#@ဆက်ဆံရေးတိုင်းကို ကိုယ့်ဘက်က အကောင်းဆုံးဆက်ဆံပေးပါ။ ဒါပေမယ့် ကိုယ့်ရဲ့ အများပေါ်ထားတတ်တဲ့ စိတ်ရင်းအမှန်လေးဟာ လူတိုင်းနဲ့မတန်ဘူးလို့သိတဲ့အခါကျရင်တော့ အချိန်မလွန်ခင် ပြန်ရုတ်သိမ်းလိုက်ပါ။ မထားသင့်တဲ့သူပေါ် အလွန်အကျွံထားခဲ့တဲ့ စေတနာတွေက ကိုယ့်အတွက် ပြန်ခါးသက်စေခဲ့တယ်။ သဘောမကောင်းသင့်တဲ့သူအပေါ် သဘောအရမ်းကောင်းပေးခဲ့ခြင်းတွေက ကိုယ့်ကိုယ်ကိုယ် ထိခိုက်မှုတွေ ပိုစေခဲ့တယ်။ မယုံသင့်တဲ့သူအပေါ် အရာရာ ပုံအပ်လို့ ယုံမှတ်မိခြင်းက ကိုယ့်ဒဏ်ရာကို ပိုနက်စေခဲ့တယ်။ ရပ်တန့်သင့်တဲ့အရာတွေပေါ် မရပ်တန့်ခဲ့မိလို့ ကိုယ့်တန်ဖိုးတွေ ဆုံးရှုံးခဲ့ဖူးတယ်။ တကယ်တော့ စေတနာကိုပဲဖြစ်ဖြစ် ချစ်ခြင်းမေတ္တာကိုပဲဖြစ်ဖြစ် ယုံကြည်မှုကိုပဲဖြစ်ဖြစ် အနစ်နာခံတတ်ခြင်းကိုပဲဖြစ်ဖြစ် ပေးလက်စမို့ဆိုပြီး ဆက်ပေးနေခြင်းက ကိုယ့်သေတွင်း ကိုယ်တူးနေသလိုပါပဲ။ တစ်ခါတည်းမဟုတ်ပဲ အကြိမ်ကြိမ် အခါခါ သေရတာမျိုးပါ။ မပျော်တော့ဘူးထင်ရင် ရုတ်သိမ်းလိုက်ပါ။ နာကျင်လွန်းနေရပြီဆိုရင် ရုတ်သိမ်းလိုက်ပါ။ တန်ဖိုးထားမခံရတော့မှန်းသိရင် ရုတ်သိမ်းလိုက်ပါ။ ကိုယ့်မေတ္တာနဲ့ကိုယ်မျက်နှာငယ်နေရပြီဆိုရင် ရုတ်သိမ်းလိုက်ပါ။ ကိုယ့်အတွက် နေရာမရှိတာသေချာရင် ရုတ်သိမ်းလိုက်ပါ။ ယုံကြည်မှုတွေလား ပေးလိုက်ပါ၊ လေးစားမှုတွေလား ပေးလိုက်ပါ၊ စေတနာတွေလား ပေးလိုက်ပါ၊ စစ်မှန်ခြင်းတွေလား ပေးလိုက်ပါ၊ အလေးထားမှုတွေလား ပေးလိုက်ပါ။ ဒါပေမယ့် အဲ့အရာတွေ ကိုယ်ပေးထားရတာ မတန်တော့ဘူးလို့ထင်လာတဲ့အခါကျရင် တော့ ပြန်ရုတ်သိမ်းလိုက်ပါ ၊ခပ်မြန်မြန်လေးပဲ။ ဘယ်အရာကိုပဲဖြစ်ဖြစ် ရုတ်သိမ်းသင့်တဲ့အချိန်မှာ ပြန်ရုတ်သိမ်းလိုက်ခြင်းက ကိုယ့်တန်ဖိုးကိုယ် ကာကွယ်ခြင်းတစ်မျိုးပါပဲ။ - @egzuuri