کلرسیداں: اسسٹنٹ کمشنر ڈاکٹر سیدہ زینب حسین کی زیرِ نگرانی جامع مسجد دوبیرن کلاں کا تنازع خوش اسلوبی سے حل، اکثریت نے 40 سالہ انتظامی کمیٹی پر اعتماد کا اظہار کر دیا کلرسیداں میڈیا سروس کلرسیداں: اسسٹنٹ کمشنر کلرسیداں ڈاکٹر سیدہ زینب حسین کی زیرِ نگرانی جامع مسجد دوبیرن کلاں کے انتظامی معاملات سے متعلق ایک اہم جرگہ منعقد ہوا، جس میں علاقے کے معززین، عمائدین اور بڑی تعداد میں اہلِ علاقہ نے شرکت کی۔ اجلاس کے دوران دونوں مؤقف تفصیل سے سنے گئے، جس کے بعد رائے شماری اور اکثریتی رائے کی بنیاد پر موجودہ انتظامی کمیٹی کے حق میں فیصلہ سامنے آیا۔ اجلاس میں موجود شرکاء کے مطابق 70 سے زائد افراد نے گزشتہ تقریباً 40 سال سے مسجد کے انتظامی امور سنبھالنے والی کمیٹی پر اعتماد کا اظہار کیا، جبکہ نئی کمیٹی کی حمایت میں 8 سے 10 افراد سامنے آئے۔ اکثریتی رائے کے بعد موجودہ انتظامی کمیٹی کو مسجد کے انتظامی امور بدستور جاری رکھنے کی حمایت حاصل ہوئی۔ اجلاس میں اس بات پر بھی زور دیا گیا کہ مسجد اللہ کا گھر ہے، لہٰذا اس کے معاملات اتفاق، باہمی احترام اور مشاورت سے چلائے جائیں تاکہ علاقے کا اتحاد برقرار رہے۔ فیصلے کے بعد متعدد اہلِ علاقہ نے اسسٹنٹ کمشنر ڈاکٹر سیدہ زینب حسین کا شکریہ ادا کرتے ہوئے کہا کہ انہوں نے معاملے کو تحمل، غیر جانبداری اور دانشمندی سے سنا اور پرامن ماحول میں فیصلہ سازی کا عمل مکمل کروایا۔ شرکاء نے یہ بھی کہا کہ اس اقدام سے علاقے کو ممکنہ اختلاف اور انتشار سے بچانے میں مدد ملی۔ اہلِ علاقہ کے مطابق دوبیرن کلاں کی تاریخ میں پہلی مرتبہ ایک خاتون اسسٹنٹ کمشنر کی موجودگی میں جامع مسجد میں اس نوعیت کا بڑا جرگہ منعقد ہوا، جسے مقامی سطح پر ایک اہم پیش رفت قرار دیا جا رہا ہے۔ اجلاس کی مکمل کارروائی، شرکاء کی آراء اور ویڈیو شواہد پر مشتمل تفصیلی رپورٹ کلرسیداں میڈیا سروس پر ملاحظہ کی جا سکتی ہے۔ - @zahidpervez136