وفاقی وزیر ریلوے محمد حنیف عباسی کی خصوصی ہدایات پر آئی جی پاکستان ریلویز پولیس کا کراچی میں بڑا آپریشن، کروڑوں روپے مالیت کی چوری شدہ ریلوے پٹریاں اور تقریباً 32 ٹن ریلوے میٹریل برآمد، 6 ملزمان گرفتار- ترجمان پاکستان ریلویز کے مطابق ریلوے پولیس نے اورنگی ریلوے اسٹیشن کے قریب کارروائی کرتے ہوئے ریلوے پٹریاں چوری کرنے والے 4 ملزمان کو رنگے ہاتھوں گرفتار کیا۔ ملزمان کے قبضے سے ریلوے پٹریاں کاٹنے میں استعمال ہونے والے آلات بھی برآمد کر لیے گئے۔ گرفتار ملزمان کی نشاندہی پر ہارون آباد کے ایک گودام پر چھاپہ مارا گیا جہاں سامان اور مشینری کے نیچے چھپایا گیا تقریباً 32 ٹن چوری شدہ ریلوے میٹریل برآمد ہوا، جبکہ مزید 2 ملزمان کو بھی گرفتار کر لیا گیا۔ وفاقی وزیر ریلوے محمد حنیف عباسی نے کارروائی کو سراہتے ہوئے کہا کہ ریلوے کے قومی اثاثوں پر قبضہ، چوری یا ان کی غیر قانونی خرید و فروخت کسی صورت برداشت نہیں کی جائے گی۔ انہوں نے واضح کیا کہ ان کی ہدایت پر ریلوے کے قومی اثاثوں کے تحفظ کے لیے زیرو ٹالرنس پالیسی کے تحت بلاامتیاز کارروائیاں جاری رہیں گی۔ آئی جی پاکستان ریلویز پولیس محمد وصال فخر سلطان نے کہا کہ ریلوے میٹریل چوری اور قومی اثاثوں کو نقصان پہنچانے والے عناصر کے خلاف کریک ڈاؤن مزید تیز کیا جا رہا ہے۔ انہوں نے کہا کہ ریلوے انفراسٹرکچر اور قومی اثاثوں کے تحفظ پر کوئی سمجھوتہ نہیں کیا جائے گا اور قانون شکن عناصر کو ہر صورت قانون کے کٹہرے میں لایا جائے گا۔ انہوں نے مزید بتایا کہ چوری شدہ ریلوے میٹریل کی خرید و فروخت میں ملوث منظم نیٹ ورک کے خلاف تحقیقات جاری ہیں اور مزید گرفتاریوں کے لیے کارروائیاں تیز کر دی گئی ہیں۔ پاکستان ریلویز پولیس نے اس عزم کا اعادہ کیا کہ قومی اثاثوں کا تحفظ اور مسافروں کو محفوظ سفری سہولیات کی فراہمی اس کی اولین ترجیح ہے۔ - @mor_pakistan