کچھ لوگوں کو خاموشی ہمیشہ عجیب لگتی ہے۔ انہیں لگتا ہے جو شخص کم بولتا ہے، الگ رہتا ہے، یا ہر بات پر پہلے جیسا ردِعمل نہیں دیتا، شاید اُس کے اندر کچھ ٹھیک نہیں۔ افسوس یہ ہے کہ ہم کسی انسان کے رویے کو سمجھنے سے پہلے اُس پر رائے قائم کر لیتے ہیں، حالانکہ ہمیں اُس زندگی کا صرف اتنا حصہ دکھائی دیتا ہے جتنا وہ دنیا کے سامنے رکھنا چاہتا ہے۔ ہمیں اُس رات کا علم نہیں ہوتا جس میں وہ سو نہیں سکا، اُس ذمہ داری کا اندازہ نہیں ہوتا جو وہ کئی دنوں سے اکیلا اٹھائے ہوئے ہے، اُس نقصان کا پتا نہیں ہوتا جس کے بعد اُس کے اندر بہت کچھ پہلے جیسا نہیں رہا۔ کبھی کبھی انسان پاگل نہیں ہوتا، بس بہت کچھ دیکھ چکا ہوتا ہے۔ کبھی وہ کمزور نہیں ہوتا، بس ہر جنگ کا شور دنیا کو سنانا چھوڑ دیتا ہے۔ اور کبھی اُس کے چہرے پر بکھرا پن اُس کی دماغی حالت نہیں، اُس زندگی کی تھکن ہوتی ہے جسے وہ ہر روز اپنے اندر سمیٹ کر لوگوں کے درمیان بیٹھتا ہے۔ اسی لیے کبھی کبھی میرے ذہن میں یہ بات آتی ہے کہ "فضول میں آ کر چھیڑتے ہیں میری دماغی حالت کو، میرے مسائل سے ناواقف لوگ!" انہیں کیا معلوم کہ ہر خاموشی کے پیچھے ایک پوری داستان ہو سکتی ہے۔ کچھ لوگ صرف اس لیے نہیں بتاتے کہ انہیں یقین ہوتا ہے کہ سامنے والا سمجھے گا نہیں، اور کچھ اس لیے خاموش رہتے ہیں کہ پچھلی بار جب انہوں نے دل کھولا تھا تو اُن کی بات ہی اُن کے خلاف استعمال ہوئی تھی۔ انسان ایک بار نہیں، بار بار ٹوٹ کر سیکھتا ہے کہ ہر شخص کو اپنے اندر کا راستہ نہیں دکھانا چاہیے۔ کچھ دکھ ایسے ہوتے ہیں جنہیں بیان کرنے سے سکون نہیں ملتا، بلکہ سوال بڑھ جاتے ہیں، وضاحتیں دینی پڑتی ہیں، اور پھر وہی بات لوگوں کے لیے ایک قصہ بن جاتی ہے۔ تب انسان کے پاس واقعی خاموش رہنے کے علاوہ بہت کچھ نہیں بچتا؛ "میرے پاس خاموشی کے سوا کوئی حل نہیں، میں بات کرتا ہوں تو بات بگڑ جاتی ہے۔" اور شاید یہ جملہ اُن لوگوں کو سمجھ آئے جو کبھی اپنی بات سمجھانے کی کوشش کرتے کرتے آخرکار خاموش ہونا سیکھ گئے ہوں۔ میں یہ سب صرف اپنی طرف سے نہیں کہہ رہا۔ جو لوگ میری پوسٹس پڑھتے ہیں، مجھے پیغام بھیجتے ہیں، میرے احساسات کو پسند کرتے ہیں، مجھے فالو کرتے ہیں، یا کبھی کسی پوسٹ کے نیچے صرف ایک جملہ لکھ کر چلے جاتے ہیں، اُن میں سے بہت سے لوگ شاید نہیں جانتے کہ اُن کے چند الفاظ میرے لیے کتنے معنی رکھتے ہیں۔ میں دل سے اُن سب کا ممنون ہوں، کیونکہ آج میں اس پلیٹ فارم پر جہاں بھی ہوں، جیسا بھی ہوں، اُس میں میری محنت کے ساتھ اُن لوگوں کا حصہ بھی ہے جنہوں نے میرے لکھے ہوئے احساس کو اپنا احساس سمجھا۔ لیکن ایک بات میں ہمیشہ واضح رکھنا چاہتا ہوں: میں جو کچھ لکھتا ہوں، ضروری نہیں کہ ہر بار میں خود اُس کیفیت سے گزر رہا ہوں۔ کچھ احساسات میں گزر چکا ہوں، کچھ میں شاید آج بھی کہیں موجود ہوں، کچھ اپنے آس پاس کے لوگوں میں دیکھتا ہوں، اور کچھ اُنہی لوگوں کے پیغامات سے سمجھتا ہوں جو مجھے اپنی کہانی سناتے ہیں۔ اس لیے میری ہر پوسٹ کو میری ذاتی زندگی کا اعتراف سمجھ لینا بھی درست نہیں۔ بعض اوقات میں اپنی کہانی لکھ رہا ہوتا ہوں، بعض اوقات کسی اور کی، اور کبھی صرف اُس احساس کی جس سے کوئی زندہ انسان کہیں نہ کہیں گزر رہا ہوتا ہے۔ احساس بھی اللہ کی دی ہوئی ایک نعمت ہے، اور شاید اس دور میں یہ نعمت اپنے ساتھ ایک عجیب آزمائش بھی لے کر آتی ہے۔ ہر بات کو محسوس کرنا، دوسروں کے درد کو سمجھ لینا، کسی کے لہجے میں چھپی ہوئی تھکن پکڑ لینا، ایک خاموش انسان کے اندر چلنے والی جنگ کا اندازہ کر لینا... یہ سب خوبصورت بھی ہے اور کبھی کبھی بہت تکلیف دہ بھی۔ میں یہاں صرف اپنی ذات دکھانے یا اپنی زندگی کی نمائش کرنے نہیں بیٹھا؛ میری کوشش صرف یہ ہے کہ جو احساس انسان کے اندر پیدا ہوتا ہے، اسے لفظ مل جائیں، کوئی پڑھنے والا اپنی کیفیت پہچان لے، کسی کو لگے کہ وہ اکیلا نہیں، اور کسی ایسے شخص کو اپنی خاموشی میں تھوڑا سا سکون مل جائے جو شاید آج بھی لوگوں کے درمیان بیٹھ کر اپنے اندر کی جنگ لڑ رہا ہے۔ آپ کا ہر پیغام، ہر محبت، ہر انتظار اور ہر بار میری کسی تحریر کو اپنے دل کے قریب رکھنا میرے لیے بہت قیمتی ہے۔ شاید اسی لیے میں آج بھی لکھتا ہوں، کیونکہ میرے الفاظ صرف میرے نہیں رہے؛ اُن میں کہیں نہ کہیں اُن سب لوگوں کے احساسات بھی شامل ہو گئے ہیں جو خاموشی سے پڑھتے ہیں، محسوس کرتے ہیں اور پھر واپس اپنی زندگی میں چلے جاتے ہیں۔ اور اگر میری کوئی ایک تحریر کسی ایک انسان کو یہ احساس دے دے کہ "مجھے کوئی سمجھتا ہے" تو میرے لیے شاید اُس سے بڑا اس کام کا کوئی صلہ نہیں۔#baliwrites #ehsaasdiaries #self #MentalHealthAwareness #reallife - @ehsaas11211