@aztimes.az: Xəzər rayon sakinindən ağır ittihamlar: "Qardaşım pulu tələb etdiyim üçün məni intim görüntülərlə şantaj etdi" Xəzər rayon sakini İmanova Güllübəyim İbrahim qızı Aztimes.az saytına müraciət edərək ailəsində yaşandığını iddia etdiyi hadisələr barədə danışıb. Onun sözlərinə görə, uzun illər övladı olmadığı üçün doğma qardaşı İbrahimov Taleh İbrahim oğlunun qızını bütün qanuni prosedurlara əməl etməklə övladlığa götürərək böyüdüb. Güllübəyim İmanova bildirir ki, qız 9-cu sinifdə oxuduğu zaman bioloji valideynləri ona əsl valideynlərinin Güllübəyim İmanova və onun həyat yoldaşı olmadığını deyiblər. Onun iddiasına görə, məhz bundan sonra övladlığa götürdüyü qızla münasibətlər kəskin şəkildə pisləşib. O qeyd edir ki, qız təhsildən tamamilə uzaqlaşıb, 18 yaşı tamam olan kimi isə digər əmisi oğlu ilə ailə quraraq onu böyüdən valideynlərlə əlaqəsini tamamilə kəsib. Müraciət müəllifinin sözlərinə görə, hadisədən təxminən altı il sonra qız yenidən onların evinə gələrək bioloji valideynlərinin, qaynanasının və qaynatasının Güllübəyim İmanova ilə görüşməsinə icazə vermədiyini bildirib. Güllübəyim İmanova onu bağışladığını və yenidən evlərinə gəlib-getməsinə şərait yaratdığını deyir. Lakin bir müddət sonra evdən mütəmadi şəkildə pul itdiyini bildirən Güllübəyim İmanova iddia edir ki, araşdırma zamanı ümumilikdə 8 min 500 manat pulun yoxa çıxdığı müəyyən edilib. Onun sözlərinə görə, həmin dövrdə evə mütəmadi gəlib-gedən yeganə şəxs övladlığa götürdüyü qız olub. Məsələnin ictimailəşməsini istəmədiyini deyən Güllübəyim İmanova qardaşı Taleh İbrahimovla görüşərək baş verənlər barədə ona məlumat verdiyini bildirib. Onun iddiasına görə, bundan sonra qızın həyat yoldaşı 3 min 500 manatı gətirərək təhvil verib və qalan məbləğin də sonradan ödəniləcəyini vəd edib. Lakin Güllübəyim İmanovanın sözlərinə görə, Taleh İbrahimov qalan pulun qaytarılmasına etiraz edib. O iddia edir ki, pulun tələb olunacağı təqdirdə qardaşı əlində olduğunu söylədiyi intim görüntüləri yayacağı ilə onu şantaj edib. Müraciət müəllifi bildirir ki, bundan sonra həm qardaşı Taleh İbrahimov, həm də qardaşı oğlu Mirəlim Taleh oğlu İbrahimov barəsində aidiyyəti dövlət qurumlarına çoxsaylı müraciətlər edib. Onun iddiasına görə, Mirəlim Taleh oğlu İbrahimov hərbi xidmətdən yayınmaq məqsədilə külli miqdarda pul ödəyərək saxta hərbi bilet əldə edib. Güllübəyim İmanova bu iddialarla bağlı Hərbi Prokurorluğa və digər hüquq-mühafizə orqanlarına müraciət edərək məsələnin araşdırılmasını xahiş etdiyini bildirib. O, həmçinin iddia edir ki, Mirəlim Taleh oğlu İbrahimovun hansı sənədlər əsasında hava limanında işə qəbul olunması, eləcə də tam sağlam olmasına baxmayaraq ona əlillik təyin edilməsi araşdırılmalıdır. Bu məqsədlə Əmək və Əhalinin Sosial Müdafiəsi Nazirliyi, Hərbi Prokurorluq və digər aidiyyəti dövlət qurumlarına dəfələrlə müraciət etdiyini deyən Güllübəyim İmanova bildirir ki, indiyədək həmin müraciətlərinə nəticə etibarilə cavab verilməyib. Güllübəyim İmanova daha sonra iddia edir ki, qarşı tərəf tərəfindən özü və ailə üzvləri ölümlə hədələnirlər. O və həyat yoldaşı həyatlarının təhlükədə olduğunu bildirərək aidiyyəti dövlət qurumlarından təhlükəsizliklərinin təmin olunmasını, səsləndirdikləri iddiaların obyektiv araşdırılmasını və qanunamüvafiq tədbirlərin görülməsini xahiş edirlər. Qeyd: Yazıda yer alan bütün məlumatlar müraciət müəllifi Güllübəyim İmanovanın iddialarına əsaslanır. Yazıda adı çəkilən şəxslərin və aidiyyəti dövlət qurumlarının mövqeyi təqdim olunacağı təqdirdə dərc ediləcək.

Pərvin Abışova ( AzTimes)

Open In TikTok:

Region: AZ

Thursday 30 July 2026 14:24:34 GMT