"ထိုင်းရောက် အာဏာသိမ်းခေါင်းဆောင် ကန့်ကွက်ဆန္ဒပြခံရ" စစ်ခေါင်းဆောင် ဦးမင်းအောင်လှိုင် ထိုင်းပြည်သူ့လွှတ်တော်ဥက္ကဋ္ဌ မစ္စတာ မုန်းခွန် စူရဆတ်ချာနဲ့ တွေ့ဆုံဖို့ ဒီနေ့ ဩဂုတ်လ ၇ ရက်နေ့က ထိုင်းပြည်သူ့လွှတ်တော် အထူးဧည့်ကြိုခန်းမကို ရောက်လာတဲ့အချိန် ထိုင်းပြည်သူ့ပါတီ (People's Party) လွှတ်တော်အမတ် 'အနုဆွန် သမ္မချတ်'က အော်ဟစ် ဆန္ဒပြခဲ့ပါတယ်။ အနုဆွန် သမ္မချတ်ဟာ ဦးမင်းအောင်လှိုင်နဲ့ မစ္စတာ မုန်းခွန် စူရဆတ်ချာတို့တွေ့ဆုံမှုကို လေ့လာဖို့ ဧည့်ခန်းမကို ရောက်လာတာဖြစ်ပါတယ်။ နယ်စပ်ဖြတ်ကျော် ပြဿနာတွေကို ဖြေရှင်းပေးဖို့၊ မြန်မာနိုင်ငံ၏ ဒီမိုကရေစီ ပြန်လည်ဖော်ဆောင်ရေး ထောက်ခံပေးဖို့ တောင်းဆိုထားတဲ့ စာတစ်စောင်ကိုလည် ထိုင်းပြည်သူ့လွှတ်တော်ဥက္ကဋ္ဌကတစ်ဆင့် ဦးမင်းအောင်လှိုင်ကို ပေးဖို့ အနုဆွန် သမ္မချတ်က ပြင်ဆင်လာတယ်လို့ ထိုင်းသတင်းတွေမှာ ဖော်ပြပါတယ်။ သူ့စာမှာပါတဲ့အကြောင်းအရာကို ရည်ညွှန်းပုံရတဲ့ စကားလုံးတွေဖြစ်တဲ့ “ငြိမ်းချမ်းရေးအတွက်၊ လူသားချင်းစာနာမှုအတွက်" ဆိုပြီး အနုဆွန် သမ္မချတ်က ဆက်တိုက် အော်ဟစ်ခဲ့တာကို လူမှုကွန်ယက်မှာ ထွက်ပေါ်လာတဲ့ ရုပ်သံဖိုင်မှာတွေ့ရပါတယ်။ ဒီလိုအော်ဟစ်ခဲ့တာကြောင့် စီစဉ်သူများနှင့် လုံခြုံရေးဝန်ထမ်းတွေ အထိတ်တလန့်ဖြစ်သွားခဲ့တာကိုတွေ့ရပြီး မစ္စတာ အနုဆွန်ကို ခမ်းမအတွင်းကနေ ခေါ်ထုတ်သွားခဲ့တာ တွေ့ရပါတယ်။ #news - @myanmar_now