@navat.satra.kh: ក្នុងដំណើរជីវិតនេះ បើនិយាយពីបទពិសោធនៃការចួបមនុស្សអាក្រក់ ឬមនុស្សបោកប្រាស់ គ្មាននរណាម្នាក់ដែលថាមិនធ្លាប់នោះទេ។ មនុស្សស្ទើរតែគ្រប់គ្នាទៅហើយ តែងតែធ្លាប់ឆ្លងកាត់នូវការឈឺចាប់ដោយសារតែការទុកចិត្តមនុស្សខុស។ ជាធម្មតាទេ ការដែលត្រូវគេធ្វើបាប ឬបោកប្រាស់ វាមិនត្រឹមតែបន្សល់ទុកនូវស្នាមរបួសផ្លូវចិត្តប៉ុណ្ណោះទេ វាក៏បានបំផ្លាញ «សុវត្ថិភាពផ្លូវចិត្ត» របស់យើងឱ្យរស់នៅក្នុងវិបត្តិទំនុកចិត្តយ៉ាងធ្ងន់ធ្ងរផងដែរ។ ទាំងនេះហើយជាកត្តាដែលនាំឱ្យមនុស្សខ្លះ រាងចាល ខ្លាចរអារ និងកើតការប្រុងប្រយ័ត្នហួសហេតុទៅលើមនុស្សជុំវិញខ្លួន និងមនុស្សល្អៗដទៃទៀត។ ❝ ការប្រុងប្រយ័ត្នវាគឺជារឿងល្អ ប៉ុន្តែបើប្រុងប្រយ័ត្នហួសហេតុទៅលើមនុស្សល្អ វាជារឿងខុសទៅវិញទេ។ ❞ បើយើងនិយាយតាមបែបចិត្តវិទ្យា បទពិសោធដែលយើងធ្លាប់រងគ្រោះពីអតីតកាល បើវាជូរចត់ពេក បើវាធ្ងន់ធ្ងរពេក កត្តាទាំងនេះវានឹងជំរុញឱ្យខួរក្បាលយើងបង្កើតបានជា «ខែលការពារខ្លួន» ជ្រុលហួសហេតុ។ ខែលការពារខ្លួននេះវាធ្វើឱ្យការសង្ស័យវិវត្តទៅជា «ការរវើរវាយ ហួសពីហេតុផល» ដែលនាំឱ្យយើងបាត់បង់អារម្មណ៍សុវត្ថិភាពក្នុងការជឿទុកចិត្តលើអ្នកដទៃ រហូតសូម្បីតែចំពោះមនុស្សដែលចូលមកដោយចិត្តស្មោះ ឬក្នុងស្ថានភាពដែលគ្មានគ្រោះថ្នាក់សោះក៏ដោយ។ ✅នៅក្នុងរង្វង់ស្នេហា ការធ្លាប់ត្រូវគេក្បត់ចិត្ត ធ្វើឱ្យយើងបង្កើតចិត្តសង្ស័យលើគូស្នេហ៍ថ្មីដែលស្មោះត្រង់ ដោយតែងតែភ័យខ្លាចថាថ្ងៃណាមួយ គេនឹងធ្វើឱ្យយើងឈឺចាប់ដូចមុន។ ✅ក្នុងទំនាក់ទំនងការងារ ថៅកែដែលធ្លាប់ត្រូវបុគ្គលិកបន្លំទ្រព្យសម្បត្តិ តែងតែមានចិត្តប្រុងប្រយ័ត្នហួសហេតុលើបុគ្គលិកថ្មីៗដែលមានសមត្ថភាព និងភាពស្មោះត្រង់ រហូតមិនហ៊ានផ្តល់ឱកាសពេញលេញដល់គ្នាទៅទៀត។ ✅នៅក្នុងកិច្ចការងារសង្គម អ្នកសប្បុរសធម៌ដែលធ្លាប់ត្រូវបានគេបោកប្រាស់ អាចនឹងក្លាយជាមនុស្សរាងចាល រហូតមានចិត្តស្ទាក់ស្ទើរក្នុងការជួយអ្នកដែលកំពុងទាល់ក្រពិតប្រាកដ។ នេះហើយជា «ខែលការពារខ្លួន» ដែលកើតចេញពីស្នាមរបួសចាស់ (អតីតកាល) វាមិនត្រឹមតែធ្វើឱ្យខ្លួនឯងបាត់បង់សុវត្ថិភាពផ្លូវចិត្តនោះទេ ប៉ុន្តែវាក៏បង្កើតសម្ពាធលើ «មនុស្សល្អ» ដែលចូលមកក្នុងជីវិតយើងផងដែរ។ ពួកគេត្រូវចួបប្រទះនូវភាពហត់នឿយផ្លូវចិត្តក្នុងការស្រាយបញ្ជាក់ពីភាពស្មោះត្រង់ អារម្មណ៍អយុត្តិធម៌ ពួកគេដូចជាកំពុងទទួលទោសជំនួសកំហុសអ្នកចាស់ ឬការរស់នៅក្នុងភាពតានតឹងដោយសារយើងទៅវិញ។ សម្ពាធទាំងនេះមុខតែយើងត្រូវខាតបង់ទៀតហើយ ព្រោះជារឿយៗអាចជំរុញឱ្យមនុស្សល្អៗគេសម្រេចចិត្តដើរចេញ មិនមែនដោយសារគេគ្មានចិត្តស្មោះនោះទេ ប៉ុន្តែមកពីគេនឿយហត់នឹងការមិនត្រូវបានយើងទុកចិត្ត។ បងប្អូនណាកំពុងលង់នឹងស្នាមរបួសចាស់ ហើយបាត់បង់អារម្មណ៍សុវត្ថិភាពក្នុងពេលបច្ចុប្បន្ន មកណេះ! ខ្ញុំចែករំលែកវិធីសាស្ត្រដើម្បីស្ដារផ្លូវចិត្តឱ្យដូចដើម៖ ១. ញែក «អតីតកាល ចេញពីបច្ចុប្បន្ន» រំលឹកស្មារតីខ្លួនឯងថា មនុស្សនៅចំពោះមុខមិនមែនជាអ្នកដែលធ្លាប់ធ្វើបាបយើងកាលពីមុនឡើយ ហើយរៀនសង្កេតលើ «ភស្តុតាងនៃទង្វើពិត» ជាជាងការគិតស្រមៃភ័យខ្លាចតែម្នាក់ឯង។ ២. ត្រូវផ្តល់ទំនុកចិត្តបន្តិចម្តងៗ កុំបង្ខំខ្លួនឯងឱ្យទុកចិត្ត ១០០% ភ្លាមៗ ប៉ុន្តែត្រូវបើកបេះដូងទទួលយកស្តង់ដារសុវត្ថិភាពថ្មីបន្តិចម្តងៗ។ ៣. បញ្ចេញពីអារម្មណ៍ដោយស្មោះត្រង់ទៅកាន់គេ និយាយរៀបរាប់ពីរបួសចាស់ទៅកាន់ដៃគូ ឬមនុស្សជុំវិញខ្លួន ដើម្បីឱ្យគេយល់ និងជួយកាត់បន្ថយសម្ពាធផ្លូវចិត្តរវាងគ្នា និងគ្នា។ ខ្ញុំមិនហាមថា ឈប់មានការប្រុងប្រយ័ត្ននោះទេ រាល់ការប្រុងប្រយ័ត្នគឺជាខែលការពារខ្លួន ប៉ុន្តែការដែលឱ្យស្នាមរបួសចាស់មកគ្របដណ្តប់លើបច្ចុប្បន្នភាព វាគឺជាការរារាំងខ្លួនឯងមិនឱ្យចួបពន្លឺនៃសេចក្តីសុខ និងមេត្រីភាពពិតប្រាកដ។ ការព្យាបាលចិត្ត និងការរៀនផ្តល់ទំនុកចិត្តឡើងវិញ វាគឺជា «កាដូ» ដ៏មានតម្លៃបំផុតដែលយើងត្រូវផ្តល់ឱ្យខ្លួនឯង និងមនុស្សក្បែរខ្លួន។ ឯវំ! By: ណាវ៉ាត់៚ #សុភាសិតខ្មែរ #ពន្លឺបញ្ញា #ពុទ្ធសាសនា #foryoupage