@aviationtanzania: Tofauti na ilivyo katika ndege nyingi za kijeshi na za abiria, ndege ya Lockheed U-2 “Dragon Lady” ina utaratibu wa kipekee wakati wa kutua. Ndege hiyo hutegemea ushirikiano kati ya marubani wawili, ambapo mmoja huwa ndani ya ndege na mwingine akiwa kwenye gari maalum, ili kuhakikisha zoezi la kutua linakamilika kwa usalama. Wakati ndege hiyo inapokaribia kugusa barabara ya kurukia (runway), rubani aliyepo kwenye gari maalum hufuatilia mwendo wake kwa kasi kubwa na kutoa maelekezo kupitia mawasiliano ya redio kwa rubani aliyepo ndani ya ndege. Maelekezo hayo humsaidia rubani kutambua umbali wa ndege kutoka ardhini na muda sahihi wa kugusa barabara, hasa katika sekunde za mwisho za kutua. Utaratibu huu hufanyika kutokana na muundo maalum wa Lockheed U-2 “Dragon Lady”. Rubani wake hukaa juu sana ndani ya chumba cha marubani, jambo linalopunguza uwezo wa kuona vizuri barabara ya kutua. Kazi kubwa ya rubani anayekuwa kwenye gari ni kutoa mwongozo wa ziada unaomsaidia rubani aliyepo ndani ya ndege aweze kutua salama. #u2dragonlady #lockheed #spyplane #usairforce #avgeek
