والله بكتب الكلام دا وجواي كمية من الألم والجرح الما بتوصف نهائي. أصعب شعور ممكن تمر بيهو في حياتك إنك تعيش وحيدة وسط زحمة الناس وملمومين حواليك. تكتشف فجأة إنك محاطة بوجوه مزيفة وما حقيقية، وعلاقات هشة شديد بتطير وتختفي مع أول لفة وأول ملمة ضيق.مشكلتي الكبيرة إني طيبة مرات بقول انا غبية ، وبتعلق بسرعة بالناس وبقرب منهم بصدق وصفاء نية، وفي اللحظة البفتكر فيها إنهم خلاص بقوا لي سند وضهر... بيتخلوا عني بكل سهولة وبدون أي سبب مقنع. تعبت عديل من إعطاء مكانة وقيمة لناس ما بتستاهل أصلاً، وتعبت أكون أنا دايماً الشخص الاحتياطي البتم استبداله في أي وقت.الكل طلع ما حقيقي، مجرد عابرين فترات وماشين. أكبر غلطة برتكبها في حق نفسي هي التعلق السريع دا، وفي النهاية فجأة بلاقي نفسي واقفة لوحدي في الصقيع والكل اتخلى عني. الوحدة العايشها هسي دي صعبة وبتحرق، بس والله أرحم بمليون مرة من لمت ناس بتمثل الاهتمام وبيدعوا المحبة.علمتني الصدمات الأخدتها في راسي إنو المشاعر السريعة دي بتدفع تمنها غالي ومن دم قلبك. كنت دايماً بجري بقلبي الأبيض للناس وبتعلق بيهم سريع، بس الواقع صدمَني وفوقني على إنو الكل بيتخلى في النهاية، والعلاقات الزمن دا بقت كلها مصالح وتطليع مصلحة، ومافي أي زول حقيقي بمشي معاك لآخر الدرب.عشان كدا من اليوم وجاي، الوحدة هي الخيار الصح والأنسب عشان أحمي بيها قلبي ونفسي. والله عندي صحبات ومعارف كتار لكن كله طلع مصطنع ومجاملات فارغة. أحياناً كتيرة بحس إنو صداقات البنات دي بالذات بقت مصطنعة وفوق الجلد بس، ما كلهن طبعاً عشان ما نظلم الكل، لكن الأغلبية بقوا كدا. الراحة الحقيقية لمن تلقى الصداقة المخلصة، الجادة، والواقفة معاك في الشينة قبل السمحة. 💔دمتم بخير وعافية. - @user6022008872828