@khaled.hayallah: مين هي "العجوزة" اللي اتسمى حي "العجوزة" على اسمها؟ العجوزة مش مجرد حي راقي جنب المهندسين، ولا اسم جاي كده وخلاص، العجوزة حكاية ست، وتاريخ، ونيل اتغيّر مجراه علشان حلم 👀 في أواخر عصر الخديوي إسماعيل، ومع مشروعه الكبير لبناء قصره الجديد في الزمالك، حصل تغيير ضخم في شكل المنطقة، واتحفر فرع جديد من النيل اتعرف وقتها باسم البحر الأعمى، واتنقل ناس كتير من بيوتهم البسيطة ناحية الضفة الغربية، اللي هتبقى بعد كده نواة حي العجوزة. وسط كل ده، كان في اسم كبير محمد شريف باشا صبري، رئيس وزراء مصر وقتها، اللي كان نفسه يبني جامع على أرضه المطلة على النيل، لكن القدر ما ادّالوش الفرصة، الحلم ما ماتش، لأن اللي كملته كانت زوجته. نازلي هانم بنت سليمان باشا الفرنساوي، ست تجاوزت التسعين سنة، قررت تحقق أمنية جوزها، ونزلت بنفسها تشرف على بناء الجامع، والفلاحين شافوها بعينيهم، ست عجوزة واقفة وسط الطوب والعمال، تتابع كل تفصيلة. من هنا، الناس سمّت المكان: جامع الست العجوزة، وبالوقت، الاسم كبر، والجامع بقى علامة، والمنطقة كلها اتسمّت على اسمها، ومن هنا اتولد حي العجوزة. الحكاية ما وقفتش هنا، عيلة صبري سابت بصمتها في القاهرة كلها، ومنهم بنتهم توفيقة هانم، اللي خلفت بنتين: نازلي، اللي بقت ملكة مصر، ونوال اللي ماتت طفلة، وحزن عليها أبوها حزن عمره. ومن الوجع، سمّى قصره باسمها سراي نوال، والاسم فضل، وبقى شارع نوال اللي لحد النهارده بنعدي فيه من غير ما نعرف حكايته، حكايات زي دي بتفكرنا إن شوارع القاهرة مش إسفلت وبنايات وبس، دي حكايات ناس، وأحلام، ووجع، وست عجوزة سابت اسمها للتاريخ.#explore #trend #trending #t #tiktokindia

khaled hayallah

Open In TikTok:

Region: EG

Monday 27 July 2026 10:18:12 GMT