ဒေါက်တာ အနုဆာန်သည် “ငြိမ်းချမ်းရေးအတွက်… လူသားဆန်မှုအတွက်…” ဟု ရဲရဲဝံ့ဝံ့ ကျယ်လောင်စွာ ကြွေးကြော်၍ ဆန္ဒထုတ်ဖော်ခဲ့သည်။ ထိုသို့ ကြွေးကြော်မှုကြောင့် လွှတ်တော်လုံခြုံရေး ရဲတပ်ဖွဲ့က သူ့ကို ခန်းမအတွင်းမှ ချက်ချင်း ခေါ်ဆောင်ထုတ်ပစ်ခဲ့သော်လည်း ထိုစကားသံများသည် ထိုင်းနိုင်ငံနှင့် တစ်ကမ္ဘာလုံးကို ဟိန်းထွက်သွားခဲ့သည်။ ထိုသို့ ရဲရဲဝံ့ဝံ့ ဆန့်ကျင်လိုက်သူမှာ ရိုးရိုးနိုင်ငံရေးသမားတစ်ဦး မဟုတ်ဘဲ ထိုင်းနိုင်ငံ၏ အထက်တန်းလွှာ စီးပွားရေးပညာရှင်တစ်ဦးဖြစ်သည်။ ဒေါက်တာ အနုဆာန်သည် အမေရိကန်ပြည်ထောင်စု Fordham University မှ စီးပွားရေးပါရဂူဘွဲ့ (Ph.D.) ရရှိခဲ့သူဖြစ်ပြီး Citibank ၏ ဒုတိယဥက္ကဋ္ဌ (Vice President)၊ ထိုင်းဗဟိုဘဏ် (Bank of Thailand) ၏ ဒါရိုက်တာ၊ ဘဏ္ဍာရေးဝန်ကြီး၏ အကြံပေးနှင့် ရဲင်ဆစ်တက္ကသိုလ်၏ ဒုတိယပါမောက္ခချုပ် စသည့် ထိပ်တန်းရာထူးပေါင်းများစွာကို ထမ်းဆောင်ခဲ့သူဖြစ်သည်။ လက်ရှိတွင်လည်း ပရီဒီ ပနုမယုန်း အင်စတီကျု Pridi Banomyong Institute ၏ ဥက္ကဋ္ဌအဖြစ် ဆောင်ရွက်နေသည့် တကယ့် ဒိတ်ဒိတ်ကြဲ ပညာတတ်တစ်ဦး ဖြစ်သည်။ ထိုသို့သော မြင့်မားသည့် ဂုဏ်သိက္ခာနှင့် အဆင့်အတန်းရှိသည့် ပညာရှင်ကြီးတစ်ဦးက ဖိနှိပ်ခံ မြန်မာပြည်သူများဘက်မှ ရဲရဲဝံ့ဝံ့ ရပ်တည်ပေးခဲ့ခြင်းကြောင့် မြန်မာပြည်သူ အပေါင်းက သူ့ကို လှိုက်လှိုက်လှဲလှဲ ကျေးဇူးတင်ဂုဏ်ပြုလျက်ရှိပြီး ရင်ထဲကသူရဲကောင်းအဖြစ် သတ်မှတ်လိုက်ကြပြီဖြစ်သည်။ ဘေးအိမ် မီးလောင်နေသည့်အခါ တချို့က မီးလောင်ရာလေပင့်ကာ မီးလောင်ပြင်မှ ပစ္စည်းများကို ဝင်ရောက်ခိုးယူ၊ ဆွဲပြေးကြသည်။ တချို့ကလည်း မီးကူးစက်မည်ကို စိုးရိမ်ပြီး မိမိပစ္စည်းလေး မိမိသိမ်းဆည်းကာ ဘေးထိုင်ကြည့်နေတတ်ကြသည်။ သို့သော် ဒေါက်တာ အနုဆာန်ကမူ ထိုသို့မဟုတ်ပါ။ မီးလောင်နေသည့် အိမ်နီးချင်းအတွက် သတ္တိရှိရှိ ရေပုံးဆွဲ၍ မီးလာငြှိမ်းပေးခဲ့သည့် အိမ်နီးချင်းကောင်း၏ ပြောင်မြောက်သော သတ္တိနှင့် တကယ့်ပညာတတ်တစ်ဦး၏ ဖြောင့်မတ်သော နှလုံးသားကို တစ်ကမ္ဘာလုံးသိအောင် သက်သေပြလိုက်ခြင်းပင် ဖြစ်ပေတော့သည်။ credit - - @.min.chit.ko