Bu gün sizi Qarabağın qədim mətbəx nümunələrindən biri – Ağdam üsulu Çolpalı Zirəli Aşı ilə tanış edirəm 🇦🇿🇦🇿 Qədim Qarabağ mətbəxinin, xüsusilə Şuşa və Ağdam bölgəsinin maraqlı nümunələrindən biri olan Çolpalı Zirəli Aş bu gün də hazırlanır. Lakin qədimdə olduğu kimi aşın bütöv kənd beçəsi ilə bişirilməsi ənənəsi zaman keçdikcə az-az tətbiq olunmağa başladı. Sonralar xanımlar süfrəyə daha səliqəli təqdim etmək və paylanmasını asanlaşdırmaq məqsədilə bütöv kənd beçəsi əvəzinə onu tikələrə ayıraraq hazırlamağa üstünlük verdilər. Beləliklə, döşəməli aş variantı daha geniş yayıldı, bütöv kənd beçəsi ilə hazırlanan qədim üsul isə zamanla kölgədə qaldı. Bu aş əsasən yay mövsümündə, gilə meyvələrinin və yemişin bol olduğu vaxt hazırlanardı. Qarabağda, xüsusilə də Şuşada, Ağdamda, mövsümi gilə meyvələri ilə bişirilən bu aş süfrəyə mütləq yemişlə birlikdə təqdim olunardı. Bu, bölgənin qədim süfrə mədəniyyətinin özünəməxsus ənənələrindən biri idi. Bu gün biz həmin qədim hazırlanma ənənəsini yenidən yaşatmağa çalışırıq. Milli mətbəximiz kimi, milli geyimlərimiz də xalqımızın tarixini, kimliyini və zəngin irsini özündə yaşadır. Bu dəyərləri qorumaq və gələcək nəsillərə çatdırmaq hər birimizin mənəvi borcudur. @milligeyimevi_alaca kollektivinə səmimi əməkdaşlıq və dəstəyə görə təşəkkür edirəm. 🌹 🌾 Qarabağ üsulu Çolpalı Zirəli Aş 🇦🇿🇦🇿 Lazım olan ərzaqlar: • 3 ədəd kənd beçəsi • 10 stəkan düyü • 2 kq soğan • 400 q əridilmiş kərə yağı (soğanı qovurmaq üçün) • 500 q donmuş kərə yağı (düyünün üzərinə qoymaq üçün) • Duz • Qara istiot • Sarıkök • Darçın • Zirə • Zəfəran dəmi • 200 q böyürtkən • 150 q qarağat • 200 q albalı • 200 q zoğal Qazmaq üçün: • 200 q un • 1 yumurta • 30 q kərə yağı • Duz • 2 xörək qaşığı qatıq (təxmini) • 1 çimdik sarıkök Yumşaq xəmir yoğrulur. Hazırlanma qaydası: Əvvəlcə böyürtkən və qarağatdan bir miqdar götürülərək əzilir. Üzərinə duz və qara istiot əlavə olunub qarışdırılır. Hazırlanan bu marinad çiy kənd beçələrinin həm içinə, həm də üzərinə yaxşıca yedirilir və bir müddət marinad olunmağa qoyulur. Soğanlar samanvari doğranaraq 400 qram əridilmiş kərə yağında duz əlavə olunaraq qızılı rəng alana qədər qovrulur. Soğan hazır olduqdan sonra üzərinə zoğal, böyürtkən, albalı və qarağat, şəkər tozu, darçın, sarıkök əlavə edilir və gilə meyvələri yağa düşənə qədər birlikdə qovrulur. Marinad olunmuş kənd beçələrinin içi hazırlanan soğanlı-gilə meyvəli qarışıqla doldurulur. Düyü duzlu suda yarıbişmiş vəziyyətə gətirilərək süzülür. Qazana qazmaq düzülür. Qazmağı öz zövqünüzə uyğun müxtəlif formalarda kəsə bilərsiniz. Mən bu dəfə xalça naxışlarımızdan və böyürtkən salxımlarından ilham alaraq qazmağa böyürtkən salxımı forması verdim. Siz də zövqünüzə uyğun naxış və formalardan istifadə edərək süfrənizə öz yaradıcılığınızı qata bilərsiniz. Qazmağın üzərinə nazik qat düyü səpilir. Daha sonra içi doldurulmuş bütöv kənd beçələri yerləşdirilir. Üzəri qalan düyü ilə tam örtülür. Düyünün üzərinə 500 qram donmuş kərə yağı düzülür, zirə səpilir və aş zəif odda dəmə qoyulur. Aş tam dəmə düşdükdən sonra üzərinə dəmlənmiş zəfəran gəzdirilir. 🍈 Ənənəyə uyğun olaraq Çolpalı Zirəli Aş süfrəyə mütləq yemişlə birlikdə təqdim olunur. Nuş olsun! 🔉Arif Babayev