Axmed Cali Cigaal iyo Maryan Mursal waxay ahaayeen laba fanaan oo da'yar, aadna caan u ahaa, kuwaas oo mid walba lahaa hibadiisa gaarka ah ee ay dadku aad u jeclaayeen. Waxay ku jireen xilligoodii ugu quruxda badnaa ee fanka, waxayna ka tirsanaayeen Kooxdii Waberi. Jacaylkoodu wuxuu ku billowday si qarsoodi ah. Axmed iyo Maryan waxay ku heshiiyeen in xiriirkooda aan cidna loo sheegin, balse sir lagu hayo. Maryan way aqbashay arrintaas, hase yeeshee mar dambe ayay u sheegtay gabdhihii kale ee Kooxda Waberi, kuwaas oo qaarkood iyaguna Axmed xiisaynayay ama jeclaa. Markii sirtii bannaanka timid, dad badan ayaa ogaaday xiriirkooda. Axmed aad buu uga xumaaday, isagoo u arkay in Maryan jebisay ballantii dhex taalay. Dareenkaas ayuu ku qaaday hees ay ka mid ahaayeen ereyadan: "Maxaa sheekadeennii yarayd, haweenkii oo dhan loogu ururiyey xaflad, shalayna loo sheegay?" Heestaas ka dib, xiriirkoodii wuu hakaday. Si kastaba ha ahaatee, muddo ka dib way heshiiyeen, waxayna ugu dambayn is guursadeen. Arooskoodu wuxuu noqday mid si weyn loo hadal hayey xilligaas, waxaana xitaa ka qayb qaatay dowladdii kacaanka ee markaas jirtay. Nasiib darro, inkastoo arooskooda si weyn loo dabaaldegay, labada qoys—gaar ahaan qoyska Axmed—kuma faraxsanayn guurkooda. Si kastaba ha ahaatee, Axmed wuxuu ku adkaystay jacaylkiisa. Waxay isu dhaleen laba wiil oo lagu kala magacaabo Maxamed iyo Cabdulqaadir. Ugu dambayn, Axmed iyo Maryan way kala tageen. Axmed wuxuu guursaday Qadro Daahir Cigaal. Maryan Mursal, oo mar BBC-da uga warrantay sheekada jacaylkooda, waxay sheegtay inay weli xiriir iyo is-ogaal la lahayd Axmed. Kadib furriinka, Maryan waxay la noolaatay labadoodii wiil. Mid ka mid ah wuxuu raacay waddadii fanka ee aabbihii, halka kan kalena noqday wadaad/sheekh masaajid. Sida lagu sheegay sheekadan, waxa ugu weyn ee burburiyey jacaylkii Axmed iyo Maryan wuxuu ahaa qabyaalad iyo cunsuriyad, arrin weli bulshada ka jirta. Maanta waxaa geeriyooday Axmed Cali Cigaal. Ilaahay ha u naxariisto, janadiisana ha ka waraabiyo. Maryan Mursalna weli way nooshahay. Ilaahay ha dheereeyo cimrigeeda, caafimaad iyo cibaado suubbanna ha siiyo. - @biindhe20