Bəs siz necə edərdiniz? Atardınız, yoxsa yenidən həyata qaytarardınız? ✨ Köhnə bir masa var idi. Artıq istifadəyə yararsız hesab olunurdu və atılacaqdı. Mən isə onu xahiş edib götürdüm. Çünki ağlımda tam başqa bir fikir var idi. Standart masaların hündürlüyü təxminən 107 sm olur. Mənə isə daha hündür bir iş masası lazım idi. Bu masa paltaryanımın üzərində yerləşəcəkdi. Paltaryanımın hündürlüyü 85 sm olduğuna görə, masanı əlavə hissələrlə qaldıraraq ümumi hündürlüyünü təxminən 110–115 sm etdim. Bunun üçün masanın hər üç tərəfinə təxminən 30 sm hündürlüyündə əlavələr hazırladım. Ön hissəni isə tamamilə açıq saxladım ki, paltaryana rahat yaxınlaşmaq və istifadə etmək mümkün olsun. Sonra Sədərəkdən aldığım, cəmi 20–25 manata başa gələn rəfləri sökərək mənə uyğun ölçüdə yerləşdirdim. Üst hissəyə isə Winchester tipli asılqan əlavə etdim ki, həm funksional, həm də estetik görünsün. Bu kiçik layihə mənim dörd gündən çox vaxtımı aldı. Hər detalı üç dəfə boyadım və hər qatın tam quruması üçün demək olar ki, bir gün gözləməli oldum. Bilirəm ki, istifadə etdiyim material bahalı və uzunömürlü deyil. Zaman keçdikcə üzlüyü aşına və ya qopa bilər. Amma mənim məqsədim atılacaq bir əşyaya ikinci həyat vermək və öz büdcəmə uyğun şəkildə həm funksional, həm də Pinterest-də gördüyümüz o gözəl görüntünü yaratmaq idi. Məncə, hər şey bahalı olmaq məcburiyyətində deyil. Bir az vaxt, bir az zəhmət və bir az fantaziya ilə çox şeyi dəyişmək mümkündür. Bəs siz necə? Köhnə əşyanı atardınız, yoxsa ona ikinci bir şans verərdiniz? 💛 - @elladaeyvazova