خلونا نتفق إنو تلفونات الأمهات قبل سنين ليست ببعيدة إنها شهدت ألاف رسائل الحُب الحقيقي.. الحب الكان مصحوب بالخوف.. مصحوب بفشل المحاولات.. مصحوب بالقلق والتوتر.. زمن كانت التلفونات متوفرة في أيادي محددة،.. يا أما الناس الكبار، أو الناس المكتفية ماديًا،.. التلفون ما كان متوفر عند أي زول.. ووقتها بتلاقي الحب حاضر زمان الحب كان صعب،.. كان عبارة عن محاولات كتيرة بتفشل قبل ما تبدأ.. ودي أكتر حاجة محليّاه وتحسه لذيذ وجميل جدًا.. وشعوره مختلف في أي لحظة.. نرجع للذاكرة من كم سنة بس خلوني أقول زمان.. يخوانا زمان الواحد لو حب ليهو طالبة إجازة الجمعة والسبت بشوفها سنتين،.. لأنو ما بشوفها وصباح الأحد بتلقاهو جالس علي الأرصفة منتظر حبيبو يحلي صباحه،.. زمان الواحد كان بكون عارف زولو ما عندو تلفون لكن بتلقاهو شايل NoteBook بدوّن فيها أي لحظة،.. بتلقاهو حافظ رقم البيت حقهم، بتلقاهو حافظ رقم الصاحب البقعد معاهو طوالي،.. بالذات الأولاد في الزمن داك الواحد تلقاهو حافظ رقم خالتها وعمتها وحبوبتها وامها.. وممكن يتصل في الأسبوع مرة بتلفون صاحبو البقعد في البيت يوم الجمعة بس من غير ما يعاتبوه، وحتى لما يلقى فرصة تلفون بتلقاهو متردد لأنو بكون خائف ويده علي قلبه بالذات لما يتصل في تلفون البيت، تلقاهو أتصل وقاعد يرجف وبعد يردو ليه يسكت مسافة يشوف منو العايز يتكلم،.. هل نبرة حبيبو المألوفة ولا زول تاني، أول ما يسمع ألو من زول تاني بنسحب ويقول (معليش متصل غلط!). في حين انه تلقاهو هو موصيها ما تحفظ الرقم وتسجلو، لكن بكون راسخ في ذهنها في أقرب ملف بترن عليهو، ياخ كان داير يشوفها ساي، الا بالصدفة ينتظر عرس قريبها المغترب الما فكر ينزل السودان زاتو.. ما زي هسي،.. هسي الحب بقى ساهل وهامل ساي، أي زول يحب من غير محاولات، اي زول حبيتو بتلقاهو ساهل وقاعد ليك طرف كأنو راجيك تحبو، لو قلت ليهو تعال نتلاقى في المكان الفلاني، تلقاهو هو وصل المكان قدامك وقاعد منتظرك بدل أنت منتظر.. تقول ليهو بحبك عادي من غير ما قلب يتحرك،.. تلقاهو ماسك يدها ولافي بيها في الشوارع زي المتزوجها، تلقاهم قاعدين في أي لفّة ولا عليهم.. هسي اللقاء بسموهو (ديت).. تلقاهو في كافي عام او حديقة، لكن زمان أسمها (الشوفة) بتكون لمحة ساي مارقة من الدكان تبقى ليك مسكن شهر،.. شهر انت بتكرر المشهد في ذهنك، النظرات، الضحكة المدسوسة من المارة، وإشارة اليد بالوداع طالعة من تحت التوب.. صراحة الحب هسي مسيخ لأنو بقى ساهل جدًا وفي متناول اليد، وتحسه فيه تصنع.. أسمحو لي بس، لكن الناس العاشت الحب زمان ح تعرف الفرق بين الليلة وأمس.. - @de127mon508