» قلت: «شنو؟» قال: «البِت دي لو طلعت شينة، تمرقيني منها بأي طريقة.» قلت: «لا لا، شيل قميصك، عماتك السمان ديل ما تدخلني فيهم.» قال: «طيب، ما القميص… بديك تلفوني.» هنا اتحمست رسمي 😌 قلت في سري: يا رب تطلع شينة قلت ليهو: «ولو سمحة؟» قال: «اقطعي وشك تاني، ولو سمحة بعرس أبوها ذاتو.» مشينا التعارف، وهو كان مرعوب. قال مصدّع وما قادر يسوق. قلت ليهو: «خايف؟» قال: «لو إنتِ قفلتي خشمك أرتاح.» ركبنا ورا، وأمي وأبوي قدام. حاسّة بيهو مو طبيعي. قلت ليهو: «خايف تطلع شينة؟» قلت في قلبي: يا رب شينة عشان التلفون 😭 دخلونا النسوان في العريشة، وفجأة… دخلت البت. ما شاء الله. لون، شعر، نعومة، جسم… رهيييبة. أنا اتخلعت. التلفون طار 😭 رسلت ليهو في الواتس: «أحمد، البت شينة.» قال: «صوريها ورسليها سريع.» صورت بت جنبها شينة، وطلعت برة. قلت ليهو: «التلفون أول.» اداني ليهو من التوتر. دخل سلم، وقعد، وقامت عمتو قالت: «دي منى، خطيبتك إن شاء الله…» لابسة أخضر، زي النجفة. قال: «وينها؟ وينو اللابسة أخضر؟» أنا كنت جنبو، بدل يرد، لَبَعني في ضهري 😭 قال: «جيبي التلفون!» والناس كلها بتعاين. قمت قلت: «والله ما أديك ليهو.» قام يعض في أصبعو ويقول لي: «فكّي الزفت!» 😂🔥 قال لي: «فكّي الزفت!» قلت ليهو بهدوء مستفز: «التلفون أمانة… لحدي نطلع من هنا.» كان داير يجلطني بنظراتو، والناس كلها بتعاين، وأنا عاملة فيها ولا همّي. قعد جنب منى، وأنا قصادو. عيونو ما مفارقاها، وأنا قلبي مولّع… لا غيرة، لا حاجة، بس التلفون 😂 منى هادية، سمحة، بتضحك بخجل، وكل ما تضحك أحمد يتلخبط أكتر. عمتو سألتو: «رأيك شنو يا أحمد؟» قال: «الحمد لله.» قالها بصوت زول وقع في حفرة وما لقى سلم. طلعنا من البيت، أول ما بعدنا قال: «جيبي التلفون هسي.» قلت: «لا.» قال: «إنتِ دمرتيني.» قلت: «إنت البت خوفت نفسك، أنا قلت ليك خليك متفائل.» بعد يومين، البيت قلب عرس. اتصالات، فرح، ناس داخلة وناس طالعة. أمي مبسوطة، عماتو فرحانين، وأنا قاعدة ساكت… أول مرة أحس إنو البيت ما محتاجني في الحكاية دي. بالليل جا دق باب غرفتي. قال: «الموضوع دا جد.» قلت: «عارفة.» قال: «منى عاجبتني.» قلت: «مبروك.» سكت شوية وقال: «لكن إنتِ ما طبيعية… وأنا متعود عليك.» ضحكت. قلت: «يعني مشاكلنا؟» قال: «أها…» بعد أسبوع، جونا ناسها رسمي. زغاريد، ضحك، وكل شي تمام. قبل ما يمشوا، جاني قال بصوت واطي: «التلفون.» أديتو ليهو. مسك يدي وقال: «ما تضيعي.» قلت: «أمشي، عروسك جوة.» العرس تم. أحمد اتزوج. البيت هدي شوية… لا شجار، لا كسر شرايح، لا صراخ. بعد شهرين، كنت ماشّة السوق، قابلني. وقف، ابتسم، وقال: «والله البيت من غيرك ممل.» قلت: «مرتك وين؟» قال: «في بيتها.» هنا فهمت. مو كل زواج بيكون نهاية حب. ومو كل ضحك كان لعب. رجعت البيت، دخلت غرفتي، وقعدت أفكر: يمكن كنا بنحب بعض بطريقتنا الغلط. يمكن لو الزمن رجع… لكن الزمن ما برجع. الخلاصة؟ ما كل زول بنضارب معاهو بنكرهو، وما كل زول اتزوجناه كان هو النصيب. أحيانًا… النصيب يكون حكاية بس ما يكون زواج. #🇸🇩🇸🇦 #قسمة 💔غلابة #كواهلة_يا_رسول_الله #السودان_مشاهير_تيك_توك - @user42055555555551