الرد على @user7485685294976 الساعة 12 بليل في شارع مدني في أمان الله معاي صحبي فجأة نور العربية كشف لينا بت واقفة طرف الشارع وبتأشر لينا. كنا مسافرين من الخرطوم ماشيين على مدني وفي شوية حاجات أخرتنا من الطلوع عشان كده الليل نزل علينا ونحن في الشارع. الشارع كان فاضي تماما وخلا وكنت سابق بسرعة متوسطة عشان شارع مدني معروف كعب شديد مدثر صحبي كان راكب جنبي ومولع سجارتو وماسك في تلفونو بتصفح فيهو وكنا مشغليين اغنية بصوت منخفض وماشيين برواااقة. وفجأة وانا سايق بديت المح خيال بعيد في نهاية الشارع، عقدت حواجبي بإستغراب وضيقت عيوني بحاول اشوف الحاجة دي حقيقة ولا خيال وانا بقرب راسي من القزاز القدامي شفت انو فعلا في حاجة واقفة بي جانب الشارع مديت يدي وغيرت نور العربية للنور الطويل والنور طوالي كشف في الزول الواقف واتفاجئت لمن لقيتها بت. مدثر انتبه اني غيرت النور ورفع راسو عاين قدامو باستغراب وبعدين عاين لي وقالي : "مالك؟". أشرت ليهو بأصبع يدي الماسك بيها الدركسون وقلت ليهز شوف البت دي. عاين محل ما بأشر واستغرب اكثر مني وقالي : " غريبة، الجايبها هنا زي الزمن ده شنن وجات من وين اصلا؟ ما اظن في بيوت قريبة هنا". قلت ليهو :" الله اعلم يمكن الشارع انقطع بيها خصوصا انو ماف اي عربية زي الزمن دة خلينا كدي نقيف ليها نشوفها ماشة وين". قالي بسرعة : " دقايق يا قصي احتمال معاها ناس قطاعين طرق ودة مجرد شرك ما اكثر سكتت بتفكير وقلت ليهو : صراحة معاك حق بس لو كانت فعلا محتاجة مساعدة؟". مدثر سكت و شهامتو غلبت على خوفو وقالي: "طيب مسدسك معاك صاح ؟" قلت ليهو "اي في درج العربية ، خلينا نشوف حكايتها شنو." اول ما قربنا منها هي رفعت يدها وبقت بتأشر لينا، كانت لابسة عباية وطرحة سودا وكانت بشرتها بيضها عاكسة مع لون العباية. قربنا منها وانا خففت سرعة العربية لغاية ما وقفنا جنبها بالظبط ومدثر نزل القزاز عشان يسألها وهنا اتفاجأنا بي بت اقل ما يقال عنها أنها فاااتنة، كانت ملامحها حلوة شديد عيونها كبيرة ووشها مدور ورموشها وحواجبها غزيرة وسودااااا. مدثر ارتبك لانو ما اتوقع تكون بالجمال دة وليها حق طبعا، اتنحن وقاليها: " السلام عليكم يا اخت خير ان شاء الله واقفة براك في المكان دة في الوقت المتأخر دة". هي قربت من الشباك بتعبير حسيت بيها جامدة وقالت ليهو: " انقطعت هنا وما قدرت اصل للحلة بتاعتنا". قاليها : " الحلة بتاعتكم وين في شارعنا ؟". قالت ليهو ايوا قدام شوية كده". عاين لي بابتسامة ورجع عاين ليها وقاليها :" خلاص اركبي نوصلك معانا". هي ابتسمت ابتسامة بسيطة ومشت فتحت الباب الورا وخلت مدثر يتكشم ساي وظاهر انو مبسوط بس انا كنت عكسي تماما عاينت ليها بالمراية وهي بتركب كنت حاسي بيها غريبة غريبة بشرتها كانت بيضا لكن باااهتة وتحس انها شفافة كده حتى حركتها كانت خلفية وأكاد أجزم انو العربية ما اتحركت اثناء ما هي بتركب. حسيت اني ما متطمن بس حاولت ما اركز وقلت في نفسي "عادي يا قصي". استعدلت بالعربية وطلعت في الزلط تاني وبقينا متحركين والجو كان هادي عدا صوت الاغاني البعيد الجاي من مسجل العربية. كنت بعاين ليها بالمراية بين كل لحظة والتانية، كنت حاسي امها عارفاني بعاين ليها. مدثر قاليها بإبتسامة : وانتي اسمك منو يا اخت؟". قالت ليهو :" أنا اسمي مليحة " قاليها : " مليحة ؟ أول مرة اسمع بيهو معناها شنو؟" قالت ليهو: " الجميلة أو الحسناء". قاليها: ايوااا. فعلا ما شاء الله اسم هلة مسمى طيب والوالد الكريم اسمو منو ؟" قالت ليهو :" دهليز". قاليها :" منو منو ؟". قالت: "دهليز، ومعناهو طريق أو مدخل". قاليها: "أها، كويس". انا عاينت ليهو مسافة بحاول اقوليهو انت بتعمل في شنو ودي شنو البت الغريبة والاسماء المغرب دي. هو عاين لي ورفع حواجبو بتساؤل وكانو بقولي "مالك؟".✨❤️‍🩹 يتبع - @siddig5007