မျက်နှာမမြင်ရပေမယ့် သတိထားရမယ့် “အငုံစိတ်” အငုံစိတ်ဆိုတာ ဓားလို အပြင်မှာ တောက်ပမနေဘူး၊ မီးလိုလည်း အပူရှိန်ကို ချက်ချင်းမခံစားရဘူး၊ အပြုံးတစ်ခုရဲ့နောက်၊ ချီးကျူးစကားတစ်ခွန်းရဲ့နောက်မှာ တိတ်တိတ်လေး ပုန်းနေတတ်တဲ့ စိတ်တစ်မျိုးပါ။ အလုပ်ခွင်မှာ... ကိုယ်အောင်မြင်သွားတဲ့အခါ ဝမ်းသာသလိုပြပြီး နောက်ကွယ်မှာ ကိုယ့်အမှားသေးသေးလေးကို ကြီးမားအောင် ပြောတတ်သူတွေရှိတယ်။ မိတ်ဆွေတွေကြားမှာ... ကိုယ့်ဘဝတိုးတက်လာတာကို ချီးကျူးနေသလိုနဲ့ “သူက ကံကောင်းလို့ပါ” ဆိုပြီး ကိုယ့်ကြိုးစားမှုကို တန်ဖိုးလျှော့တတ်သူတွေရှိတယ်။ စီးပွားရေးလောကမှာ... ကိုယ့်ဆီက အကြံဥာဏ်ယူ၊ နည်းလမ်းသင်ယူပြီး၊ နောက်ဆုံးမှာ ကိုယ့်ကိုယ်တိုင်ကို ပြိုင်ဘက်ဖြစ်အောင် ပြန်တိုက်ခိုက်တတ်သူတွေရှိတယ်။ မိသားစုနဲ့ နီးစပ်သူတွေကြားမှာတောင် ကိုယ်က ပိုကောင်းလာတာကို ပျော်သလိုပြပေမယ့် အတွင်းစိတ်ထဲမှာ “သူ့ထက် မနိမ့်ချင်ဘူး” ဆိုတဲ့ မမြင်ရတဲ့ ယှဉ်ပြိုင်မှုတွေ ရှိနေနိုင်တယ်။ လူမှုကွန်ရက်ပေါ်မှာလည်း ကိုယ့်ပျော်ရွှင်မှုကို ကြည့်ပြီး Like ပေးနေသူတိုင်း ကိုယ့်အတွက် တကယ်ဝမ်းသာနေတာ မဟုတ်နိုင်ဘူး။ တချို့က အားပေးဖို့ကြည့်တာ၊ တချို့က နှိုင်းယှဉ်ဖို့ကြည့်တာ၊ တချို့က ကိုယ်ကျသွားမယ့်နေ့ကို စောင့်ကြည့်တာ ဖြစ်နိုင်တယ်။ ဒါပေမယ့် လူတိုင်းကို သံသယနဲ့ မကြည့်သင့်သလို လူတိုင်းကိုလည်း မျက်စိမှိတ်ပြီး မယုံသင့်ဘူး။ အငုံစိတ်ရှိသူကို စကားလုံးနဲ့မတိုင်းပါနဲ့၊ ကိုယ်အောင်မြင်တဲ့အခါ သူ့အပြုအမူကိုကြည့်ပါ၊ ကိုယ်အခက်အခဲတွေ့တဲ့အခါ သူ့မျက်နှာကိုကြည့်ပါ၊ ကိုယ်မရှိတဲ့နေရာမှာ ကိုယ့်အကြောင်း ဘယ်လိုပြောတတ်သလဲဆိုတာကို ကြည့်ပါ။ လူတစ်ယောက်ရဲ့စိတ်ကို သူ့အပြုံးက မဖော်ပြနိုင်ပေမယ့် သူ့လုပ်ရပ်တွေက အချိန်ကြာလာတာနဲ့အမျှ အမှန်တရားကို ဖော်ပြပေးတတ်တယ်။ အငုံစိတ်ဟာ မမြင်ရတဲ့ရန်သူဖြစ်ပေမယ့် သတိရှိခြင်း၊ စည်းထားခြင်းနဲ့ တိတ်တိတ်လေးဝေးကွာခြင်းက အကောင်းဆုံးကာကွယ်မှုပါ။ ကိုယ့်အောင်မြင်မှုတိုင်းကို လူတိုင်းရှေ့ချ မပြပါနဲ့၊ ကိုယ့်အားနည်းချက်တိုင်းကိုလည်း လူတိုင်းကို မပြောပြပါနဲ့၊ စိတ်ကောင်းရှိပါ၊ ဒါပေမယ့် နုံအ မနေပါနဲ့။ မုန်းတီးမှုကို မုန်းတီးမှုနဲ့ မတုံ့ပြန်ဘဲ သိမြင်ခြင်းနဲ့ အကွာအဝေးထားနိုင်ခြင်းဟာ လူ့ဘဝရဲ့ အဆင့်မြင့်ဆုံးပညာတစ်ရပ် ဖြစ်ပါတယ်။ ထိန်လင်းသာဆရာတော် #အငုံစိတ် #ဓမ္မဒါန #foryou - @stkgrnhg0b5