@gillybonny_tv: Waziri wa Madini, Antony Mavunde, amewataka wachimbaji wadogo na wadau wote wa sekta ya madini kuacha tabia ya kuwaruhusu raia wa kigeni, hususan Wachina, kuingia na kufanya shughuli za uchimbaji kinyume na sheria, kisha kuilaumu Serikali kwa ongezeko lao katika maeneo ya migodi. Mavunde ametoa kauli hiyo alipokuwa akizungumza na wachimbaji wa eneo la Igulula wilayani Nyangwale Mkoani Geita baada ya kuzindua mradi wa umeme katika eneo hilo la migodi. Kauli yake ilifuatia malalamiko kutoka kwa mmoja wa wachimbaji wadogo aliyedai kuwa kwa sasa idadi ya Wachina katika maeneo ya uchimbaji imeongezeka na kuzidi hata wachimbaji wazawa. Akijibu malalamiko hayo, Mavunde alisema Serikali haiwaleti Wachina katika maeneo ya migodi, bali baadhi ya wachimbaji ndiyo wanaowauzia au kuwapa wageni leseni zao za uchimbaji kinyume na utaratibu. "Serikali haileti Wachina. Ni nyinyi wenyewe mnauza leseni kwa Wachina. Sheria za madini zinataka wageni waje kutoa msaada wa kiufundi, si kufanya shughuli nyingine kinyume na sheria," alisema Mavunde. Alisisitiza kuwa Serikali itaendelea kusimamia sheria za madini ili kuhakikisha wageni wanafuata masharti yaliyowekwa na kwamba fursa za uchimbaji zinawanufaisha Watanzania kwa mujibu wa sheria.

Gilly Bonny Tv

Open In TikTok:

Region: TZ

Wednesday 22 July 2026 08:06:35 GMT