@takyk.media: #takyk #Eýran #medeniýet #rowaýat #OmarHaýýam Amanat lybas Size söwündilermi? Geçiň gidiň. Näme üçinmi? Ine, jogaby. Bir adam köpçüligiň içinde agzyna ak gelse-de, gara gelse-de, saýgarman paýyş sözleri aýdyp, Omar Haýýamy aýyplamaga başlapdyr. — Häý, sen hudaýsyz! Serhoş! Ogrynyň öňüni dolan!.. Oňa jogap bermäge derek Omar Haýýam ýylgyrypdyr. Bu ýagdaýy synlap duran, iň soňky ýoň bolan egin-başlardan geýnen bir jalaý pyýada Haýýamdan sorapdyr: — Bu paýyş sözlere neneň çydap durup bilýäň? Mertebäňi peseltdirmän, jogap berseň bolmaýarmy? Omar Haýýam ýene ýylgyrypdyr-da: — Ýör bäri, düş yzyma… — diýipdir. Jalaý onuň yzyna düşüpdir. Olar tozan basan bir kepbä giripdirler. Haýýam şemdandaky şemi ýakyp, sandygy dörüp, sary giden, ýamalardan ýaňa abat ýeri galmadyk köne çäkmeni çykarypdyr-da, ony ýaňky pyýadanyň üstüne oklap goýupdyr. — Hany, şuny geýip gör bakaly, tüýs saňa şap bolaýsa gerek. Jalaý pyýada çäkmene geňirgenip garapdyr-da: — Men bu köne eşigi geýjekmi? Sen näme, meniň gowy geýim geýýändigimi göreňokmy? — diýip, çäkmeni yzyna oklapdyr. Şonda Omar Haýýam şeýle diýipdir: — Gördüňmi, sen ýyrtyk, könelen dony geýmek islemediň, ony yzyna okladyň. Edil şonuň ýaly, men hem maňa aýdylan paýyş sözleri kabul etmedim. Şonuň üçin olar öz eýesine gaýdyp bardy. Unutmalyň: aýdylýan sözlerden we edilýän hereketlerden göwün etmek — köne, sallam-sajak esgä öwrülen amanat lybasy geýip görmek ýalydyr.

TAKYK MEDIA

Open In TikTok:

Region: US

Friday 07 August 2026 03:12:23 GMT