Апелляциялық сот өмір бойына жылқы баққан 60 жастағы Рахат Сәрсеновті түрмеден босатты. Қожалық иесінің арызынан кейін оны 100 жылқы жымқырды деген айыппен 7 жылға соттатып жіберді. Жылқышының мойнына 30 млн теңге ілінген. Апелляцияда ұсынылған қосымша дәлелдерден кейін бір жылқының ғана жоғалғаны анықталды. Ақтөбе облыстық сотында өткен апелляциялық сот отырысы қуаныштың көз жасымен аяқталды. 60 жастағы жылқышы Рахат Сәрсеновке кесілген жаза өзгерді. Ол сот залынан босап шықты. 28 жасында жылқының құлағында ойнап, жылқышы болған азаматтың бүгінде бір қол, бір аяғы істемейді. Сөйлейуі де қиындаған. Тек жылай берді. Бауыры Алтынай Сәрсенова бауырының өмірін түгелдей жылқы бағуға арнағанын айтып, қожалық иесін оның еңбегін бағаламады деп айыптады. “Қан қысымы 250-280-нен түспейді. Қаншама укол, система алып жатыр. Жағдайы қатты нашар. Інім 1994 жылдан бастап Тәжіғалидің жылқысын бақты. Ауылда күйлі отырған жерінен таныстары жылқы бағуға алып кетті. 33 жылдан бері жылқының соңында жүрді. 28 жасында жылқы бағуды бастады. Түрмеде отырғанда 60 жасқа толды. Айдалада мал бағып жүріп, инсульт алып құлады. Балалары тауып әкеліп ауруханаға салды. Сол ауырып жатқан кезде үстінен арыз жазып қаматты. Мойнына 100 бас жылқы ілді. Бұның сауаты жоқ, қорыққанынан қол қойып берген. Жазылғанды түсінбейді. Соның кесірінен 2 ай 20 күн қамауда отырды. 33 жыл жылқы баққан еңбегі бағаланған жоқ. Тіпті үйін де банкке кепілге қойыпты. Оны өздері де білмейді. Нотариусқа апарып, қол қойдырған, бірақ не үшін қол қойғандарын түсінбеген. Психологтар да көмектесті, соған алғыс айтамын. Қазір сөйлеуі қиын, бір қолы мен бір аяғы толық жұмыс істемейді. Киімін де өзі кие алмайды, сөзі анық емес.Инсульт алса да, мүгедек болса да арамызда қарайып отырғанына қуаныштымын. Барлығымыз осының соңында жүрміз. Апта сайын түрмеге барамыз, барған сайын жағдайын көріп, жылап кететін едік”,-деді ашынған апасы Алтынай Сәрсенова. Сот отырысында жылқышының өзі ештеңе айта алмай, үнсіз жылай берді. Мал соңында жүріп қарайып қалған әйелі де 2-топ мүгедегі. Бес баланың анасы жолдасының жазықсыз күйіп кеткенін айтты. “Жылқым жоқ деп жала жапты. Бір бас жылқы ғана. Бір балаға жылқыны міне тұруға берген. Бала 500 мыңға сатып алдым деп өтірік айтып тұр. Атты босқа мінді ол. Менің күйеуім жазықсыз сотталып отыр. Оның зейнетақысына дұрыс ақша түспеді, өмір бойы еңбек демалысын алмаған, еңбек өтілі мүлде жүрмеді”,-деді жвлқышының әйелі Райхан Сәрсенова. Қорғаушының айтуынша, сотталушы 1993 жылдан бастап жылқышы болып жұмыс істеген. Айыптаудп 100 бас жылқыны ұрланды деп көрсеткен. Алайда қосымша дәлелдеме ұсынғаннан кейін тек 1 бас жылқы жоғалғаны анықталды. “Ақтөбе облысы Мұғалжар ауданы сотының 2026 жыл 15 мамырдағы үкімі өзгертілсін. Рахат Сәрсеновтың іс әрекеті Қылмыстық кодекстің 189-бабы 4-бөлігі 2-тармағынан ҚК-тің 189-бабы 1-бөлігіне қайта саралансын. Оған 6 ай мерзімге бас бостандығынан шектеу жазасы тағайындалсын. Рақымшылық жасау заңымен тағайындалған 6 ай бостандығынан шектеу жазасы 2/1 бөлігіне, яғни 3 айға қысқартылсын. Күзетпен ұстау кезіндегі әр күні 2 күн деп есетеліп, бас бостандығынан шектеу жазасы өтелген деп саналсын, қамаудан дереу босатылсын”,-деді судья. Сонымен қатар, материалдық залал мөлшері 30 млн теңгеден 600 мың теңгеге дейін төмендетілді. - @stan.kz