‎ለፍቅር......... ‎ ‎ፀሀይዋ በከተማዋ ላይ ቂም የቋጠረች ይመስል ገና 3 ሰዓት ሳይሆን ሙቀቷን ትረጫለች ። ‎ ‎ሰለሞን ግን የፀሀይዋን ሙቀት ከምንም ሳይቆጥር በሰው መሀል እየተሹለከለከ ወደፊት ያመራል ሲያዩት ቀጠሮ ያለበት ነበር የሚመስል ቢጠሩትም አይሰማም ። በጣም ከመቸኮሉ የተነሳ ወደ ኋላው እንኳን ዞሮ አያይም ። ‎ቀጥ ብሎ ነበር የሚሄድ መናሀሪያውን ካለፈ በኋላ ወደ አደባባዩ የሚወስደውን መንገድ ተያያዘው ። የለበሰው አሮጌ ጅንስ ሱሪ ከማለቁ የተነሳ ተቀዳዷል ከላይ የለበሳት ቢጫ ቲሸርት በጣም ከመቆሸሿ የተነሳ ውሃ ነክቷት የሚያውቅ አይመስልም ። ‎ ‎የፀጉሩ ነገርማ አይነገርም በጣም ከመንጨፍረሩ የተነሳ የጃርት እሾህ መስሎ ቆሟል ። ‎አደባባዩ ከደረሰ በኋላ ወደ ቀኝ ታጠፈና ወደ ገበያው ገባ ። ‎የህዝቡ ብዛትና ጫጫታ ግራ ያጋባው ሰለሞን መሀል ላይ ቆሞ ከወዲያ ወዲህ ቢያማትር ተሸካሚ ( ወዛደር ) የሚፈልግ ሰው በአይኑ ቢያስስ አጣ ። “ በቃ ዛሬም ሳልሰራ ልውል ነው ? " አለ በውስጡ ። ‎ ‎ትንሽ ከጠበቀ በኋላ ወደ ጤፍ መሸጫው መካዘን አመራ እዛም ወዛደር የሚፈልግ ሰው አጣ ። አንድ ከተዘጋ ሱቅ ገደፍ ብሎ እንደቆመ በሀሳብ ጭልጥ ብሎ ሄደ ። ‎ ‎ከእጅ ወደ አፍ የሆነው ኑሮው ይበልጥ ያስጨንቀው ጀመር ። ሰው ሁሉ በሰው ከማሸከም ይልቅ ለፍጥነቱ እያለ በእሽኩኒታ ማስጫኑ የወዛደሮች ኑሮ ወደፊት ምን ሊመስል እንደሚችል እያሰበ እያለ ነበር ድንገት “ የኔ ልጅ " የሚል ድምፅ ብዙ ርቀት ከሄደበት ሀሳቡ ያነቃው ። ‎ ‎ገና ከእንቅልፉ እንደነቃ ሰው አይኑን እያጨላሞሰ ድምፁን ወደሰማበት አቅጣጫ ሲዞር ከአንድ እናት ጋር አይን ለአይን ተጋጩ ። ትሸከማለህ ? አለችው በማዳበሪያ የሞላውን ጤፍ በአገጯ እየጠቆመች ። ‎ ‎አዎ...ብሎ ጣድፎ ስለ ክፍያ ሳይነጋገሩ ተወተርትሮ አንስቶ ተሸከመው ። በክፍያ አለመስማማት ይመጣል ብሎ ስላሰበ ነበር ስለ ክፍያ ሳይጠይቅ ለመሸከም የተገደደው ። ሰሞኑን ሳይሰራ በመሰንበቱ ነበር የሰጠችውን ክፍያ ለመቀበል የወሰነው ። ‎ ‎የህዝቡን ጋጋቴ ቀስ እያለ ካለፈ በኋላ ። ከፊት ሆና ሴትዮዋ በምትመራው ወደ ዋናው ንግድ ባንክ ከሄዱ በኋላ እንደገና ወደ ስታዲየሙ በሚወስደው መንገድ ጉዞውን ጀመረ ። ‎ ‎ሴትዮዋን ከዚህ በፊት አይቷት የማያውቅ ቢሆንም ከተማው ውስጥ በደግነት አንቱታን ያተረፉ የቤት እመቤት ናቸው ። ወ/ሮ ሙሉነሽ ይባላሉ ። ‎ ‎ከጨፍራራ ፀጉሩ የሚፈሰው ላበት ፊቱን አልብሶ ወደ አንገቱ መፍሰስ ጀምሯል ። ከፀጉሩ ላይ ላበት እያጠበ የሚያመጣው እድፍ አይኑን ስለሚቆጠቁጠው ቆም ይልና ፡ በአንድ እጁ ዣዱ ላይ የተሸከመውን ጤፍ እንዳይወድቅበት ይይዝና በሌላኛው እጁ ደግሞ ሁለቱንም አይኑን ጠራርጎ ፡ እንደ ወጣት በፍጥነት የሚጓዙትን ወ/ሮ ሙሉነሽን በፍጥነት ጉልበቱ ከጉልበቱ እየተጋጨ እና እየተወላገደ አሊያም በማቸልቸል ይደርስባቸዋል ። ‎ ‎ቀጥ ያለውን የስታዲየሙን መንገድ ጨርሰው የመጨረሻ መታጠፊያ ሲቀር ወ/ሮ ሙሉነሽ ቆመዉ ጠበቁትና ‎ " አይዞህ የኔ ልጅ ደርሰናል " ‎አሉትና ወደ መታጠፊያው ገቡ ። ‎ ‎ልምድ ሆኖባቸው ወጣቱን በሙሉ " የኔ ልጅ " ማለት ይቀናቸዋል ። ‎ትንሽ ከተጓዙ በኋላ ሰፊ በር ያለውን ግቢ ሲያንኳኩ ጥበቃቸው እየተጣደፈ በሩን ከፈተላቸው ። ‎ሰለሞን ጤፉን በረንዳው ላይ ካወረደ በኋላ ‎ " ደከመህ የኔ ልጅ ? ‎ አልደከመኝም.... አላቸው ቁና ቁና እየተነፈሰ ። በዚህ ሰዓት ወ/ሮ ሙሉነሽ ወደ ውስጥ ገቡ ። ሰለሞን ቁጭ እንዳለ አጥር ግቢውን ይቃኝ ጀመር ።.... ‎ ‎ይቀጥላል.... ‎ ክፍል 2 ቶሎ እንዲደርሳችሁ like👍🏼 ‎ዮናስ ✍️ ‎ - @official9235