मुस्ताङ । नेपालको पर्यटन क्षेत्रमा ऐतिहासिक सफलता हात लागेको छ। मुस्ताङमा रहेको शिन्ता मणि मुस्ताङ (Shinta Mani Mustang) विश्वकै नम्बर–१ लक्जरी होटल घोषित भएको छ। रोब रिपोर्टले सार्वजनिक गरेको सन् २०२६ को विश्वका ५० उत्कृष्ट लक्जरी होटलहरूको सूचीमा पहिलो स्थान हासिल गर्दै यस होटलले नेपाललाई विश्व लक्जरी पर्यटनको अग्रपङ्क्तिमा पुर्‍याएको हो। समुद्री सतहबाट करिब २,८०० मिटर उचाइमा रहेको यो होटल कालीगण्डकी उपत्यकाको मनोरम दृश्यसँगै हिमाली संस्कृति, आधुनिक विलासिता र प्राकृतिक शान्तिको अनुपम संगमका रूपमा परिचित छ। होटलमा २९ वटा लक्जरी सुइट रहेका छन्, जहाँ प्रत्येक पाहुनालाई व्यक्तिगत तथा विशिष्ट आतिथ्य सेवाको अनुभव प्रदान गरिन्छ। विश्वप्रसिद्ध होटल डिजाइनर बिल बेन्स्लीले डिजाइन गरेको शिन्ता मणि मुस्ताङको निर्माणमा स्थानीय संस्कृति, तिब्बती प्रभाव, मुस्ताङको मौलिक जीवनशैली तथा प्राकृतिक सामग्रीलाई विशेष प्राथमिकता दिइएको छ। होटलका कोठाबाट नीलगिरि हिमालको आकर्षक दृश्य अवलोकन गर्न सकिन्छ। होटलमा बस्ने पाहुनाहरूका लागि हिमाली पदयात्रा, स्थानीय गाउँ तथा गुम्बा अवलोकन, घोडचढी, योग, ध्यान, परम्परागत तिब्बती उपचार पद्धतिमा आधारित स्पा तथा वेलनेस कार्यक्रमको समेत व्यवस्था गरिएको छ। यही कारणले शिन्ता मणि मुस्ताङ केवल बस्ने ठाउँ मात्र नभई संस्कृति, अध्यात्म र प्रकृतिको विशेष अनुभव प्रदान गर्ने लक्जरी गन्तव्य बनेको छ। विश्वका प्रतिष्ठित ट्राभल विशेषज्ञहरूको मूल्याङ्कनका आधारमा नम्बर–१ स्थान प्राप्त गरेको यो उपलब्धिले नेपाल केवल ट्रेकिङ र हिमाल आरोहणका लागि मात्र नभई विश्वस्तरीय लक्जरी पर्यटनको केन्द्रका रूपमा पनि स्थापित हुन सक्ने सन्देश दिएको छ। पर्यटन विज्ञहरूका अनुसार यसले नेपालमा उच्चस्तरीय विदेशी पर्यटक भित्र्याउन तथा लक्जरी पर्यटनको नयाँ सम्भावना खोल्न महत्वपूर्ण भूमिका खेल्ने अपेक्षा गरिएको छ। #foryourpage❤ #BREAKING #fypシ #ताजाखबर - @razanji8