@moemoethwe777: ❝ ယနေ့ခေတ်မှာ… ကိုယ်တိုင် ရန်သွားမစပေမယ့် ရလာတဲ့ ရန်သူတွေရှိတယ် ❞ စီးပွားရေးလုပ်လာတဲ့ နှစ်တွေတစ်လျှောက်၊ လူပေါင်းစုံနဲ့ ဆက်ဆံလာရင်း ကျမ သဘောပေါက်လာတဲ့ အမှန်တရားတစ်ခု ရှိပါတယ်။ငယ်ငယ်တုန်းကတော့ ရန်သူဆိုတာ လူတစ်ယောက်ကို သွားပြီး ထိခိုက်မှ၊ နာကျင်အောင် လုပ်မှ၊ မတရားပြောဆိုမှ ဖြစ်လာတာလို့ ထင်ခဲ့ဖူးတယ်။ဒါပေမယ့် အသက်ကြီးလာလေ၊ ဘဝအတွေ့အကြုံများလာလေ နားလည်လာတာက…တချို့ရန်သူတွေက ကိုယ်က ဘာမှမလုပ်ခဲ့ဘဲ ပေါ်လာတာပါ။ ကိုယ်က ကိုယ့်ဘဝကို တည်ဆောက်နေတယ်။ကိုယ်က ကိုယ့်တာဝန်ကို ကျေပွန်အောင် လုပ်နေတယ်။ကိုယ်က ဘယ်သူ့ကိုမှ မထိခိုက်ချင်ဘူး။ဒါပေမယ့် လူတိုင်းက ကိုယ့်ရပ်တည်ချက်ကို နားလည်ပေးမယ်လို့တော့ မမျှော်လင့်သင့်ဘူး။လူတစ်ယောက်မှာ ရန်သူရှိတာဟာ အမြဲတမ်း အမှားလုပ်လို့ မဟုတ်ပါဘူး။တစ်ခါတလေ…အမှန်ကို လုပ်နေလို့လည်း ရန်သူရတတ်တယ်။တန်ဖိုးရှိတဲ့ ဘဝကိုတည်ဆောက်နေလို့လည်း ရန်သူရတတ်တယ်။ကိုယ့်ဘဝအတွက် နယ်နိမိတ် (Boundaries) သတ်မှတ်တတ်လို့လည်း ရန်သူရတတ်တယ်။ ဒီခေတ်မှာ ကျမ မြင်ဖူးတဲ့ အလိုလို ရလာတဲ့ ရန်သူအမျိုးအစားတွေကတော့… 🫆 ပိုက်ဆံမချေးလို့ ရန်သူရလာတာ ပိုက်ဆံမချေးပေးလိုက်တဲ့အတွက် ကိုယ့်ကို မကောင်းတဲ့လူလို့ ထင်သွားတဲ့သူတွေ ရှိတယ်။ဒါပေမယ့်…မချေးပေးတာက မကူညီချင်လို့ မဟုတ်ဘူး။ကိုယ့်ရဲ့ စည်းကမ်းကို ကာကွယ်တာ။ လုပ်ငန်းရဲ့ Cash Flow ကို ကာကွယ်တာ။ဝန်ထမ်းတွေရဲ့ လစာကို ကာကွယ်တာ။မိသားစုရဲ့ အနာဂတ်ကို ကာကွယ်တာ။စီးပွားရေးလုပ်ငန်းရှင်တစ်ယောက်အတွက် စိတ်ကောင်းရှိတာတစ်ခုတည်းနဲ့ ဆုံးဖြတ်လို့ မရဘူး။တာဝန်ယူရမယ့် လူတွေ၊ ထိန်းသိမ်းရမယ့် လုပ်ငန်းစည်းကမ်းတွေ ရှိတယ်။လူတိုင်းကို ကျေနပ်အောင် မလုပ်နိုင်ဘူးဆိုတာ လက်ခံလိုက်တဲ့နေ့ကစပြီး စိတ်ပင်ပန်းမှု တော်တော်လျော့သွားတယ်။ 🫆 ကူညီပေးမိလို့ ရန်သူရလာတာ ဘဝမှာ လူတော်တော်များများကို ကျမ ကူညီဖူးတယ်။တချို့က အဲဒီအကူအညီကို အမြဲတမ်း ကျေးဇူးတင်တယ်။ဒါပေမယ့် တချို့ကတော့…အစမှာ “ကျေးဇူးတင်ပါတယ်” လို့ ပြောပြီး၊ အချိန်ကြာလာတဲ့အခါ အဲဒီအကူအညီကို သူတို့ရဲ့ အခွင့်အရေးလို သဘောထားလာကြတယ်။နောက်တစ်ကြိမ် မကူညီနိုင်တော့တဲ့နေ့မှာ… “အရင်ကလို မဟုတ်တော့ဘူး။”“အောင်မြင်သွားတော့ လူပြောင်းသွားတယ်။”ဆိုတဲ့ စကားတွေ ထွက်လာတတ်တယ်။အဲဒီအချိန်မှာ နားလည်လာတာက…ကူညီတာဟာ တာဝန်မဟုတ်ဘူး။မေတ္တာပါ။မေတ္တာနဲ့ ပေးတဲ့အရာကို တာဝန်လို သတ်မှတ်ခံရတဲ့အခါ ရန်သူဖြစ်ပြန်ပါတယ်။ 🫆အလျော့ပေးမိလို့ ရန်သူရလာတာ အလျော့ပေးတာကို လူတိုင်းက နားလည်မှုလို့ မမြင်ဘူး။တချို့က အားနည်းချက်လို့ မြင်တယ်။တစ်ကြိမ် အလျော့ပေးလိုက်ရင်…နောက်တစ်ကြိမ်လည်း ပေးမယ်လို့ ထင်လာတယ်။တစ်နေ့ “ဒီတစ်ခါတော့ မရတော့ဘူး” လို့ ပြောလိုက်တဲ့အခါ…ကိုယ်ကပဲ ပြဿနာရှာတဲ့သူ ဖြစ်သွားတယ်။အဲဒီအတွေ့အကြုံတွေက ကျမကို သင်ပေးခဲ့တာကသဘောကောင်းတာနဲ့ စည်းမရှိတာဟာ မတူဘူး။လေးစားမှုဆိုတာ အလျော့ပေးတိုင်း မရဘူး။တစ်ခါတလေ စည်းကမ်းရှိမှ ရတယ်။ 🫆 သဘောကောင်းမိလို့ ရန်သူရလာတာ သဘောကောင်းတဲ့လူတွေဟာ အများဆုံး အသုံးချခံရတဲ့လူတွေလည်း ဖြစ်တတ်တယ်။တောင်းသမျှ ပေးတယ်။ ခေါ်သမျှ သွားတယ်။လုပ်ပေးနိုင်သမျှ လုပ်ပေးတယ်။ဒါပေမယ့်…တစ်နေ့ “မလုပ်နိုင်တော့ဘူး” လို့ ပြောလိုက်တာနဲ့…အရင်က လုပ်ပေးခဲ့တဲ့ အရာ (၁၀၀) ကို မေ့သွားပြီး…မလုပ်ပေးတဲ့ တစ်ခါကိုပဲ မှတ်မိကြတယ်။အဲဒီနေ့မှာ နားလည်လာတာက…သဘောကောင်းတာဟာ ကောင်းတဲ့အရည်အချင်းပါ။ဒါပေမယ့်…ကိုယ့်တန်ဖိုးကို ဆုံးရှုံးတဲ့အထိ သဘောကောင်းနေဖို့တော့ မလိုဘူး။ 🫆 သူများမလုပ်နိုင်တဲ့အလုပ် ကိုယ်တစ်ယောက်တည်း လုပ်နိုင်လို့ ရန်သူရလာတာ ဒီအချက်က စီးပွားရေးလောကမှာ ပိုပြီး မြင်ရတယ်။ကိုယ်က ကြိုးစားတယ်။အလုပ်လုပ်တယ်။ရလဒ်ထွက်တယ်။တိုးတက်လာတယ်။လူတိုင်းက လက်ခုပ်တီးမပေးဘူး။တချို့က အားကျတယ်။တချို့က သင်ယူတယ်။ဒါပေမယ့်…တချို့ကတော့ ကိုယ့်အောင်မြင်မှုကို မကြည့်ဘဲ သူတို့ရဲ့ မအောင်မြင်မှုနဲ့ နှိုင်းယှဉ်ကြတယ်။အဲဒီနှိုင်းယှဉ်မှုက မနာလိုမှုဖြစ်လာတယ်။မနာလိုမှုက အမုန်းဖြစ်လာတယ်။အမုန်းက ရန်သူဖြစ်လာတယ်။ဒါဟာ ကိုယ်မှားလို့ မဟုတ်ဘူး။ကိုယ်လုပ်နိုင်တဲ့အရာက သူတို့ မလုပ်နိုင်သေးတဲ့ အရာဖြစ်နေလို့ပဲ။ ဒီအတွေ့အကြုံတွေကြားမှာ ကျမ သင်ယူခဲ့တဲ့ သင်ခန်းစာတစ်ခုကတော့…အသက်ကြီးလာလေ…လူတိုင်းကို ကျေနပ်အောင် နေဖို့ထက်…ကိုယ့်ရဲ့ တန်ဖိုး၊ စည်းကမ်းနဲ့ ယုံကြည်ချက်ကို မဖျက်ဘဲ နေနိုင်ဖို့က ပိုအရေးကြီးတယ်။လူတိုင်းရဲ့ ချစ်ခင်မှုကို မရနိုင်ပေမယ့်…ကိုယ့်ကိုယ်ကိုယ် လေးစားတဲ့စိတ်ကိုတော့ မဆုံးရှုံးသင့်ဘူး။လူတိုင်းက ကိုယ့်အကြောင်းကို နားလည်ပေးမှာ မဟုတ်သလို…လူတိုင်းကိုလည်း ကိုယ်ရှင်းပြနေဖို့ မလိုဘူး။တစ်ခါတလေ တိတ်တိတ်လေး ဆက်လျှောက်နေတာက အကောင်းဆုံးအဖြေပဲ။ဘာကြောင့်လဲဆိုတော့…တကယ်ရင့်ကျက်တဲ့လူတွေဟာ ရန်သူမရှိလို့ အောင်မြင်တာ မဟုတ်ဘူး။သူတို့ရဲ့ တန်ဖိုးတွေကို မရောင်းစားဘဲ၊ ဖိအားတွေ၊ အထင်လွဲမှုတွေ၊ ဝေဖန်မှုတွေကြားကနေ ကိုယ့်လမ်းကိုယ် ဆက်လျှောက်နိုင်လို့ အောင်မြင်တာပါ။ဘဝမှာ ရန်သူရှိတာကို မကြောက်ပါနဲ့။ကိုယ့်ရဲ့ အခြေခံတန်ဖိုးတွေ ပျောက်ဆုံးသွားတာကိုသာ ကြောက်ပါ။ Credit

Moe Moe Thwe

Open In TikTok:

Region: MM

Monday 27 July 2026 06:51:40 GMT