Maanta waa maalin aanan waligay illoobi doonin… 💔 Maanta waxay ku beegan tahay maalintii Ilaahay hooyaday iga jeclaaday. Maalintii aan waayay qof aanan jiritaankeeda si dhab ah u fahmin ilaa ay iga maqnaatay. Hooyo, tan iyo maalintii aad iga tagtay, adduunku sidii hore ma aha. Waxaa jira meel qalbigayga ka mid ah oo mar walba madhan, meel aan cid kale buuxin karin. 🥺 Waxa ugu xanuunka badan ayaa ah in isla saacaddan aan maanta kula hadlayo la ii sheegay warka geeridaada. Saacaddaas waxay noqotay saacad aan qalbigayga ku xardhan tahay weligeed. Waqtigu wuu socdaa, maalmo iyo bilo way dhaafaan, laakiin xusuusta maalintaas iyo codkii warka lagu ii sheegay weligay ma illoobi doono. 💔 Hooyo, waxaan jeclaan lahaa inaan maanta kula hadlo, inaan codkaaga maqlo, inaan mar kale ku iraahdo “Hooyo waan ku jeclahay,” inaan madaxaaga ag fariisto oo aan dareemo joogitaankaaga. Laakiin waxa ii haray waa xusuustaadii, sawirradaadii, ducada aan kuu sameeyo iyo jacayl aan geeridu awoodin inay iga qaaddo. Waxaan bartay in qofka hooyadii haysta uu haysto nimco aan la qiyaasi karin. Aniguna maanta waxaan garwaaqsaday qiimaha wax badan oo aan markii aad noolayd caadi u moodayay. Waxaan u xiisay hadalkaaga, taladaada, ducadaada, qosolkaaga, naxariistaada iyo xitaa waxyaabihii yaryaraa ee aan mararka qaar iska caadi u qaadan jiray Hooyo, haddii ducadaydu ay kuu gaari karto, waxaan rabaa in ducadayda ugu badan ay noqoto: Ilaahay ha kuu naxariisto, qabrigaagana ha kuu waasiciyo, nuurna ha kaaga dhigo. Ilaahay dambiyadaada ha dhaafo, su’aasha qabriga ha kuu fududeeyo, Jannatul Firdowsana hoygaaga ha ka dhigo. Ilaahayow hooyaday u naxariiso sidii ay ii naxariisan jirtay markii aan yaraa. Ilaahayow u dambi dhaaf, darajadeeda kor u qaad, qabrigana uga dhig beer ka mid ah beeraha Jannada. Ilaahayow haddii ay wax wanaagsan samaysay u siyaadi, haddii ay gef samaysayna cafi. Hooyo, maanta ma joogi kartid si aan kuu iraahdo “waan ku jeclahay,” laakiin qalbigaygu weligiis wuu kuu sheegi doonaa. Ma tihid qof aan illoobay; waxaad tahay qof aan maalin kasta xasuusto, qof ducadiisa aanan ka daalin, iyo qof qalbigayga meel aan cid kale lahayn ku leh Sanad baa laga joogaa maalintii aad iga tagtay, laakiin jacaylka aan kuu qabo maalin kama duugoobo. Waqtigu wuxuu i barayaa inaan la noolaado maqnaanshahaaga, laakiin weligay iima barayo inaan kaa maqnaanshaha jeclaado. Hooyo, Ilaahay ha kuu naxariisto. Waxaan rajaynayaa maalinta aan mar kale kula kulmo meel aan kala-tag iyo geeri midna ka jirin Jannatul Firdows Ilaahayow hooyaday Jannada ugu bishaaree, anigana samir igu sug ilaa maalinta aan mar kale arko. Aamiin yaa Rabbal Caalamiin Hooyo, weli waan kuu xiisay… welina waan ku jeclahay. Ilaahay ha kuu naxariisto. - @00.22.11.5