ဒလမြို့နယ်မှ အသက် ၁၆ နှစ် အရွယ် နှလုံးရောဂါသည် မောင်မြင့်မြတ် နှင့် အသက် ၁၉ နှစ်အရွယ် မောင်ဌေးဝင်းနိုင်တို့ ညီအစ်ကို ၂ ဦးကို စစ်မှုထမ်းအဖြစ် လိမ်လည်ခေါ်ဆောင်ရောင်းစားသွား၍ မိခင်ဖြစ်သူက အကူအညီတောင်းခံ (ရုပ်/သံ) ရန်ကုန်၊ ဩဂုတ် ၃ ရန်ကုန်တိုင်း၊ ဒလမြို့နယ်၊ ရဲဇောင်းကျေးရွာအုပ်စု၊ မင်းရွာဆိပ်ကြီးကျေးရွာမှ မွေးရာပါ နှလုံးရောဂါအခံရှိသည့် အသက်မပြည့်သေးသော လူငယ် ၁ ဦးအပါအဝင် ညီအစ်ကို ၂ ဦးကို လွန်ခဲ့သည့် ဇူလိုင်လ ၂၁ ရက်နေ့တွင် အလုပ်အကိုင် မက်လုံးပြကာ စစ်မှုထမ်းရန် လိမ်လည်ခေါ်ဆောင်၍ စစ်တပ်ထံ ရောင်းစားခဲ့ကြောင်း မိခင်ဖြစ်သူက ရန်ကုန်ခေတ်သစ်သတင်းဌာနထံသို့ ပြောဆိုသည်။ စစ်တပ်ထံသို့ လိမ်လည် ရောင်းစားခံရသူ ညီအစ်ကို ၂ ဦးမှာ ဒလမြို့နယ်၊ မင်းရွာဆိပ်ကြီးကျေးရွာမှ အသက် ၁၆ နှစ်အရွယ် မောင်မြင့်မြတ် နှင့် အသက် ၁၉ နှစ်အရွယ် မောင်ဌေးဝင်းနိုင်တို့ ဖြစ်ကြောင်း၊ မောင်မြင့်မြတ်မှာ မွေးရာပါ နှလုံးရောဂါအခံအပြင် ဉာဏ်ရည်မပြည့်သည့် စိတ်ရောဂါအခံရှိသူဖြစ်ပြီး မောင်ဌေးဝင်းနိုင်မှာလည်း မွေးရာပါ နှလုံးရောဂါအခံရှိသူ ဖြစ်ကြောင်း မိခင်ဖြစ်သူက ရှင်းပြသည်။ ညီအစ်ကို ၂ ဦးစလုံးမှာ စာပေမတတ်မြောက်ကြဘဲ အရမ်းကြောက်တတ်သည့် သဘာဝရှိကြောင်း၊ ဇူလိုင်လ ၂၁ ရက်နေ့ အဆိုပါ ညီအစ်ကို ၂ ဦးသည် လမ်းမတော်မြို့နယ်၊ ကမ်းနားလမ်း၊ ၁၅ လမ်း၌ ဆန်အိတ်ထမ်းသည့် အလုပ်ကို လုပ်ကိုင်နေစဉ် ၁ ရက်လျှင် လုပ်အားခ ၄၅,၀၀၀ ကျပ်ပေးမည်ဆိုသော အိမ်ပြောင်းပေးသည့် အလုပ်ရမည်ဟုဆိုကာ ပွဲစားများက ကားတစ်စီးဖြင့် ရောက်ရှိလာပြီး လိမ်လည်ခေါ်ဆောင်သွားခဲ့ကြောင်း သိရှိရသည်။ ဇူလိုင်လ ၂၁ ရက်နေ့ ထိုသို့ လိမ်လည် ခေါ်ဆောင်ခံရချိန်မှစတင်၍ ပျောက်ဆုံးသွားပြီး ၆ ရက်အကြာ ပွဲစား၏ ဖုန်းနံပါတ်ကို ရရှိခဲ့သဖြင့် မိသားစုက ဆက်သွယ်ခဲ့ရာ လှိုင်သာယာသို့ လာရောက်ရန် ပြောဆိုခဲ့ကြောင်း၊ လှိုင်သာယာသို့ သွားရောက်ရှာဖွေရာတွင် လိပ်စာ အလွဲများ ပြောကာ တစ်ကြိမ်မျှ တွေ့ဆုံခွင့် မရရှိခဲ့ကြောင်း သိရှိရသည်။ ထို့ပြင် ပွဲစားဖြစ်သူက ပျောက်ဆုံးနေသော ညီအစ်ကို ၂ ဦးကို ရှာဖွေစရိတ်ဟုဆိုကာ ၁ သိန်း၊ ၂ သိန်း စသဖြင့် အကြိမ်ကြိမ် ငွေလွှဲခိုင်းခဲ့ခိုင်းကာ မိခင်ဖြစ်သူထံမှ ငွေများ လိမ်ယူခဲ့ကြောင်း သိရှိရသည်။ ဩဂုတ်လ ၁ ရက်နေ့ ပျောက်ဆုံးနေသော သားဖြစ်သူ ၂ ဦးနှင့် ဖုန်း ၅ မိနစ်ခန့် ပြန်လည်ဆက်သွယ်ရရှိခဲ့ပြီး ၎င်းတို့ကိုု ပဲခူးတိုင်း အင်းတကော်တပ်သို့ ဖမ်းဆီးခေါ်ဆောင်သွားခဲ့ကြောင်း၊ ထို့နောက် ၎င်းတို့ကို ရှမ်းပြည်နယ်ဘက်သို့ ထပ်မံ ခေါ်ဆောင်သွားကြောင်း သိရှိရသည်။ ခေါ်ဆောင်သွားသည့် လူပွဲစားဆိုသူများက အသက် ၁၆ နှစ်ကျော် မောင်မြင့်မြတ်ကို "ငါတို့ကို ရောင်းစားတယ်လို့ ပြောရင် မင်းတို့ကို သတ်ပစ်မယ်" ဟု ခြိမ်းခြောက်ပြောဆိုထားသဖြင့် ကလေးများမှာ အလွန်တရာ ကြောက်လန့်နေကြပြီး ပါသွားသည့် ဖုန်းများကိုလည်း ဖုန်းကတ်များ ဖြုတ်ခိုင်းထားကြောင်း သိရသည်။ "ကျမ သား ၂ ယောက်က စာလည်းမတတ်ဘူး၊ ဘယ်မှလည်း မသွားမလာတတ်ဘူး။ မွေးရာပါ ရောဂါလည်း ရှိကြတယ်။ လူတစ်ယောက် ဟောက်လိုက်တာနဲ့တင် ရင်တွေတုန်နေတဲ့ ကလေးတွေပါ။ ကျမ ဘာမှ မလိုချင်ပါဘူး၊ ကလေးတွေကိုပဲ ဘေးကင်းကင်းနဲ့ ပြန်လိုချင်ပါတယ်" ဟု မိခင်ဖြစ်သူက ရန်ကုန်ခေတ်သစ်သတင်းဌာနထံသို့ ပြောဆိုသည်။ လက်ရှိတွင် အဆိုပါ ညီအစ်ကို ၂ ဦး၏ အသက်အန္တရာယ်အတွက် မိခင်ဖြစ်သူက အလွန်အမင်း စိုးရိမ်ပူပန်နေကြပြီး ကလေးများ ဘေးကင်းစွာ ပြန်လည်လွတ်မြောက်ရေးအတွက် အကူအညီများ အရေးပေါ် လိုအပ်လျက်ရှိကြောင်း သိရှိရသည်။@ZayarTBZ 11 News @ZayarTBZ 7.1News🍉 ##ဒေသသတင်းရင်းမြစ် #မြန်မာသတင်း #စစ်တပ်ယုတ်မာမှုပေါင်းစုံငါတို့အသိဆုံး #zayartbz #ပြည်တွင်းသတင်း - @zayartbz7news