ڪجهه محبتون وقت جي مٽي هيٺ دفن ٿي وينديون آهن، پر ڪجهه محبتون اهڙيون به هونديون آهن جيڪي دفن ٿيڻ کان پوءِ به دل جي زمين مان خوشبوءَوانگر اڀرنديون رهنديون آهن. تنهنجي ۽ منهنجي محبت شايد اهڙي ئي محبت هئي. تو وساري ڇڏيو، پر اسان وساري نه سگهيا سين. اِهو ئي فرق هيو تنهنجي ۽ منهنجي محبت ۾. شايد تنهنجي لاءِ محبت زندگيءَجي ڊگهي سفر جو هڪ مختصر موڙ هئي، جتي ڪجهه لمحن لاءِ ترسڻ کان پوءِ تون اڳتي وڌي وئين. پر منهنجي لاءِ اها محبت هڪ مڪمل ڪائنات هئي، جنهن جي هر ستاري تي تنهنجو نالو لکيل هو. مون تنهنجي ڳالهين کي رڳو لفظ نه سمجهيو، مون انهن کي پنهنجي روح جو حصو بڻائي ڇڏيو. تنهنجي مرڪ کي رڳو چهري جي سونهن نه سمجهيم، مون ان کي پنهنجي جيئڻ جو سبب بڻائي ڇڏيو. وقت گذرندو رهيو. موسمون بدلجنديون رهيون. وڻن جا پن زرد ٿي ڪري پيا، وري نوان پن نڪتا. شهرن جا نقشا بدلجي ويا، رستا بدلجي ويا، ماڻهو بدلجي ويا، پر هڪ شيءِ نه بدلي—تنهنجي ياد. اها اڄ به منهنجي دل جي ڪنهن خاموش ڪنڊ ۾ اهڙيءَطرح زنده آهي، جيئن شام جي آخري ڪرڻي افق سان چنبڙي بيٺي هجي. مون ڪيترائي ڀيرا چاهيو ته توکي وساري ڇڏيان. دل جي ڪتاب مان تنهنجو نالو ميساري ڇڏيان. پر ڪي نالا مس سان نه، قسمت سان لکيل هوندا آهن. اهي ڪاغذن تان ته مٽجي ويندا آهن، پر دل جي ڀتين تان ڪڏهن به نه. ڪڏهن ڪڏهن رات جي آخري پهر ۾، جڏهن سڄي دنيا ننڊ ۾ گم هوندي آهي، تڏهن تنهنجي ياد خاموش قدمن سان منهنجي وجود ۾ لهي ايندي آهي. مون کي اهي لمحا ياد ايندا آهن، جڏهن تنهنجي هڪ نظر منهنجي سڄي ڏينهن جي ٿڪاوٽ ختم ڪري ڇڏيندي هئي. اهي ڳالهيون ياد اينديون آهن، جيڪي شايد تو وساري ڇڏيون آهن، پر مون اڄ به پنهنجي دل جي خزاني ۾ سنڀالي رکيون آهن. مون کي هاڻي شڪايت ناهي ته تو وساري ڇڏيو. شايد هر ڪنهن جي محبت جو انداز الڳ هوندو آهي. ڪي ماڻهو محبت کي هڪ خوبصورت قصو سمجهي بند ڪري ڇڏيندا آهن، ۽ ڪي ماڻهو ان کي عبادت سمجهي عمر ڀر نڀائيندا آهن. تون شايد قصي واري پاسي هئين، ۽ مان عبادت واري. اڄ جيڪڏهن ڪو مون کان پڇي ته محبت ڇا آهي؟ ته مان تنهنجو نالو نه کڻندس، پر ايترو ضرور چوندس ته محبت اها آهي، جيڪا جدائيءَکان پوءِ به ختم نه ٿئي. محبت اها آهي، جيڪا وسارڻ جي هزارين ڪوششن باوجود دل مان نه نڪري. محبت اها آهي، جيڪا ڪنهن جي غير موجودگيءَ۾ به سندس موجودگيءَجو احساس ڏياريندي رهي. ۽ شايد انهيءَڪري اڄ به دل خاموشيءَسان اهو ئي جملو ورجائيندي رهي ٿي: "تو وساري ڇڏيو، اسان وساري نه سگھياسين؛ اِهو ئي فرق هيو تنهنجي ۽ منهنجي محبت ۾." 💔🥀 - @johi_waro.01