@megdadahmed22: في غُربة بتكون بين بلد وبلد... وفي غُربة أصعب منها بمراحل، غُربة الروح. الغُربة البتخليك تصحى كل صباح، تمشي في يومك، تضحك مع الناس، ترد على الكلام، لكن من جواك حاسس إنك بعيد شديد. بعيد من نفسك، وبعيد من الإحساس البتعرفو زمان. غُربة الروح ما بتحتاج سفر ولا جواز. ممكن تكون قاعد وسط أهلك، وفي بيتك، وحواليك الناس البتعرفهم من سنين، وبرضو تحس إنك وحيد. تحس إن في حاجة ناقصة، لكن ما قادر تحدد شنو هي. كأنو قلبك قاعد يفتش على مكان ضاع منو، أو زمن مستحيل يرجع. أسوأ حاجة في غُربة الروح إنك بتتعب من غير ما زول يلاحظ تعبك. بتقول: "أنا كويس"، وإنت من جواك ألف حاجة مكسورة. بتضحك عشان الناس ما تسألك، وبتسكت لأنك عارف إن في وجع ما بتقدر الكلمات تشرحهو. مرات الغُربة دي بتبدأ من خيبة... من زول كنت معتبره وطن، وفجأة بقي أبعد منك من أي غريب. ومرات بتبدأ من تراكمات السنين، من وجع فوق وجع، ومن خذلان ورا خذلان، لحدي ما الروح تتعب، وتبقى ما عندها رغبة في الكلام ولا العتاب. بتلقى نفسك بقيت ما بتستنى زول، وما بتجري ورا اهتمام، وما بتعاتب زي زمان. ما لأنك اتغيرت، لكن لأن التعب علّمك إنو بعض الحاجات مهما حاولت تصلحها، ما بترجع زي أول. وفي لحظة معينة، الروح بتختار السكات بدل الضجيج، والعزلة بدل الزحمة. غُربة الروح ما معناها إنك ضعيف، بالعكس... معناها إنك شايل فوق طاقتك، وإنك قاومت كتير لحدي ما بقى التعب ظاهر في تفاصيلك. في نظرتك، في سكوتك، وفي الطريقة البقيت تتعامل بيها مع الدنيا. لكن برغم كل ده، جوة كل روح مغتربة في بصيص أمل. أمل إنو بكرة يكون أخف، وإنو ربنا يعوضها عن كل الوجع، ويجمعها بناس يشبهوها، يفهموها من غير شرح، ويقدروا وجودها من غير ما تطلب. يمكن الأيام أخدت منك حاجات كتيرة، ويمكن فقدت ناس كنت فاكرهم ما بتفارقك، لكن رب الخير ما بقفل باب إلا ويفتح أبواب أحسن منو. وكل وجع مرّ عليك كان بيعلمك درس، وكل غُربة عشتها كانت بتجهزك ليوم تلقى فيهو راحتك الحقيقية. ولو الليلة حاسس إن روحك غريبة، وما لاقية مكان ترتاح فيهو... أوعى تيأس. ادعي ربك، وخلي عندك يقين إنو ما في وجع بيدوم، وما في ليل من غير صباح. يمكن الراحة اتأخرت، لكن أكيد جاية، ويمكن الوطن البتفتش عليهو ما يكون مكان... يمكن يكون شخص، ويمكن يكون لحظة، ويمكن يكون سلام ربنا البينزلو فجأة على قلبك ويخليك تقول: الحمد لله... أخيراً روحي ارتاحت. مقــ⁷ــداد #خواطر_مقداد #خواطر #سودانيز_تيك_توك_مشاهير_السودان🇸🇩 #سودانيز_تيك_توك_مشاهير_السودان #جخو،الشغل،دا،يا،عالم،➕_❤_📝

المقداد // Megdad

Open In TikTok:

Region: SD

Wednesday 05 August 2026 18:17:31 GMT