ابو جڏهن جدا ٿيندو آهي ته سندس ياد هر گهڙي، هر هنڌ ۽ هر ساهه سان گڏ رهندي آهي. راتين جي ننڊ به ڄڻ اکين کان رُسي ويندي آهي، ۽ دل هر پل سندس واٽ نهاريندي رهندي آهي. مون کي پنهنجي رب پاڪ جو قسم آهي، اڄ به منهنجي دل اهو مڃڻ لاءِ تيار ناهي ته منهنجا پيارا بابا سائين واقعي هن فاني جهان کي ڇڏي پنهنجي حقيقي مالڪ ڏانهن هليا ويا آهن. ائين محسوس ٿيندو آهي ڄڻ هو اڃا به اسان جي آس پاس آهن، اسان کي ڏسي رهيا آهن ۽ پنهنجين دعائن جي ڇانوَ ۾ رکيو ويٺا آهن. جڏهن منهنجي ننڍڙي ڀيڻ معصوميت سان پڇندي آهي: “بابا مٺا ڪڏهن ايندا؟” ته مان کيس دلاسو ڏيندو آهيان ته “بابا مديني ويا آهن، جلد موٽي ايندا.” پر حقيقت ۾ منهنجي پنهنجي دل کي ڪير دلاسو ڏئي؟ دل اڄ به انهيءَ آس ۾ ويٺي آهي ته در کلي ۽ بابا سائين پنهنجي هميشه واري مُرڪ سان گهر ۾ داخل ٿين. بابا سائين جي وڇوڙي کان پوءِ گهر جون ڀتيون به اُداس لڳن ٿيون، هر ڪنڊ سندن ياد سان آباد آهي. سندن شفقت، محبت، دعائون ۽ سايو هر گهڙي شدت سان محسوس ٿيندو آهي. پيءُ رڳو هڪ رشتو ناهي هوندو، پر اولاد لاءِ رحمت، سهارو ۽ رب پاڪ جي خاص نعمت هوندو آهي. يا الله پاڪ! پنهنجي ڪرم، رحمت ۽ محبوب ﷺ جي صدقي منهنجي بابا سائين مرحوم و مغفور محمد هاشم رند جي مڪمل مغفرت فرماءِ، سندس قبر کي جنت جي باغن مان هڪ باغ بڻاءِ، ۽ کيس جنت الفردوس ۾ اعليٰ کان اعليٰ مقام عطا فرماءِ. سندس درجات بلند فرماءِ ۽ اسان سڀني کي سندس لاءِ جاري صدقو بڻاءِ. آمين يا رب العالمين.#resthighbeautifulsoul😭😔🕊🕊🕊 - @sajjadali7543