ရေဘေးသင့်သူတွေကို ထမင်းထုတ် သွားဝေသူ လူငယ်တစ်ဦး ရေစီးနဲ့ မျောပါပြီး သေဆုံး CJ Platform ရေဘေးသင့်နေတဲ့ ဧရာဝတီတိုင်း၊ လေးမျက်နှာမြို့နယ်က ပြည်သူတွေကို ထမင်းထုတ် သွားဝေတဲ့ လူငယ်တစ်ဦး ဒီကနေ့ ဩဂုတ် ၅ရက် မနက် ၇ နာရီက ရေစီးနဲ့ မျောပါပြီး ရေနစ် သေဆုံးသွားတယ်လို့ လူမှုကူညီရေး အသင်းတွေဆီက သိရပါတယ်။ ဒီကနေ့ မနက် ၇ နာရီက လေးမျက်နှာမြို့နယ်၊ အိုင်သပြုကျေးရွာမှာရှိတဲ့ ရေဘေးသင့်သူတွေကို ထမင်းထုတ် သွားဝေတဲ့ အသက် ၂၂ နှစ်အရွယ် လူငယ်တစ်ဦး ရေစီးနဲ့ မျောပါပြီး ရေနစ် သေဆုံးခဲ့တာလို့ ဒေသခံတစ်ဦးက CJ Platform ကို ပြောပါတယ်။ "ထမင်းထုတ် လိုက်ဝေတဲ့ ကောင်လေးက ရေမကူးတတ်ဘူး။ ရေမကူးတတ်တော့ ကူးတတ်တဲ့သူရဲ့ လက်ကိုဆွဲပြီး ထမင်းထုတ်ဝေတာ။ ရေစီးက အရမ်းသန်တော့ ရေစီးနဲ့ ပါသွားတာ။ ကယ်ဆယ်ရေးအဖွဲ့တွေ လိုက်ရှာတော့ ရေနစ်သေတဲ့ အလောင်းပဲ ပြန်ရတယ်။ သနားပါတယ်။ အသက် ၂၀ ကျော်ပဲ ရှိသေးတယ်" လို့ ပြောပါတယ်။ ရေစီးနဲ့ မျောပါသွားတဲ့ လူငယ်ကို လူမှုကယ်ဆယ်ရေး အဖွဲ့တွေက လိုက်လံ ရှာဖွေခဲ့ရာ မနက် ၁၁ နာရီမှာ ပြန်တွေ့ခဲ့ပြီး ရုပ်အလောင်းကို ဟင်းသတ္တမြို့နယ် ဆေးရုံဆီ ပို့ဆောင်ပေးခဲ့တယ်လို့ သူက ပြောပြပါတယ်။ သေဆုံးသူ လူငယ်မှာ ငါးသိုင်းချောင်းမြို့နယ်၊ အောင်မင်္ဂလာရပ်ကွက်မှာ နေထိုင်သူတစ်ဦး ဖြစ်ပြီး ရေဘေးသင့် ပြည်သူတွေကို ကူညီဖို့ ပရဟိတအဖွဲ့တွေနဲ့ လိုက်ပါလာတာလို့ လူမှုကူညီရေး အသင်းတွေရဲ့ ပြောပြချက်အရ သိရပါတယ်။ ဩဂုတ် ၄ ရက် မနက် ၇ နာရီကလည်း လေးမျက်နှာမြို့နယ်၊ အမှတ် (၃) ရပ်ကွက်မှာ စိတ်ကျန်းမာရေး မကောင်းတဲ့ အသက် ၇၀ အရွယ် အဘွားအိုတစ်ဦး ရေနစ် သေဆုံးခဲ့ပါတယ်။ ငဝန်မြစ်ရေကာ တာကျိုးပေါက်မှုကြောင့် လေးမျက်နှာမြို့နယ်မှာ မြို့ပေါ်ရပ်ကွက် ၅ ခုနဲ့ ကျေးရွာ ၁၀၆ ရွာ၊ အိမ်ခြေ ၇,၇၃၄ အိမ်၊ အိမ်ထောင်စု ၇,၅၈၅ စု ရေဘေးသင့်ခဲ့ပြီး လူဦးရေ ၃၂,၆၀၇ ယောက် ကယ်ဆယ်ရေးစခန်းတွေမှာ နေထိုင်နေရတယ်လို့ စစ်အုပ်စုရဲ့ ထုတ်ပြန်ချက်တွေအရ သိရပါတယ်။ ဓာတ်ပုံ - ပရဟိတအဖွဲ့များ #CJPlatform #ဧရာဝတီတိုင်း #လေးမျက်နှာရေကြီးမှု #ရေဘေးကူညီရေးလူငယ်သေဆုံးမှု - @phyu.thawet.hnin