Waxaan jeclahay inta u dhaxaysa buuqa magaalada iyo kelinimada baadiyaha. Waxaan jeclahay daqiiqadaha aan ka dhex baxo sawaxanka kasta ee hareerahayga ah, oo aan u baxsado bannaanka magaalada. Maalintayda, waxyaabaha aan ugu jeclahay waxaa ka mid ah marka aan helo meel aan kula keliyeysto journaling-kayga iyo buugga i dhex geliya dunida kale; dunida aan ka dhex arko dhacdooyin aanan noolayn, waayo-aragnimo aanan soo marin, iyo sheekooyin aanan horjoog u ahayn ama aanan ahayn qofka hoggaaminaya sheekada. Waxaan jeclahay daqiiqadda aan qalinka dhigo, anigoo dareemaya in aan qubays ruuxeed soo qaatay. In aan madaxa kor u qaado, daawado dabeecadda, oo aan la cajabo sida uu Rabbi wax kasta ugu jaan-gooyay si hannaan sare leh. Mararka qaar waxaan dhegaha gashtaa airphones, anigoo si tartiib ah ugu dhex mushaaxaya saaxadda fanka noocyadeeda kala duwan. Heeso, sheekooyin, gabayo, iyo cod walba oo dhegahaygu ku raaxaysanayaan. Waxaan jeclahay wax kasta oo naftaydu u riyaaqdo inay ila joogaan daqiiqadahaas. Waxaan jeclahay daqiiqadda aanan cidna wax uga baahnayn, aanan cidna wax u caddaynayn, oo aanan isku dayayn inaan noqdo qofka ay dunidu ama dadku iga filayaan. Kaliya aniga iyo naftayda. Waxaa laga yaabaa in dadka qaar ay kelinimada u arkaan meel lagaga cararo masuuliyadaha, waxyaalaha u baahan hagaajinta iyo wax kasta oo noloshu kaaga baahan inaad wajahdo. Laakiin aniga, waa meesha aan naftayda ugu dhowaanayo. Halkaas ayaan ku ogaadaa in xasilloonidu aysan mar walba ahayn meel aad adduunyo iyo maal ka helayso; mararka qaar waa xaalad aan gudaha nafteena ka dhisayno. Waxaa laga yaabaa in sababta aan meelaha deggan u jeclahay aysan ahayn inaan dadka ka cararayo, balse aan doonayo inaan muddo yar ka maqnaado dhammaan codadka kale, si aan ugu dambayn u maqlo codkayga gaarka ah. #fyp #somalitiktok #journaling - @suhayr47