@mariamrefaatmohamed: فين تطبيق قانون العمل في الفصل التعسفي أنا شايفة إن واقعة سيزلر فتحت موضوع أخطر بكتير من موضوع الصلاة نفسه: إحنا بنطبق القانون؟ ولا بنحكم بالتريند؟ أنا اعترضت على طريقة التعامل مع السيدة، وأكررها: الصلاة شعيرة عظيمة، واحترامها واجب، وأي موظف لازم يعرف يتعامل باحترام حتى لو سياسة المكان لا تسمح بالصلاة في جزء معين من المطعم. لكن لما الأزمة تتحول لتريند، وبعدها نسمع إن مدير الفرع اتفصل، هنا لازم نسأل: هو الموظف اتحقق معاه أصلًا؟ سمعوا دفاعه؟ عرفوا هل كان بينفذ تعليمات الإدارة ولا تصرف من نفسه؟ وإيه نتيجة التحقيق؟ لأن قانون العمل مش بيقول: الناس غضبت على السوشيال ميديا = افصل الموظف. قانون العمل رقم 14 لسنة 2025 وضع إجراءات واضحة قبل توقيع الجزاء، منها إبلاغ العامل بما هو منسوب إليه، وسماع أقواله، والتحقيق في دفاعه، وتوثيق التحقيق، وأن يكون القرار مسببًا. والأهم إن جزاء الفصل التأديبي نفسه من اختصاص المحكمة العمالية وفقًا للقانون. والقانون حتى لو الواقعة تستدعي إبعاد الموظف مؤقتًا عن مكان العمل أثناء التحقيق، سمح بوقفه مؤقتًا مع أجره لحين انتهاء التحقيق واتخاذ الإجراءات القانونية. وعشان كده أنا لا بدافع عن تصرف المدير، ولا بقول إنه بريء. أنا بدافع عن مبدأ أهم: ماينفعش ندين إنسان ونقطع رزقه تحت ضغط جمهور قبل ما نعرف الحقيقة كاملة ويتطبق عليه القانون. لو التحقيق أثبت إنه أخطأ، يتحاسب بالقانون. لكن لو أثبت إنه كان بينفذ سياسة أو تعليمات إدارية، يبقى المؤسسة نفسها لازم تتحمل مسؤوليتها، وماينفعش موظف واحد يتحول لكبش فداء عشان البراند يخرج من أزمة علاقات عامة. اللي يخوف فعلًا إننا نوصل لمجتمع تبقى فيه السوشيال ميديا هي جهة التحقيق، والجمهور هو القاضي، والشركة تنفذ الحكم عشان توقف الهجوم. حقوق السيدة مهمة. وحقوق الموظف مهمة برضه. دولة القانون ما تختارش حقوق طرف وتدوس على حقوق الطرف التاني حسب مين عليه الترند النهارده. وموضوع الصلاة بالذات ماينفعش يتحول لمسابقة مين أكثر تدينًا. ﴿وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ﴾ نعظّم الصلاة، طبعًا. لكن نعظّم معها العدل، والتبيّن، وعدم ظلم الناس. ولو ثبت فعلًا إن موظف اتفصل لمجرد تهدئة السوشيال ميديا من غير تحقيق وضمانات قانونية، فدي مش نهاية سعيدة للأزمة. دي ناقوس خطر. لأن بكرة أي واحد فينا ممكن يكون الموظف اللي الناس حكمت عليه في ساعتين. Mariam Abdelaal

mariam eladwee

Open In TikTok:

Region: EG

Sunday 09 August 2026 05:50:45 GMT