@atalkhan_22: مياں افتخار حسين د امن مبارز ! کله چې د پښتنو د سياسي شعور، ولسي مبارزې او د امن د نه ستړې کېدونکې هلو ځلو يادونه کېږي، نو د مياں افتخار حسين نوم د درناوي، قربانۍ او استقامت د يو روښانه سمبول په توګه مخې ته راځي. هغه له هغو سياسي مشرانو څخه دی چې د خپلو خبرو ترڅنګ يې د خپل عملي ژوند په هر پړاو کې د خپل فکر بيه هم ورکړې ده. مياں افتخار حسين د خپل سياسي ژوند ډېره برخه د جمهوريت، عدم تشدد، د اولس د حقونو او د امن لپاره وقف کړې ده. هغه په داسې حالاتو کې هم د سولې، ورورولۍ او سياسي شعور غږ پورته کړی، چې د تاوتريخوالي، ويرې او بدامنۍ توره فضا پر سيمه خپره وه. د ميا صيب مبارزه د باچا خان د عدم تشدد فلسفه ده، هغه فلسفه چې د وسلې پر ځای د خبرو، زغم او سياسي شعور لار خپلوي. خو د مياں افتخار حسين د ژوند تر ټولو ستر او دردناک باب د خپل ځوان زوی، مياں راشد حسين، شهادت دی. د 2010 کال د جولای په 24مه نيټه، ترهګرو په بې دردې سره مياں راشد حسين شهيد کړو. دا يوازې د يو پلار د زوی شهادت نه وو، بلکې د امن پر فکر، د جمهوريت پر ارزښتونو او د عدم تشدد پر فلسفې هم يو ظالمانه بريد و. نن د مياں راشد حسين د شهادت شپاړسمه کليزه ده. شپاړس کاله تېر شول، خو د هغه قرباني لا هم د امن د مبارزې په تاريخ کې د تل لپاره ژوندۍ ده. د هر بااحساس انسان لپاره دا تصور هم سخت دی چې يو پلار دې خپل ځوان زوی مرګ وويني. خو د مياں افتخار حسين عظمت په دې کې دی چې دې لوې غم سره يې د نفرت لار خپله نه کړه، د انتقام ژبه يې ونه کاروله او د امن له مبارزې څخه يو ګام هم شاته نه شو. دښمن غوښتل د يو پلار زړه مات کړي، د هغه اراده کمزورې کړي او د امن غږ چوپ کړي، خو نتيجه يې برعکس راووتله. مياں افتخار حسين له دې ستر غم وروسته هم په هماغه مېړانه، حوصلې او استقامت د امن، جمهوريت، قانون واکمنۍ او د پښتنو د حقونو لپاره خپله مبارزه روانه وساتله. ده وښوده چې فکرونه د زور، وژنې او ترهګرۍ په وسيله نه وژل کېږي. د مياں راشد حسين وينه د دې خبرې ژوندی ثبوت دی چې د امن لار ارزانه نه ده، دا لار د قربانيو، صبر او نه ستړې کېدونکو مبارزو غوښتنه کوي. د هم دې قربانيو له برکته نن هم د امن، سياسي شعور او عدم تشدد پيغام ژوندی دی. په داسې وخت کې چې زموږ ټولنه لا هم له بېلابېلو ستونزو او بدامنې سره مخ ده، د مياں افتخار حسين ژوند او مبارزه موږ ته دا درس راکوي چې د حق او امن لپاره مبارزه بايد د هر ډول ويرې او قربانۍ باوجود دوام ولري. موږ د مياں راشد حسين د شهادت د شپاړسمې کليزې په مناسبت هغه ته د عقيدت پېرزوينې وړاندې کوو، د هغه د لوړو درجو دعا کوو، او مياں صيب ته لوې ژوند، روغتيا او لا زياتې حوصلې هيله لرو. د دوی قربانۍ به د امن، عدم تشدد او اولسي مبارزې په تاريخ کې د تل لپاره په درناوي يادېږي. ~اتل خان #mianiftikharhussain #AwamiNationalParty #ANP #AtalKhan #foryou

Atal Khan 🚩

Open In TikTok:

Region: PK

Friday 24 July 2026 08:57:24 GMT